Вы тут

20 лі­пе­ня стар­туе дру­гі этап ус­туп­най кам­па­ніі. 60 хвілін, каб канчаткова вызначыцца з прафесіяй


20 лі­пе­ня стар­туе дру­гі этап ус­туп­най кам­па­ніі: у гэ­ты дзень пры­ём­ныя ка­мі­сіі ВНУ рас­пач­нуць пры­ём да­ку­мен­таў ад абі­ту­ры­ен­таў. Сё­ле­та на бюд­жэт­ную фор­му на­ву­чан­ня пла­ну­ец­ца пры­няць 27,8 ты­ся­чы ча­ла­век і больш як 27 ты­сяч — на плат­ную. Не­вя­лі­кае па­ве­лі­чэн­не на­бо­ру на бюд­жэт ад­бу­дзец­ца па ме­ды­цын­скіх, тэх­ніч­ных і асоб­ных пе­да­га­гіч­ных спе­цы­яль­нас­цях.


Фота Яўгена Пясецкага.

Графік прыёмных камісій

З 20 да 26 ліпеня вызначыцца з выбарам спецыяльнасці павінны ўсе абітурыенты, якія прэтэндуюць на бюджэтныя месцы, а таксама абітурыенты, якія паступаюць на платную форму навучання на спецыяльнасці, дзе прадугледжаны ўступныя іспыты.

Для некаторых катэгорый абітурыентаў тэрміны падачы дакументаў крыху іншыя. Так, з 20 да 28 ліпеня (на два дні даўжэй) будуць прымаць дакументы на спецыяльнасці сельскагаспадарчага профілю на дзённую форму навучання.

І ўсяго два дні (з 20 да 22 ліпеня) адведзена на прыём дакументаў ад выпускнікоў профільных педагагічных і аграрных класаў, якія паступаюць без здачы экзаменаў па сумоўі на педагагічныя спецыяльнасці і спецыяльнасці сельскагаспадарчага профілю.

Ад абітурыентаў, якія паступаюць на платнай аснове, але не здаюць уступныя экзамены ў ВНУ, дакументы будуць прымацца:

  • з 20 ліпеня да 5 жніўня — у Акадэміі МУС, Магілёўскім інстытуце МУС, Універсітэце грамадзянскай абароны МНС;
  • з 20 ліпеня да 10 жніўня — на дзённую форму атрымання адукацыі па сельскагаспадарчых спецыяльнасцях;
  • з 20 ліпеня да 9 жніўня — ва ўсіх іншых установах вышэйшай адукацыі.

Унутраныя ўступныя іспыты ў ВНУ па асобных спецыяльнасцях (спартыўныя, творчыя, інтэграваныя) пройдуць з 27 ліпеня да 4 жніўня. У Акадэміі МУС, Універсітэце грамадзянскай абароны МНС, Ваеннай акадэміі, на ваенных факультэтах ВНУ ўнутраныя выпрабаванні пройдуць з 27 да 29 ліпеня. З 29 ліпеня да 4 жніўня будуць здаваць экзамены абітурыенты, якія паступаюць на сельскагаспадарчыя спецыяльнасці.

Тэрміны залічэння абітурыентаў на месцы, устаноўленыя кантрольнымі лічбамі прыёму для атрымання вышэйшай адукацыі за кошт сродкаў бюджэту, наступныя:

  • да 31 ліпеня — у Ваеннай акадэміі Рэспублікі Беларусь, Інстытуце пагранічнай службы Рэспублікі Беларусь, Універсітэце грамадзянскай абароны МНС, на ваенных факультэтах ВНУ;
  • да 6 жніўня — у Беларускай дзяржаўнай акадэміі мастацтваў, Беларускай дзяржаўнай акадэміі музыкі, Беларускім дзяржаўным універсітэце культуры і мастацтваў;
  • да 5 жніўня — у іншых дзяржаўных ВНУ.

На платную форму навучання залічэнне ва ўсіх ВНУ — да 11 жніўня.

