Вы тут

Наталля Качанава правяла прамую тэлефонную лінію


Такі фармат зносін з членамі Савета Рэспублікі заўсёды карыстаецца папулярнасцю ў насельніцтва. Аб гэтым сведчыць і той факт, што тэлефон у кабінеце спікера верхняй палаты парламента не змаўкаў ні на хвіліну. Свае просьбы і прапановы агучылі жыхары практычна ўсіх рэгіёнаў краіны. Традыцыйна грамадзян хвалююць зямельныя і жыллёвыя пытанні, заканадаўчае рэгуляванне канкрэтных момантаў, працаўладкаванне, добраўпарадкаванне тэрыторый. Не абышлося і без пытанняў, якія знаходзяцца ў кампетэнцыі сістэмы аховы здароўя.


Адразу два чалавекі, які датэлефанаваліся на прамую лінію, паскарадзіліся на невыкананне абавязкаў сталічнай кампаніяй-забудоўшчыкам. Сем’і агучылі праблему, якая, мяркуючы па ўсім, датычыцца вялікай колькасці навасёлаў кватэр у жыллёвым комплексе «Мінск-Мір». І адна, і другая сям’я атрымалі ключы ад сваіх кватэр яшчэ ў верасні, але дагэтуль ім не выдаюць дакументы, якія ўстанаўліваюць правы на набытую ўласнасць. Атрымліваецца, што гаспадары кватэр у новабудоўлі не могуць там ні рамонт рабіць, ні нават прапісацца. У сувязі з апошнім вымушаны плаціць немалыя грошы за камунальныя паслугі, хоць самі там яшчэ і не жывуць.

Наталля Качанава расказала, што падчас апошняга прыёму грамадзян, які яна праводзіла ў Савеце Рэспублікі, на ім прысутнічала гендырэктар кампаніі «Дана Астра», якая з’яўляецца забудоўшчыкам дадзенага жыллёвага комплексу. «Мяне клятвенна заверылі, што ўсе гэтыя пытанні будуць вырашаны, — звярнула ўвагу Старшыня Савета Рэспублікі. — Мы разбяромся, асабіста зоймемся гэтымі пытаннямі».

Яна адзначыла, што адпаведныя даручэнні будуць дадзены старшыні Мінгарвыканкама Уладзіміру Кухараву. Спікер заўважыла, што пасля выхадных з грамадзянамі, якія агучылі ёй сваю праблему, звяжацца кіраўнік сакратарыята Савета Рэспублікі, каб даведацца, ці вырашана іх праблема.

Алена Віктараўна з Баранавіч паскардзілася на нежаданне мясцовых улад добраўпарадкоўваць вуліцу на тэрыторыі прыватнага сектара. Справа ў тым, што вуліца Анісімавіцкая, нягледзячы на тое, што знаходзіцца ў межах горада, не мае цвёрдага пакрыцця, а таму ў дажджлівае надвор’е пераўтвараецца ў балота. «Шмат жыве дзяцей, якія наведваюць школу, дзіцячы садок, а дарогі няма — гравійка і бруд, — канстатавала жанчына. — Ні праехаць, ні прайсці. Нават хуткая дапамога, калі патрэбна, да нас дабрацца не можа. Да таго дайшло, што горы смецця стаяць — смеццявоз не заўсёды можа пад’ехаць».

— А што кажа гарадская ўлада? — пацікавілася Наталля Іванаўна. 

Заяўніца расказала, што неаднаразова жыхары вуліцы звярталіся ў гарадскі выканаўчы камітэт, на што атрымлівалі адказ — у гарадскім бюджэце няма сродкаў. А калі і ёсць, то яны, са слоў жанчыны, накіраваны на добраўпарадкаванне іншых вуліц. 

— Паспрабуем вам дапамагчы, — паведаміла спікер верхняй палаты парламента і адразу дала даручэнне праінфармаваць аб сітуацыі старшыню Брэсцкага абласнога выканаўчага камітэта Юрыя Шулейку з мэтай узяць зварот на кантроль. 

Мінчанін Сяргей Віктаравіч звярнуўся з пытаннем электрафікацыі, якое датычыцца як яго асабіста, так і ўвогуле жыхароў пасёлкаў, якія знаходзяцца побач з Мінскай кальцавой аўтамабільнай дарогай. Мужчына расказаў, што на аўкцыёне набыў два зямельныя ўчасткі — у Сеніцы і Калядзічах. Падвёў электрычнасць, але з вельмі нізкай магутнасцю. Куды толькі не звяртаўся, каб палепшыць сітуацыю, але выйсця пакуль няма.

— Куды вы звярталіся? — удакладніла Старшыня Савета Рэспублікі.

— У «Мінскія электрасеткі». 

— Пабудавалі на ўчастках што-небудзь?

— Так, але не магу там нічога рабіць.

Наталля Качанава адказала, што ў сітуацыі разбяруцца — адпаведнае даручэнне будзе дадзена Міністэрству энергетыкі. «Мы праінфарміруем вас адразу, — дадала яна. — Гэта не толькі вас датычыцца, а і развіцця пасёлкаў».

Канкрэтныя парады і рэкамендацыі, даручэнні кампетэнтным службовым асобам і ведамствам — менавіта так Савет Рэспублікі працуе са зваротамі грамадзян. Толькі за 2023 год членамі верхняй палаты парламента, у тым ліку асабіста спікерам, было разгледжана 7,5 тысяч зваротаў. У мінулым годзе адбылося больш як дзве тысячы сустрэч з працоўнымі калектывамі, насельніцтвам па месцы жыхарства, праведзена звыш 700 асабістых прыёмаў грамадзян, больш як 300 прамых тэлефонных ліній. І гэтая работа працягваецца.

Вераніка КАНЮТА

Фота БелТА

З якімі яшчэ пытаннямі грамадзяне тэлефанавалі да Наталлі Качанавай, чытайце ў бліжэйшым выпуску «Мясцовага самакіравання».

Выбар рэдакцыі

Сям'я і дэмаграфія

Святлана Клачкова: Чым больш дзяцей, тым больш любові

Святлана Клачкова: Чым больш дзяцей, тым больш любові

Як жа шматдзетная сям’я спраўляецца з хатнімі клопатамі? 

Культура

Сёлета музей Янкі Купалы адзначае юбілей

Сёлета музей Янкі Купалы адзначае юбілей

«Пласт роднай зямлі — п’едэстал для паэта...» 

Грамадства

Ці забяспечваецца ахова грамадскага парадку на Мінскім моры?

Ці забяспечваецца ахова грамадскага парадку на Мінскім моры?

Пра гэта даведаліся карэспандэнты «Звязды».

Гандаль

Кандытарскія вырабы — брэнд беларускай харчовай прамысловасці

Кандытарскія вырабы — брэнд беларускай харчовай прамысловасці

Напярэдадні Міжнароднага сімпозіума кандытараў эксперты расказалі аб планах і перспектывах кандытарскай галіны.