Стартаваў прыём заявак на Міжнародны дзіцячы конкурс па штучным інтэлекце

Стартаваў прыём заявак на Міжнародны дзіцячы конкурс па штучным інтэлекце AI Challenge, паведамілі БелТА арганізатары.

Інтэлектуальнае спаборніцтва заклікана папулярызаваць тэхналогіі штучнага інтэлекту сярод дзяцей і моладзі, яно дапаможа кожнаму дзіцяці павысіць свае навыкі ў гэтай галіне, вырашаючы тэхналагічныя задачы бізнесу.

Конкурс складаецца з трох этапаў: кваліфікацыйнага, каманднага і фінальнага. Прэтэндэнты будуць спаборнічаць па напрамках: медыцына, крэатыўная індустрыя, эфектыўная вытворчасць, аналіз малюнка і відэа, сельская гаспадарка.

Ужо цяпер удзельнікі да 18 гадоў, у тым ліку з Беларусі, могуць падаць заяўку і трапіць на кваліфікацыйны этап, які працягнецца да 27 верасня ўключна. На гэтым этапе канкурсантам трэба вырашыць індывідуальныя задачы і атрымаць найбольшую колькасць балаў. Таксама яны змогуць прыняць удзел у буткемпах і вывучыць карысныя матэрыялы, якія дапамогуць дамагчыся высокіх вынікаў. Акрамя таго, кожны ўдзельнік зможа прайсці тэставанне, каб вызначыць найбольш прыдатны кірунак для праходжання кваліфікацыйнага этапу. Свой індывідуальны вынік можна будзе палепшыць нават пасля праходжання ў камандны этап.

Усе конкурсныя заданні ўяўляюць сабой рэальныя задачы, якія сёння стаяць перад тэхналагічным бізнесам.

У 2021 годзе ў міжнародным конкурсе для дзяцей па штучным інтэлекце прынялі ўдзел больш за 26 тыс. чалавек, у тым ліку прадстаўнікі такіх краін, як Арменія, Бангладэш, Беларусь, В’етнам, Індыя, Казахстан, Кітай, Нігерыя, Пакістан, Філіпіны.

Прэв’ю; БелТА