Каб не застацца за бортам

Абітурыентам варта ведаць, што падаць арыгіналы дакументаў можна толькі ў адну ВНУ. Але ў рамках вызначанага для падачы дакументаў перыяду можна забіраць і перападаваць дакументы колькі заўгодна раз. У многіх ВНУ і на факультэтах ёсць агульны конкурс, які прадугледжвае падачу дакументаў адразу на некалькі спецыяльнасцяў аднаго кірунку.

Стандартны пакет дакументаў для прыёмнай камісіі — гэта дакумент аб адукацыі (атэстат або дыплом), пашпарт, сертыфікаты ЦТ, дакументы, якія пацвярджаюць ільготы, даведка аб стане здароўя, фатаграфіі 3 х 4. Заява запаўняецца альбо ў асабістым кабінеце на сайце ВНУ, альбо асабіста пры падачы дакументаў. Для асобных спецыяльнасцяў і форм навучання гэты спіс можа быць шырэйшы.

Як расказала кансультант упраўлення вышэйшай адукацыі Міністэрства адукацыі Рэма ГЕРЛОЎСКАЯ, як і раней, назіраць за ходам падачы дакументаў можна будзе анлайн. Ёсць для абітурыентаў важная навіна: цяпер інфармацыя аб колькасці набраных балаў, заяўленых у прыёмную камісію, будзе прадстаўлена ў іншым дыяпазоне. Раней ён складаў 10 балаў, напрыклад, 301—310, 311—320 і гэтак далей. Цяпер дыяпазон звузіўся да пяці балаў. Так абітурыентам будзе прасцей ацаніць свае шанцы, бо пры залічэнні мае значэнне нават адзін бал.

Падаваць дакументы лепш у першыя дні, бо калі ахвотных цягнуць да апошняга акажацца шмат, то конкурсная сітуацыя можа рэзка змяніцца ўжо пасля закрыцця прыёмнай камісіі, і абітурыент мае ўсе шанцы застацца за бортам. А вось сітуацыю з падачай дакументаў і сваё месца ў абітурыенцкім рэйтынгу трэба маніторыць пастаянна: інфармацыя аб ходзе падачы дакументаў абнаўляецца кожныя тры гадзіны, а ў некаторых універсітэтах — у рэжыме рэальнага часу.

У папярэднія гады апошняе абнаўленне ў дзень закрыцця прыёмных камісій адбывалася ў 15 гадзін, і тры гадзіны невядомасці былі для абітурыентаў самымі напружанымі. Але сёлета апошняе абнаўленне адбудзецца ў 17 гадзін. Такім чынам, у абітурыентаў будзе яшчэ гадзіна, каб сарыентавацца і падаць дакументы туды, дзе ім гарантавана хопіць балаў.

Спецыялісты па эканамічнай бяспецы

Між іншым, выбар у абітурыентаў вялікі: 50 ВНУ прапануюць увазе моладзі 340 спецыяльнасцяў. У гэтым годзе ўпершыню пройдзе набор і на абсалютна новыя для нашай краіны спецыяльнасці.

Так, на гістарычным факультэце Беларускага дзяржаўнага ўніверсітэта пачнуць рыхтаваць студэнтаў па новай спецыяльнасці «Рэгіёназнаўства». Яе адкрыццё абумоўлена патрэбай айчынных арганізацый і кампаній у супрацоўніках, якія валодаюць комплекснымі ведамі аб палітычных, эканамічных, сацыяльных, экалагічных, канфесійных, этнічных і культурных адметнасцях пэўнага рэгіёна, краіны або групы дзяржаў. Спецыяльнасць арыентавана на міждысцыплінарнасць і ўключае фундаментальную падрыхтоўку па гуманітарных, эканамічных, палітычных, геаграфічных, юрыдычных навуках, вывучэнне на павышаным узроўні дзвюх замежных моў, адна з якіх — мова краіны рэгіёна, што вывучаецца. Студэнты будуць навучацца па спецыялізацыях «Заходняя Еўропа і Паўночная Амерыка», «Цэнтральная і Усходняя Еўропа», «Блізкі Усход і Афрыка», «Азіяцка-Ціхаакіянскі рэгіён» і «Лацінская Амерыка».

