Больш ста пяцідзесяці механізмаў і прылад, распрацаваных навучэнцамі і іх педагогамі ва ўстановах прафесійнай адукацыі Гомельскай вобласці, адабраныя для ўдзелу ў рэспубліканскай выставе інавацыйнай і тэхнічнай творчасці.
Вось такі веласіпед з прычэпам дапаможа падарожнічаць з камфортам. Нягледзячы на габарыты транспарт вельмі манеўраны. Рухацца, руляваць, разварочвацца на ім, нават у абмежаванай прасторы, адно задавальненне. Незвычайную мадэль вела-«абгрэйда» прадэманстраваў старшы майстар Гомельскага дзяржаўнага каледжа будаўнікоў Уладзімір Васюта. Увогуле пад яго кіраўніцтвам навучэнцы змайстравалі некалькі важных і карысных прылад.
— Прадстаўляем дзве мадэлі нашых веласіпедаў. Акрамя манеўровага з прычэпам яшчэ лячэбны, прызначаны для аднаўлення пасля хваробы, — тлумачыць Уладзімір Вячаслававіч. — Прадстаўляем таксама шрэдэр для пластыка — своеасаблівы станок для перапрацоўкі другаснай сыравіны. Працуе такім чынам: загружаем пластык у бункер, уключаем падагравальны элемент, рэгулюем тэмпературу і на выхадзе атрымліваем пластыкавы дрот, які можна выкарыстоўваць у самых розных мэтах.
Вынаходкі навучэнцаў Гомельскага дзяржаўнага каледжа будаўнікоў — адны з больш як ста пяцідзесяці работ устаноў прафесійнай адукацыі рэгіёна, што адабраныя для ўдзелу ў рэспубліканскай выставе інавацыйнай і тэхнічнай творчасці. Лепшыя з лепшых экспанатаў можна было ацаніць на выставе-прэзентацыі ў Гомельскім абласным доме навучэнцаў і супрацоўнікаў устаноў прафесійнай адукацыі.
Цікавую распрацоўку прадставіў Гомельскі дзяржаўны машынабудаўнічы каледж. Гэта пошук дзіцяці па мабільным дадатку «Беражы сябе». Дарэчы, навучэнцы каледжа «напісалі» дадатак з нуля.
— Вы можаце на тэлефон дзіцяці ўсталяваць гэты дадатак і адсочваць, дзе знаходзіцца дзіця, — патлумачыў майстар вытворчага навучання ўстановы адукацыі Юрый Ядранцаў. — Можна ўсталяваць небяспечную зону — напрыклад, будаўнічыя аб’екты ці вадаёмы. Калі дзіця да іх набліжаецца, на тэлефон адразу прыходзіць паведамленне.
На выставе свае распрацоўкі прадставілі ўсе ўстановы прафесійнай адукацыі Гомельшчыны. Як распавяла загадчык аддзела тэхнічнай і мастацкай творчасці Гомельскага абласнога дома навучэнцаў і супрацоўнікаў устаноў прафесійнай адукацыі Жана Дзянісава, агляд работ праводзіцца па 24-х намінацыях тэхнічнага і дэкаратыўна-прыкладнога кірункаў.
Усе механізмы, прылады і распрацоўкі, якія сталі прызёрамі абласнога адбору, будуць намінавацца да ўдзелу ў рэспубліканскім адборачным этапе.
Наталля КАПРЫЛЕНКА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.