Рэканструкцыя велічнага палаца, што знаходзіцца ў самым цэнтры горада, набліжаецца да завяршэння. Работы зараз вядуцца з тыльнага боку, фасад поўнасцю адрамантаваны. І хаця будынак не адносіцца да гістарычных каштоўнасцяў, яго велічны выгляд на Савецкай плошчы найперш звяртае на сябе ўвагу.
Работы па татальнай рэканструкцыі былога Палаца тэкстыльшчыкаў пачаліся ў мінулым годзе. Аб’ект пабудаваны больш за 60 год таму і патрабаваў рамонту. Працякаў дах, «сіфонілі» вокны і дзверы, састарэла і само пакрыццё фасада. Таму ў мінулым годзе было вырашана прыступіць да мадэрнізацыі аб’екта. Значная частка работ выканана. Новае аблічча атрымаў фасад, у якім бледна-ружовы колер застаўся асноўным. Адноўлена ляпніна, з’явіўся новы балкон, з тыльнага боку з’явяцца два новыя ганкі. Дах будзе металічны, фальцавы, з плоскіх лістоў.
Доўгі час ішлі спрэчкі наконт таго, што тут размясціць. У мінулым палац меў рознабаковы змест. Былі прапановы зрабіць цэнтральную выставачную галерэю ці цэнтр рамёстваў. Ва ўсялякім выпадку, усе былі згодны з тым, што тут, як і раней, павінна месціцца культурная ўстанова. Урэшце мясцовыя ўлады і спецыялісты прыйшлі да высновы, што сюды трэба перанесці абласны гістарычны музей, які знаходзіцца ў Старым замку. Дарэчы, там зараз таксама вядзецца грандыёзная рэканструкцыя.
У сувязі з новым прызначэннем былога палаца, з’явілася неабходнасць у дадатковым праектаванні. Гэта пакуль спыніла ход будаўнічых работ. Да праектавання прыцягнуты, што называецца, лепшыя сілы з боку Беларускага саюза мастакоў. Творцы робяць эскізы па мастацкім афармленні, пасля гэтага яны будуць перададзены праекціроўшчыкам. Згодна з дагаворам, усе ўзгадненні павінны быць вырашаны ў снежні будучага года, а сам аб’ект плануецца здаць у верасні.
Маргарыта УШКЕВІЧ
Фота аўтара
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
