Вы тут

Пазнаёміліся з дзяўчынай, якая любіць родную мову і размаўляе толькі на ёй


Адна з праблем сучаснай нацыянальнай культуры — недастаткова актыўнае ўжыванне беларускай мовы. Пра гэта гаворыць і Міжнародная арганізацыя ЮНЕСКА, якая ўнесла беларускую ў атлас пад назвай «Мовы свету ў небяспецы». І калі старэйшае пакаленне хоць бы паміж сабой гаворыць па-беларуску або на трасянцы, то моладзь выкарыстоўвае ў штодзённым жыцці пераважна рускую.


Ірына Галавач з аўтарам.

Аднак ёсць і іншыя прыклады. Мы пазнаёміліся з дзяўчынай, якая любіць родную мову і размаўляе толькі на ёй. Ірына Галавач — вучаніца 11 класа Мазырскага дзяржаўнага абласнога ліцэя. Дзяўчына «ідзе» на залаты медаль, бярэ ўдзел і перамагае ў алімпіядах па беларускай мове і літаратуры, дзякуючы чаму ўжо мае стабальны сертыфікат па цэнтралізаваным тэсціраванні.

— У мяне ёсць мара — паступіць у медыцынскі ўніверсітэт. Мяне заўсёды цікавілі людзі, хочацца ім дапамагаць і рабіць усё дзеля таго, каб яны былі здаровыя і шчаслівыя. Я вельмі люблю сваю малую радзіму. Нават зараз, калі на пяць дзён еду са сваёй вёскі Крукавічы з Калінкавіцкага раёна ў Мазыр на вучобу, сэрца поўніцца пачуццямі страты нечага свайго, самага роднага! Я веру ў лёс: калі ты тут нарадзіўся, табе наканавана штосьці зрабіць для сваёй Радзімы, унесці ўклад у развіццё краіны. Кожны мае права на выбар і сам выбірае, на якой мове гаварыць. Любоў да роднага краю, да роднага слова прыходзіць з часам. Я шчаслівая, што жыву ў Беларусі.

— Адкуль у цябе такая прыхільнасць да роднай мовы?

— Справа ў тым, што ў пятым класе ў мяне з'явілася новая настаўніца — Святлана Лявонаўна Рак. Я яшчэ не бачыла чалавека, больш чыстага душою, які так моцна любіць сваю справу, якога па-сапраўднаму можна назваць Настаўнікам. Калі яна гаворыць, адчуваеш усю магутнасць беларускага слова. Мы з ёй займаліся, рыхтаваліся да алімпіяд, і з кожным днём станавілася ўсё цікавей вывучаць родную мову. Любоў да беларускага слова расла. Вельмі сумна было пакідаць сваю любімую настаўніцу. Але жаданне развівацца і мара паступіць у прэстыжны ўніверсітэт узялі сваё. У ліцэі мне таксама сустрэліся добрыя настаўнікі. Валянціна Аляксандраўна Шэцка, настаўніца беларускай мовы і літаратуры, дала многа ведаў, яе аптымістычны настрой заўсёды натхняў на новыя здзяйсненні, а мудрыя парады дапамагалі ў жыцці.

А вось што кажа сама Валянціна Аляксандраўна Шэцка пра сваю вучаніцу: «Мову любіць па-сапраўднаму, таму і такія вынікі. Яна сапраўдная ва ўсім. Працавітасць проста велізарная — усюды Ірына на вышыні».

— Ці не ўзнікаюць цяжкасці ў камунікацыі з аднагодкамі?

— Мне падабаецца размаўляць на беларускай мове, я яе не цураюся. У нас дзве сястры — руская мова і беларуская. Мае сябры размаўляюць на рускай, але гэта не перашкаджае нашым стасункам. Аднакласнікі заўсёды мяне падтрымліваюць. І наогул, мне на жыццёвым шляху сустракаюцца толькі добрыя людзі, ні адзін дрэнны чалавек яшчэ не трапляўся.

— Ці чытаеш ты беларускіх аўтараў звыш школьнай праграмы?

