Нацыянальная жаночая зборная Беларусі па баскетболе пачынае выступленне на чэмпіянаце Еўропы. З 17 па 21 чэрвеня кантынентальны турнір пройдзе ў дзвюх гарадах. Групавы этап, кваліфікацыя ў чвэрцьфіналы і самі чвэрцьфіналы пройдуць у Валенсіі (пулы А і В) і ў Страсбургу (пулы C і D). Беларускі правядуць свае матчы ў Валенсіі.
За званне чэмпіёнак кантыненту змагаюцца 16 мацнейшых жаночых каманд. Пераможцы кожнай групы выходзяць у чвэрцьфіналы. А каманды, якія ў сваіх пулах зоймуць другія месцы, 21 чэрвеня ў кваліфікацыйных матчах разыграюць пуцёўку ў чвэрцьфіналы, што запланаваныя на 23 чэрвеня. Затым ўсе дружыны працягнуць барацьбу ў Валенсіі. Паўфіналы чэмпіянату Еўропы запланаваныя на 26 чэрвеня, фінал і матч за трэцяе месца — на 27 чэрвеня.
Галоўны трэнер зборнай Беларусі Наталля Трафімава ўключыла ў выязны склад на кантынентальнае першынства наступных баскетбалістак: Вольга Зюзькова, Таццяна Ліхтаровіч, Юлія Рыцікавая, Аляксандра Тарасава, Яніна Інкіна, Вікторыя Гаспер, Анастасія Верамеенка, Ганна Брыч, Алекс Бэнтлі, Марыя Папова, Юлія Васілевіч, Алёна Карасевіч . Галоўны трэнер — Наталля Трафімава, асістэнты трэнера — Алескей Пынцікаў і Златан Прэшыч.
«Вызначыліся з канчатковым складам на Еўрабаскета літаральна за дзень да вылету ў Іспанію. У выніку ў ростыры можна ўбачыць як прозвішчы дасведчаных ігракоў, якія не адзін год з’яўляюцца прызнанымі лідарамі каманды, так і прадстаўнікоў новай хвалі нашай баскетбольнай школы. На гэты раз з-за пашкоджання, атрыманага ў апошнія дні збору, у заяўцы мы не ўбачым Ксенію Малашка. У астатнім жа ў Валенсію адправяцца ўсе тыя ігракі, якія на дадзены момант сапраўды з’яўляюцца наймацнейшымі ў нашай краіне», — прыводзіць словы трэнера прэс-служба Беларускай федэрацыі баскетболу.
Нацыянальная зборная Беларусі займае 6 месца еўрапейскага рэйтынгу ФІБА і 11 месца сусветнага рэйтынгу ФІБА. Свой першы матч беларускі правядуць супраць каманды Іспаніі, якая размяшчаецца на 1 месцы еўрапейскага рэйтынгу ФІБА і на 3 месцы ў сусвтеным рэйтынгу. Матч адбудзецца 17 чэрвеня ў 22.00 (па беларускім часе).
У інтэрв’ю прэс-службе Беларускай федэрацыі баскетболу капітан каманды Юлія Рыцікава падзялілася чаканнямі ад сустрэчы: «Зразумела, хвалююча пачынаць чэмпіянат Еўропы з сустрэчы з такім тытулаваным сапернікам як зборная Іспаніі. Да таго ж гаспадынь будуць падтрымліваць мясцовыя заўзятары, што таксама не малаважна. Аднак у першую чаргу мы настройваемся зрабіць сваю працу добра, выканаць трэнерскія ўстаноўкі і выкарыстоўваць свае моцныя бакі. Не варта забываць, што гэта жаночы баскетбол, у якім часам вынік можа быць непрадказальны. Адно магу сказаць дакладна, мы верым у сябе і настроены даць бой аднаму з фаварытаў турніру».
Усяго ў межах групавога турніру чэмпіянату беларуская каманда правядзе тры матчы. Пасля іспанак беларусак чакае матч з камандай Славакіі — 18 чэрвеня ў 19.00 (па беларускім часе). 20 чэрвеня ў 16.00 (па беларускім часе) зборная Беларусі сустрэнецца з камандай Швецыі.
Валерыя СЦЯЦКО
Што за таемнымі дзвярыма?