Выпускнікі спецыяльнасці «Рэгіёназнаўства» змогуць працаваць аналітыкамі, прагназістамі, экспертамі па развіцці сацыякультурных, эканамічных ці палітычных сувязяў з рознымі рэгіёнамі і краінамі.

Яшчэ адна новая міждысцыплінарная спецыяльнасць — «Эканамічная бяспека» — інтэгравала найлепшыя айчынныя праграмы па эканоміцы, праве і інфармацыйных тэхналогіях у сферы бяспекі. Будучых спецыялістаў навучаць ацэньваць і прадухіляць магчымыя пагрозы і страты для прадпрыемстваў, маніторыць фактары, якія ўплываюць на іх эканамічную бяспеку, прагназаваць і кіраваць эканамічнымі рызыкамі. Выпускнікі змогуць свабодна арыентавацца ў адміністрацыйным, гаспадарчым, фінансавым і мытным праве.

Інавацыйная тэхніка і прамысловы дызайн

— Беларускі нацыянальны тэхнічны ўніверсітэт — гэта горад у горадзе, — кажа адказны сакратар прыёмнай камісіі ВНУ Андрэй САФОНАЎ. — Мы плануем набраць каля 4400 абітурыентаў на 100 спецыяльнасцяў і спецыялізацый. Бюджэтныя месцы займаюць прыкладна 70 працэнтаў ад кантрольных лічбаў набору.

Вядучыя будаўнічыя прадпрыемствы маюць вострую патрэбу ў інжынерах, якія дасканала ведаюць інавацыйнае абсталяванне, што прымяняецца ва ўсім шматпрофільным будаўнічым комплексе. Менавіта таму ў БНТУ адкрыецца набор на спецыяльнасць «Інавацыйная тэхніка для будаўнічага комплексу». Падрыхтоўка ў рамках спецыяльнасці будзе праводзіцца па трох спецыялізацыях: «Інавацыйная тэхніка для будаўніцтва і эксплуатацыі аўтамабільных дарог», «Ліфты, эскалатары, травалатары і пад'ёмна-транспартныя машыны» і «Інавацыйнае абсталяванне для атрымання прадуктаў з адпрацаваных будаўнічых канструкцый». Гэта значыць, што пасля другога курса сумеснай вучобы студэнты падзеляцца на тры ўмоўныя падгрупы, дзе ў кожнай будзе свой пералік дысцыплін.

Будучыя інжынеры атрымаюць навыкі аўтаматызаванага праектавання дэталяў, агрэгатаў і машын, а таксама будуць ведаць усё аб інавацыйным абсталяванні будаўнічага комплексу. Выпускнікі спецыяльнасці змогуць працаваць на прадпрыемствах будаўнічага комплексу, у буйных гандлёвых цэнтрах, вакзалах, метро, Нацыянальным аэрапорце ў якасці інжынераў па эксплуатацыі грузапад'ёмных механізмаў, ліфтаў, эскалатараў і на іншых аб'ектах.

Яшчэ адна новая цікавая спецыяльнасць — «Прамысловы дызайн» — з двума кірункамі: дызайн транспартных сродкаў і дызайн прамысловага абсталявання. Студэнтаў чакае паглыбленая падрыхтоўка ў галіне дызайн-праектавання транспартных сродкаў і вытворчага абсталявання. У працэсе падрыхтоўкі інжынерных кадраў увага будзе ўдзяляцца метадам і сродкам мастацкага канструявання, кампазіцыі, каларыстыцы, макетавання і трохмернага мадэлявання знешняй будовы, а таксама інтэр'еру кабін, працоўнага месца аператара і пасажырскага салона транспартных сродкаў. Падрыхтоўка інжынераў-дызайнераў будзе ажыццяўляцца для розных тэхнічных напрамкаў, звязаных з даследаваннем, праектаваннем і вытворчасцю аўтатрактарнай, будаўніча-дарожнай тэхнікі, сродкаў гарадскога транспарту, у тым ліку электрычнага і аўтаномнага, а таксама для навукова-даследчых, праектных арганізацый і дызайнерскіх бюро. Выпускнікі спецыяльнасці змогуць працаўладкавацца на вядучыя прадпрыемствы ў галіне машынабудавання, сярод якіх ААТ «Мінскі завод колавых цягачоў», Аб'яднаны інстытут машынабудавання Нацыянальнай акадэміі навук Беларусі, ААТ «Мінскі трактарны завод» і іншыя.

