За 30 дзён да старту ІІ Гульняў краін СНД прэзентавалі медалі і экіпіроўку

Да старту ІІ Гульняў краін СНД застаўся роўна месяц. Арганізатары форуму і спартсмены адсвяткавалі гэтую сімвалічную дату. Адсвяткавалі, канешне, спартыўным святам. Сёння ў Мінску прайшоў велапрабег з удзелам кіраўніцтва Міністэрства спорту і турызму і беларускіх спартсменаў. Удзельнікі велапрабегу стартавалі ад аб’ектаў, дзе ў жніўні будуць праходзіць спаборніцтвы — ад Палаца мастацкай гімнастыкі, «Чыжоўка-Арэны», стралковага комплексу імя Цімашэнкі і стадыёна «Дынама». Сустрэліся ўсе ў самым цэнтры сталіцы — на пляцоўцы каля Палаца спорта, дзе запусцілі зваротны адлік да пачатку Гульняў. Старт яму далі вядомыя спартсмены: сярэбраныя прызёры Алімпійскіх гульняў Іван Ціхан і Дар’я Навумава, бронзавыя алімпійскія прызёры Настасся Пракапенка і Ванэса Каладзінская.

Вітаючы ўдзельнікаў мерапрыемства міністр спорту і турызму Сяргей Кавальчук нагадаў, што ІІ Гульні краін СНД будуць праходзіць ва ўсіх рэгіёнах краіны, што дасць гасцям магчымасць бліжэй пазнаёміцца з Беларуссю. «З задавальненнем хачу адзначыць, што больш за 20 краін пацвердзілі свой удзел у гэтым мультыспартыўным форуме. Я ўпэўнены, што гэтае мерапрыемства пройдзе на высокім узроўні. Упэўнены, што нашы спартсмены і трэнеры праявяць байцоўскі характар, пакажуць свае найлепшыя вынікі на гэтых спаборніцтвах. Упэўнены, што спартсмены, якія прыедуць да нас на спаборніцтвы атрымаюць задавальненне ад Гульняў. Я хачу пажадаць нам усім яркіх эмоцый, хачу пажадаць цудоўных вынікаў, каб мы сваімі вынікамі падзякавалі нашым балельшчыкам за тое, што яны любяць і падтрымліваюць спорт у дзяржаве, якая шмат укладае ў спорт», — адзначыў міністр.

Па яго словах, на сёння свой удзел пацвердзілі больш за тры тысячы спартсменаў. Але, Сяргей Кавальчук звярнуў увагу, гэтая лічба будзе расці. Канчатковыя лічбы па колькасці краін-удзельніц, па колькасці спартсменаў будзе вядома напрыканцы ліпеня, за два тыдні да старту Гульняў. На сёння тыя прагнозныя паказчыкі, якія сабе ставілі арганізатары ўжо рэалізаваны.

«У арганізатараў, як і ў спартсменаў заўсёды прысутнічае перадстартавае хваляванне. Любое мерапрыемства — гэта вопыт і вялікая адказнасць. У першую чаргу для нас мэта ІІ Гульняў краін СНД — гэта прагляд бліжэйшага рэзерву, наша мэта знайсці таленты, якія праз тры-чатыры гады будуць прадстаўляць нашу краіну на Алімпійскіх гульнях і на сусветных форумах», — расказаў Сяргей Кавальчук. Па яго словах, да правядзення стартаў усё гатовы, тэставыя спаборніцтвы, якія прайшлі ў чэрвені, паказалі некаторыя дробныя недахопы, якія хутка будуць выпраўлены. «Вопыт у нашых спецыялістаў назапашаны вялікі, асабліва шмат досведу мы атрымалі ў 2019 годзе падчас ІІ Еўрапейскіх гульняў. Таму з улікам гэтага мы зможам усё арганізаваць на высокім узроўні», — запэўніў міністр.

Старшыня Мінскага гарадскога выканаўчага камітэта Уладзімір Кухараў падкрэсліў, што Гульні краін СНД стануць добрым штуршком для папулярызацыі спорту сярод моладзі. Для аматараў у сталіцы будуць арганізаваны фан-зоны, падрыхтавана багатая культурная праграма. «Мінск — спартыўная сталіца, у якой жыве шмат прыхільнікаў розных відаў спорту. На сёння Мінск гатовы да правядзення мерапрыемства, уся інфраструктура знаходзіцца ў поўнай баявой гатоўнасці. Я ўпэўнены, што сумеснымі намаганнямі мы правядзем цудоўнае свята для шматлікіх балельшчыкаў», — сказаў Уладзімір Кухараў. Ён выказаў упэўненасць, што да спаборніцтваў ніхто не застанецца раўнадушным. Сам мэр прызнаўся, што хацеў бы наведаць усе спаборніцтвы ў рамках ІІ Гульняў краін СНД.