— Канешне! Без гэтага не было б вынікаў. Маім любімым паэтам з'яўляецца Максім Багдановіч, яго творчасць своеасаблівая. А любімы празаік — Васіль Быкаў, вельмі падабаецца, як ён адлюстроўвае падзеі вайны, праймае да слёз. Ведаеце, калі літаратурны твор выклікае моцнае ўражанне, калі я плачу, то такі верш ці раман мяне захапляюць і доўга помняцца.

— Якая будучыня ў нашай мовы?

— Безумоўна, яна будзе жыць! Зараз яна як ніколі актыўна развіваецца ў банкаўскай сістэме, у галіне спорту і ІT-сферы, створаны і паспяхова дзейнічаюць розныя інавацыйныя праекты. Беларуская мова жыве, на ёй гаворыць моладзь і ў Гродне, і ў Мінску, і ў іншых гарадах. Як пісаў Уладзімір Дубоўка, гэта «Матчын дарунак ад самай калыскі». Колькі езджу на алімпіяды, назіраю імпэт юнакоў і дзяўчат у вывучэнні роднай мовы — значыць, ёсць цікавасць! Алімпіяды і конкурсы ўзмацняюць жаданне паглыбляцца ў беларускую мову. Калі вывучаеш яе, адчуваеш сувязь і адзінства з нашым добрым і працавітым народам!

Сустрэча з сапраўднай беларускай натхніла нас на правядзенне невялікага анлайн-апытання сярод мазырскіх падлеткаў, удзел у якім узялі каля 50 навучэнцаў 11-й школы горада. Па атрыманых даных, у побыце руская мова пераважае ў 94,9 працэнта апытаных, з іх 20,5 працэнта рэгулярна выкарыстоўваюць англійскую і іншыя замежныя мовы. Беларуская мова карыстаецца меншым попытам: усяго 10,3 працэнта рэспандэнтаў выкарыстоўваюць яе. У той жа час 69,2 працэнта апытаных лічаць патрэбным вывучэнне мовы ў школах. Астатнія 30,8 працэнта рэспандэнтаў, якія адказалі «не», аргументуюць сваю пазіцыю «старамоднасцю мовы». Аднак 64,1 працэнта падлеткаў лічаць, што беларускую мову неабходна больш актыўна прапагандаваць на тэлебачанні, радыё, інтэрнэт-СМІ і іншых інфармацыйных пляцоўках.

Далейшы лёс нашай мовы, упэўнены, залежыць толькі ад нас, маладых.

Аляксандр ВЕСЯЛОЎ, вучань 9 класа СШ № 11 г. Мазыра, член клуба «Юны журналіст» Мазырскага цэнтра творчасці дзяцей і моладзі

Загаловак у газеце: Адданая роднаму слову, ці Шчасце быць беларускай

Выбар рэдакцыі

Грамадства

«Сацыяльная зніжка» — каму і на што? Як купіць прадукты танней на 10 %

«Сацыяльная зніжка» — каму і на што? Як купіць прадукты танней на 10 %

На зніжку могуць разлічваць пенсіянеры, шматдзетныя сем’і.

Палітыка

Андрэй Савіных: Якасць абраных стратэгій не правяраецца ў ідэальных сітуацыях

Андрэй Савіных: Якасць абраных стратэгій не правяраецца ў ідэальных сітуацыях

Беларускі парадак дня нікому не дае расслабіцца, час не дазваляе.

Грамадства

Экстраная дапамога. Як працуе Цэнтр аператыўнага кіравання МНС

Экстраная дапамога. Як працуе Цэнтр аператыўнага кіравання МНС

Дзяжурныя службы — вушы і вочы Міністэрства па надзвычайных сітуацыях. 

Палітыка

Пасол Беларусі ў КНР: З 1992-га тавараабарот з Кітаем вырас больш як у 130 разоў

Пасол Беларусі ў КНР: З 1992-га тавараабарот з Кітаем вырас больш як у 130 разоў

Наперадзе юбілей беларуска-кітайскіх адносін — 30 гадоў.