Выпускнікі напрамку «Прамысловы дызайн вытворчага абсталявання» будуць запатрабаваныя на прадпрыемствах станкабудавання, прыборабудавання, бытавой тэхнікі, электратэхнічнай і радыёэлектроннай прамысловасці, вылічальнай тэхнікі, транспартнага машынабудавання і лёгкай прамысловасці. Іх чакаюць заняткі па асновах web-дызайну, распрацоўцы кампазіцый у прамысловым дызайне, засваенне спецыялізаваных праграмных прадуктаў для мадэлявання і візуалізацыі.

Пілоты для грамадзянскай авіяцыі

А ў Беларускай дзяржаўнай акадэміі авіяцыі сёлета адбудзецца першы набор на спецыяльнасць «Лётная эксплуатацыя паветраных суднаў грамадзянскай авіяцыі» з прысваеннем выпускнікам кваліфікацыі «Інжынер-пілот».

Гэта новая старонка ў гісторыі навучальнай установы. Пачынаючы з 1974 года тут рыхтавалі авіяцыйны персанал самага рознага профілю: інжынерна-тэхнічных спецыялістаў, якія займаюцца абслугоўваннем паветраных суднаў, авіяцыйных рухавікоў, авіяцыйнага абсталявання, а таксама авіяцыйных дыспетчараў. Не хапала толькі аднаго, але вельмі важнага звяна — у краіне не вялася падрыхтоўка лётнага саставу для грамадзянскай авіяцыі. Цяпер гэты недахоп будзе ліквідаваны.

Але наборы будуць невялікія. Восем чалавек плануюць узяць на бюджэтную форму навучання і столькі ж — на платную. Для таго каб паступіць на новую спецыяльнасць, абітурыенты павінны будуць падаць у прыёмную камісію тры сертыфікаты цэнтралізаванага тэсціравання: па беларускай ці рускай мове (на выбар), матэматыцы і англійскай мове.

Авіяцыя — гэта англамоўная галіна, і нават тэхнічную дакументацыю не дазваляецца перакладаць на рускую мову, таму ў будучых інжынераў-пілотаў павінен быць вельмі добры ўзровень валодання англійскай мовай (іншыя замежныя мовы не падыходзяць).

Акрамя ўступных іспытаў, абітурыенты павінны прайсці яшчэ і прафадбор. Ён уключае медыцынскі агляд ва ўрачэбна-лётнай экспертнай камісіі медыцынскай службы грамадзянскай авіяцыі, а таксама іспыты па фізічнай падрыхтоўцы на базе акадэміі.

Падрыхтоўка будучых пілотаў будзе ўключаць некалькі блокаў. Тэарэтычная падрыхтоўка плануецца на базе акадэміі. А трэнажорная і лётная падрыхтоўкі  будуць весціся на базе авіяцыйных арганізацый, якія маюць адпаведную сертыфікацыю.

Надзея НІКАЛАЕВА

Выбар рэдакцыі

Эканоміка

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Хто выбраў год таму айчынную валюту, аказаўся ў выйгрышы. Куды ўкласці грошы зараз, каб атрымаць выгаду

Знаёмства маладых людзей з першымі грашыма адбываецца дзіўным чынам.

Грамадства

Індыкатар жаночых праблем. Чаму ў дэкальтэ галоўнае не прыгажосць, а здароўе?

Індыкатар жаночых праблем. Чаму ў дэкальтэ галоўнае не прыгажосць, а здароўе?

Часта незразумелы «шарык» можа быць, напрыклад, фібрадэномай.

Грамадства

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Калі дапамога патрэбна экстранна, яе заўсёды змогуць аказаць валанцёры Чырвонага Крыжа

Гучны гул сірэны знянацку застаў пенсіянерку Веру Васільеўну дома.