Першы намеснік Генеральнага сакратара Садружнасці Незалежных дзяржаў Леанід Анфімаў адзначыў, што ў стратэгічных дакументах СНД спорт вызначаны як важнейшы элемент, які дае магчымасць паглыбляць узаемадзеянне, наладжваць дыялог паміж дзяржавамі, умацоўваць дружбу і мір паміж народамі, краін-удзельніц СНД. «Прыняцце рашэння аб правядзенні Гульняў краін СНД стала новым этапам у супрацоўніцтве краін Садружнасці незалежных дзяржаў. Першыя гульні пакінулі незгладжальныя ўражанні ад павагі, сяброўства, узаемаразумення і бескампраміснай барацьбы, якая разгарнулася на спартыўных пляцоўках. Я думаю, што цалкам заканамерна, што эстафета правядзення гэтага спартыўнага свята пераходзіць да Рэспублікі Беларусь, дзе вялікая ўвага ўдзяляецца развіццю віду спорту і фізічнай культуры. Мінск — спартыўная сталіца Садружнасці Незалежных Дзяржаў у гэтым годзе. Я перакананы, што ІІ Гульні краін СНД пакінуць яркае ўражанне ва ўсіх, хто прыедзе ў Беларусь, і стануць візітнай карткай Беларусі як краіны адкрытай, чыстай, гатовай да супрацоўніцтва з усімі краінамі, якія прыходзяць да нас з добрымі намерамі», — адзначыў ён.

У сталічнай ратушы былі прэзентаваны галоўныя элементы Гульняў — медалі. Усяго падчас ІІ Гульняў краін СНД спартсмены разыграюць 1672 медалі. У аснове дызайна — лагатып Гульняў, натхнёны кветкай васілька. Усе пераможцы і прызёры спаборніцтваў акрамя медаля атрымаюць на памяць і талісман Гульняў — Рысіка. Талісман крыху меншага памеру будзе прыносіць удачу кожнаму ўдзельніку Гульняў. Не будзе недахопу і ў сувенірнай прадукцыі. Як расказаў першы намеснік міністра спорту і турызму Аляксандр Дараховіч, канцэрн «Беллегпрам» актыўна працуе над тым, каб брэнд Гульняў захапіў кепкі, майкі, шоперы — рэчы, якія летам карыстаюцца вялікім попытам. Гульні абяцаюць быць і смачным, вядучыя кандытарскія прадпрыемствы краіны таксама прадставяць свае сувеніры. Па словах Аляксандра Дараховіча, першыя сувеніры можна будзе набыць ужо ў гэтую суботу падчас свята Купалле ў Александрыі. Для гасцей краіны таксама распрацавана і карта госця. Сваім уладальнікам яна гарантуе зніжкі для наведвання 500 цікавых мясцін краіны.

Неад’емны элемент кожнай каманды на буйных міжнародных стартах — экіпіроўка. Форму беларускай каманды таксама прадставілі за 30 дзён да старту Гульняў. Распрацоўкай формы займаўся Нацыянальны алімпійскі камітэт Рэспублікі Беларусь, што лагічна, улічваючы яго вопыт у распрацоўцы формы да Алімпійскіх гульняў, Еўрапейскіх гульняў, Юнацкіх алімпійскіх фестываляў і іншых важных спаборніцтваў. Пра гэта расказала выканаўчая абавязкі генеральнага сакратара НАК Беларусі Ксенія Санковіч: «Форма была распрацавана для чатырох катэгорый: афіцыйных спартыўных дэлегацый, для валанцёраў, форма для спецыялістаў спартыўнай медыцыны і нацыянальнага антыдопінгавага агенцтва. За аснову бралася форма Токіа-2020. Мы ўлічылі некаторыя недахопы і пастараліся зрабіць зручную і прыгожую форму. За аснову быў узяты брэндынг ІІ Гульняў краін, які ўдала ўпісаўся на адзенне. Лічым, што наша каманда будзе прадстаўлена годна».

Валерыя СЦЯЦКО

Фота Лізаветы ГОЛАД