Гасцiннасць i добразычлiвасць панавалi на II «Кнiжных сустрэчах у Мiрскiм замку», якiя па традыцыi былi наладжаны ў трэцюю суботу чэрвеня. Арганiзатары — мiнiстэрствы iнфармацыi i культуры, Гродзенскi аблвыканкам, Карэлiцкi райвыканкам i музей «Замкавы комплекс «Мiр».
Летась, 15 чэрвеня 2019 года, фестываль сабраў каля 3500 гасцей. Больш за 40 выдавецтваў узялi ўдзел у прэзентацыi, продажы кнiжных навiнак у двары старажытнага замка. Сёлета праграма свята была пабудавана такiм чынам, каб прадставiць з мiнiмальным непасрэдным удзелам зацiкаўленых асоб усе праекты па знаёмстве з асветнiцкай, гiстарычнай кнiгай, мастацтвам кнiгi ў iнтэрнэт-прасторы. Фактычна «Кнiжныя сустрэчы ў Мiрскiм замку» 2020 года можна лiчыць кнiжным фестывалем у анлайн-рэжыме.
— Праектуючы сёлетняе кнiжнае свята ў Мiры, на старажытнай Гродзеншчыне, мы меркавалi, што трэба так арганiзаваць работу, каб пазнаёмiць шырокае грамадства з кнiгай як сацыяльнай, выхаваўчай з'явай, — дзелiцца сваiмi развагамi намеснiк мiнiстра iнфармацыi Iгар БУЗОЎСКI. — У краiне працуюць сотнi выдавецтваў, за год выходзiць каля дзесяцi тысяч назваў кнiг i брашур. Агульны наклад — дваццаць i болей мiльёнаў экзэмпляраў. Як не разгубiцца ў гэтым сапраўдным кнiжным моры? Таму, вiдавочна, i патрэбны розныя прэзентацыйныя, дыскусiйныя пляцоўкi для ўважлiвага разгляду, для ацэнак здзейсненага ў кнiгавыданнi. «Кнiжныя сустрэчы ў Мiрскiм замку» — адна з такiх магчымасцяў.
Нацыянальная бiблiятэка Беларусi падрыхтавала для Мiра спецыяльную выстаўку кнiг, альбомаў гiстарычнай, асветнiцкай тэматыкi. Аснову склалi кнiгi, якiя так цi iначай звязаны з Мiрскiм замкам, Карэлiччынай, iх ваколiцамi, Гродзеншчынай, увогуле з гiстарычнай тэматыкай. Намеснiк генеральнага дырэктара — дырэктар па навуковай рабоце i выдавецкай дзейнасцi Нацыянальнай бiблiятэкi Беларусi Алесь СУША так ахарактарызаваў свае ўяўленнi пра кнiжнае свята ў замку: «Фестываль «Кнiжныя сустрэчы ў Мiрскiм замку» з'яўляецца цудоўнай iнiцыятывай адраджэння даўняй кнiжнай традыцыi, якая ў Беларусi заўжды развiвалася не толькi ў вялiкiх гарадах i манастырах, але i ў мястэчках, прыватнаўласнiцкiх замках i сядзiбах. Будучыня беларускай кнiгi таксама звязаная, на маю думку, з кожным горадам цi вёскай, з кожнай сям'ёй i кожным грамадзянiнам».
На кнiжным фестывалi ў Мiры адным з цэнтральных мерапрыемстваў стаў круглы стол, дзе абмяркоўвалiся пытаннi развiцця музейнага комплексу ў рамках устойлiвага развiцця рэгiёна.
Дырэктар музея «Замкавы комплекс «Мiр» Аляксандр ЛОЙКА, якi ўзяў на сябе i мадэрацыю круглага стала, заўважыў, што ў вядомай на ўсю краiну i шмат шырэй гiстарычнай прасторы Мiрскага замка заўжды шанавалi асветнiцкiя, кнiжныя традыцыi. Вядома, што руплiвым кнiгазбiральнiкам быў i апошнi гаспадар замка — Мiхаiл Мiкалаевiч Святаполк-Мiрскi (1870—1938). Аляксандр Часлававiч звярнуў увагу на тое, што сёння музей актыўна займаецца кнiгавыданнем i кнiгараспаўсюджваннем. Кнiга, лiчаць у музеi, можа i павiнна суправаджаць навукова-пошукавую работу. Яна павiнна быць вiзiтоўкай не толькi для вузкага кола спецыялiстаў, але i для ўсiх наведвальнiкаў замка. Таму невыпадковым стала i тое, што ў межах праграмы II «Кнiжных сустрэч у Мiрскiм замку» былi адкрыты «Кнiжныя палiцы ад ААТ «Белкнiга» ў сувенiрнай краме музея. Такiм чынам, у Мiры iстотна пашырыцца асартымент продажу гiстарычнай, асветнiцкай лiтаратуры.
А што да развiцця музея «Замкавы комплекс «Мiр», якi, вiдавочна, з'яўляецца сапраўднай нацыянальнай, агульнадзяржаўнай каштоўнасцю нашай краiны, то ў час круглага стала быў выкладзены цэлы спектр слушных прапаноў. Наперадзе ў музейшчыкаў — рэканструкцыя вадаскiднага збудавання з добраўпарадкаваннем i арганiзацыяй пляцоўкi для сезоннага гандлю; рэстаўрацыя i прыстасаванне флiгеля; арганiзацыя рэгулярнага парку (так званага «iтальянскага саду»). Пра гэтыя ды iншыя клопаты музейна-замкавага жыцця гаварылi на круглым стале i Аляксандр Лойка, i кандыдат гiстарычных навук Вольга Папко, i загадчык аддзела генеалогii, геральдыкi i нумiзматыкi Iнстытута гiсторыi Нацыянальнай акадэмii навук Аляксей Шаланда. Усе яны так цi iначай закраналi i кнiжную, кнiгазнаўчую тэму. Дарэчы, i на круглым стале, i ў кулуарах фестывалю прагучала шмат розных iнiцыятыў, якiя, несумненна, разам i сфармiруюць парадак дня для прапаганды асветнiцкай кнiгi ў нашым грамадстве.
Асобна на фестывалi быў прэзентаваны праект «У пошуках страчанага», з якiм на Дзяржаўную прэмiю Рэспублiкi Беларусь намiнаваны збiральнiк старых паштовак Уладзiмiр Лiхадзедаў. Дарэчы, мясцовай школе i Мiрскай гарпасялковай бiблiятэцы ён падарыў асобнiкi сваiх фiлакартычных альбомаў з рэпрадукцыямi старых паштовак. Бiблiятэчкi кнiг — i школе, i мясцовай бiблiятэцы — падарыла i Мiнiстэрства iнфармацыi Рэспублiкi Беларусь. Гэта ўжо стала добрай традыцыяй — пакiдаць пасля завяршэння «Кнiжных сустрэч у Мiрскiм замку» ў падарунак кнiгi.
Мiкола БЕРЛЕЖ
Фота Уладзіслава ЦЫДЗІКА
Г. п. Мiр, Карэлiцкi раён
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
