Праваахоўныя органы гатовы спыніць любыя правакацыі падчас рэферэндуму. Аб гэтым заявіў дзяржаўны сакратар Савета бяспекі Аляксандр Вальфовіч у эфіры тэлеканала СТБ, паведамляе БелТА.
«Мы вынеслі вялікія ўрокі пасля 2020 года. Гэта была развязаная інфармацыйная вайна. Мы тады крыху дапусцілі промах — заплюшчвалі вочы на тэлеграм-каналы, на чаты, у якіх публікаваліся заклікі і фейкі. Некаторыя людзі паверылі ў гэта, выйшлі на вуліцы, спрабавалі нешта даказаць (не зусім разумеючы, што менавіта), а некаторыя проста ішлі ў агульнай масе, як на дэманстрацыі, многім проста задурылі галаву», — сказаў Аляксандр Вальфовіч.
Паводле яго слоў, пасля гэтага былі ўнесены адпаведныя папраўкі ў заканадаўчую базу. «За гэты час каля 300 чатаў прызнаны экстрэмісцкімі, спынена работа каля 100 чатаў, 17 груп асоб, якія працавалі на розных YouTube, інтэрнет-пляцоўках, таксама прызнаны экстрэмісцкімі, — адзначыў дзяржсакратар. — Адны чаты мы закрываем — іншыя з’яўляюцца. На гэта трэба рэагаваць, даносіць да людзей інфармацыю, расказваць праўду. Наш народ бачыць, як працуюць Прэзідэнт, урад, кіраўнікі дзяржорганаў, якія рашэнні яны прымаюць для развіцця краіны, на карысць нашага народа».
Аляксандр Вальфовіч запэўніў, што праваахоўныя органы гатовы спыніць любыя правакацыі падчас рэферэндуму. «Упэўнены, што сёння кіраўнікі разумеюць, як дзейнічаць, што трэба рабіць, як узаемадзейнічаць, каб не дапусціць таго, што было год таму. Таму адказна заяўляю, сілавы блок, ваенная арганізацыя дзяржавы, у якую ўваходзяць усе міністэрствы і ведамствы, гатовы для стрымання нейкіх негатыўных наступстваў у нашай краіне», — падсумаваў дзяржсакратар.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
