Вы тут

«Анры Маціс. Погляд»: 118 літаграфій мастака прадставяць на выставе ў Мінску


Выставачны праект «Анры Маціс. Погляд» адкрыецца 23 красавіка ў мастацкай галерэі Міхаіла Савіцкага, паведамілі ва ўстанове культуры.


На выставе прадставяць 118 літаграфій работ Анры Маціса. Яны дэманструюць яго невычэрпную энергію як мастака і як філосафа. Усе работы суправаджаюцца тэкстамі з яго артыкулаў, кніг, пісем і разважанняў.

Сярод майстроў культуры Заходняй Еўропы XX стагоддзя Анры Маціс займае выключнае месца. Яркі, велізарны талент мастака шмат у чым вызначыў развіццё сучаснага выяўленчага мастацтва амаль ва ўсіх магчымых яго праявах. «Усё сваё жыццё Анры Маціс знаходзіўся ў няспынным пошуку. У імкненні да максімальна эфектнай і адначасова гарманічнай выразнасці ён мяняў свае мастацкія інструменты і мяняўся сам. Аднак кожны раз, падпарадкоўваючыся на час новаму моцнаму ўражанню, майстар усмоктваў яго, як губка, а затым творча перапрацоўваў у адпаведнасці з уласным светаадчуваннем», — адзначылі арганізатары.

Анры Маціс атрымаў у спадчыну і абагульніў у сваёй творчасці духоўнае багацце і лепшыя рысы культур мінулага і свайго часу. Выдатны жывапісец, рысавальшчык і гравёр, ілюстратар і майстар афармлення кнігі, манументаліст-дэкаратар, тэатральны мастак, скульптар, кераміст, майстар габелена і вітража, стваральнік новага віду дэкаратыўнага мастацтва — выразак з паперы, афарбаванай гуашшу, — такім быў яго вельмі шырокі творчы дыяпазон.

Асаблівае месца ў творчасці мастака на працягу ўсяго яго жыцця займаў жанр партрэта. «Чалавечы твар цікавіў яго больш, чым нацюрморты або пейзажы. Ён дазваляў лепш выказаць сваё амаль што рэлігійнае стаўленне да жыцця. Сузор’е партрэтаў ярка адлюстроўвае спробы Анры Маціса знайсці новыя спосабы адлюстравання рэальнага свету і чалавека. Імкнучыся да максімальнага выяўлення цэлага, мастак адхіляў усе неістотныя дэталі і максімальна спрашчаў формы, лічачы шкодным і непатрэбным усё, што не ўплывала непасрэдна на эмацыянальна-энергетычны імпульс. Многія яго кампазіцыі, прадстаўленыя на выставе, здаюцца падманліва простымі, але за кожнай з іх тытанічная творчая праца, што стварае незвычайнае напружанне гэтай „крыклівай“ прастаты», — падкрэслілі ў галерэі.

На выставе таксама будуць прадстаўлены работы вядомых беларускіх аўтараў і пачынальнікаў, творчасць якіх дапоўніць асноўную экспазіцыю літаграфій Анры Маціса. Экспазіцыю будуць суправаджаць інфармацыйныя стэнды, якія дапамогуць лепш разабрацца з прадстаўленымі работамі. Таксама на выставе будуць дэманстравацца дакументальныя фільмы, якія пазнаёмяць з біяграфіяй і творчым шляхам французскага аўтара. Да таго ж кожны жадаючы зможа паспрабаваць разгадаць тэматычны квест па выставе.

У якасці арганізатараў выступаюць Музей гісторыі горада Мінска і выставачная зала LIBRA. 118 каляровых літаграфій французскага мастака можна будзе ўбачыць па 20 чэрвеня.

Выбар рэдакцыі

Фінансы

Як засцерагчы сябе ад крадзяжу грошай з карткі?

Як засцерагчы сябе ад крадзяжу грошай з карткі?

У I квартале 2021 года было зарэгістравана звыш 800 крадзяжоў грошай праз інтэрнэт, гэта ў 4,5 раза больш, чым за такі ж перыяд год таму.

Грамадства

Спытайце пра радзіннае. Як раней адзначалі Радаўніцу?

Спытайце пра радзіннае. Як раней адзначалі Радаўніцу?

На пытанне чытача адказваюць Янка Крук і Аксана Катовіч.

Палітыка

Прэзідэнт: сцяг і герб Беларусі адлюстроўваюць нацыянальную ідэю народа — імкненне да незалежнага і мірнага жыцця

Прэзідэнт: сцяг і герб Беларусі адлюстроўваюць нацыянальную ідэю народа — імкненне да незалежнага і мірнага жыцця

Урачысты рытуал ушанавання дзяржаўных сцяга і герба праходзіць у Мінску з удзелам Аляксандра Лукашэнкі.