На прамую тэлефонную лінію, якую правёў старшыня Брэсцкага аблвыканкама Юрый ШУЛЕЙКА ў мінулую суботу, дазваніліся 32 жыхары вобласці. Пытанні, якія задавалі людзі, датычылі розных сфер жыцця. Найбольш праблем, як заўсёды, уздымалася наконт дарог, жыллёва-камунальных адносін, работы транспарту.
Ніна Міхайлаўна, 80-гадовая брастаўчанка, мае дачны ўчастак паміж вёскамі Чэрні і Тэльмы. Раней туды хадзіла маршрутка 11-га нумара. Цяпер яе няма. «Моладзь ездзіць
машынамі, — гаварыла пенсіянерка — а мы, людзі сталага веку, павінны пераадольваць значную адлегласць пехатою. Няўжо нельга арганізаваць адзін з маршрутаў гарадскога транспарту, каб аўтобус хадзіў хоць бы ранкам і ўвечары?»
Губернатар звязаўся са службовай асобай, якая курыруе транспарт, і атрымаў тлумачэнне, што прыпыначны пункт, які просяць устанавіць дачнікі, прымыкае да аўтастрады, а гэта забаронена правіламі бяспекі. Але кіраўніка вобласці адказ не задаволіў, і ён даручыў неадкладна сустрэцца з людзьмі і выпрацаваць альтэрнатыўны варыянт прыпынку.
А што перашкодзіла ўстанавіць прыпынак па вуліцы Гаўрылава ў Брэсце, засталося незразумелым. Рэч у тым, што ў снежні мінулага года вецер перавярнуў названы прыпынак, канструкцыі часткова ўпалі на людзей. Тады пашкоджаны прыпынак прыбралі, але не аднавілі яго да гэтай пары. Старшыня аблвыканкама паабяцаў гараджанцы, якая званіла, што ў хуткім часе дарожнікі ўсё выправяць.
Жыльцы аднаго з пад'ездаў дома па вуліцы Чкалава ў Ляхавічах паскардзіліся на якасць капітальнага рамонту. Па-першае, падчас яго ніхто не зважаў на дождж, і людзей літаральна залівала. Залівае і цяпер, калі рамонт даху набліжаецца да завяршэння. На гэты зварот кіраўнік вобласці адказаў так: «Да вас тэрмінова выедзе старшыня райвыканкама і разбярэцца на месцы».
Брастаўчанка прапанавала адкрыць у горадзе дзяржаўны інфармацыйна-забаўляльны цэнтр для падлеткаў. Юрый Шулейка адзначыў, што гэтая ідэя заслугоўвае ўвагі, і паабяцаў усебакова вывучыць прапанову.
Святлана ЯСКЕВІЧ
Сумесныя праекты ядзерных тэхналогій.
