У гэты важны і ўрачысты дзень у палітычным жыцці краіны, калі падводзяцца вынікі работы парламента, які заканчвае сваю кадэнцыю, кіраўнік дзяржавы па традыцыі дае ацэнку дзейнасці парламентарыяў адыходзячага склікання. Аляксандр Лукашэнка адразу падкрэсліў: ацэнка працы дэпутатаў і сенатараў дастаткова высокая. Акрамя прафесіяналізму, парламентарыі прадэманстравалі надзейнасць і адданасць беларускаму народу. А гэта, па меркаванні Прэзідэнта, дарагога варта. Ëн звярнуў увагу, што дэпутаты Палаты прадстаўнікоў і члены Савета Рэспублікі сёмага склікання адбыліся як палітыкі і на справе даказалі, што вартыя высокага звання народных выбраннікаў.
За перыяд ажыццяўлення паўнамоцтваў Палаты прадстаўнікоў сёмага склікання прынята 215 законапраектаў у першым чытанні, 364 — у другім, у тым ліку 146 аб ратыфікацыі міжнародных дагавораў. 11 праектаў законаў былі вынесены на разгляд асабіста дэпутатамі, адзін законапраект ініцыяваны сенатарамі. Па стане на 4 сакавіка бягучага года, Саветам Рэспублікі сёмага склікання разгледжана і адобрана 359 законапраектаў. За перыяд сваіх паўнамоцтваў парламентарыі садзейнічалі міжнароднай дзейнасці, узаемадзейнічалі з органамі мясцовага самакіравання, прымалі актыўны ўдзел у грамадскіх ініцыятывах, падстаўлялі плячо насельніцтву ў вырашэнні іх пытанняў і праблем. Асаблівая заслуга дэпутатаў і сенатараў — у правядзенні і рэалізацыі канстытуцыйнай рэформы.
Звяртаючыся да парламентарыяў і іншых прысутных у Авальнай зале, дзе адбылася сустрэча, Прэзідэнт падзяліўся, што, заходзячы сюды, ён падумаў аб тым, як хутка бяжыць час. «Але важна тое, што мы пакінем пасля сябе, — адзначыў ён. — Цяперашняму парламенту, органам улады ёсць што сказаць і ёсць што пакінуць у гэтым перыядзе для нашага народа, нашых дзяцей, для тых, хто прыйдзе следам за намі».
Кажучы аб дзейнасці парламентарыяў сёмага склікання, кіраўнік дзяржавы адзначыў, што ім прыйшлося працаваць у асаблівы перыяд сучаснай Беларусі, калі час як ніколі выпрабоўваў беларускі народ на трываласць. «Успомніце: пандэмія, якая ў імгненне вока змяніла звыклыя ўмовы жыцця і вядзення эканомікі, узмоцненая каронапсіхозам, — канкрэтызаваў ён. — Палітычныя падзеі 2020 года, калі дамарослыя экстрэмісты з дапамогай заходніх замежных спонсараў замахнуліся на асновы беларускай дзяржаўнасці шляхам каляровай рэвалюцыі і мецяжу. У тыя няпростыя дні большасць парламентарыяў адчулі на сабе жахлівы псіхалагічны ціск і не толькі з боку радыкалаў рознага кшталту. Дэпутатаў, сенатараў, іх родных і блізкіх спрабавалі запалохаць, а часам і наўпрост пагражалі ім фізічнай расправай. Разлік падбухторшчыкаў перавароту быў ясны — пасеяць смуту і раскол у дзяржаўных органах. Але іх задумы, як вядома, поўнасцю праваліліся».
Аляксандр Лукашэнка адзначыў, што адметнай рысай беларускай мадэлі дзяржаўнасці заўсёды быў салідарны стыль узаемадзеяння ўсіх галін улады і дзяржаўных органаў. «Адсутнасць рознагалоссяў, дробязнай барацьбы палітычных груповак і настроенасць на канструктыўнае супрацоўніцтва дапамагалі нам адстойваць нацыянальныя інтарэсы і дасягаць неабходных вынікаў», —падкрэсліў беларускі лідар і дадаў, што менавіта такога стылю працы прытрымліваліся парламентарыі. Па яго словах, абедзве палаты дзейнічалі ўзгоднена, у цесным кантакце з урадам, іншымі дзяржаўнымі органамі і заўсёды выбудоўвалі работу зыходзячы з інтарэсаў беларускага народа. Прэзідэнт адзначыў, што людзі гэта бачылі, зрабілі адпаведныя высновы з тых падзей, якія адбываліся і ў нашай краіне, і ва ўсім свеце. Ëн падкрэсліў, што беларускі народ разумна ацаніў сітуацыю, у чарговы раз пацвердзіў сваю мудрасць і імкненне быць гаспадаром на роднай зямлі.
Звярнуў кіраўнік дзяржавы ўвагу і на яшчэ адну праблему апошніх гадоў — геапалітычны разлом. «Маштабны, сістэмны крызіс, сімптомы якога відавочныя нам усім, не толькі, дарэчы, у ваенна-палітычнай, але і ў эканамічнай, гуманітарнай сферах, — удакладніў Прэзідэнт. — Нормы і прынцыпы міжнароднага права сталі падмяняцца інструментамі палітычнага і эканамічнага ціску. Месца дыпламатыі ўсё больш займае палітыка санкцый. Прытым санкцый на знішчэнне».
Кіраўнік дзяржавы акцэнтаваў увагу, што на фоне таго, што адбываецца сёння ў многіх нашых суседзяў, Беларусь жыве адносна нармальным, паўнацэнным жыццём. «Мы значна ўмацавалі свае Узброеныя Сілы (нікуды не падзенешся), эканоміка дэманструе рост, людзі працуюць і атрымліваюць заробак, — канкрэтызаваў ён. — На вуліцах гарадоў — спакой і парадак. Дзяржава выконвае свае сацыяльныя абавязацельствы. І самае галоўнае — нашы грамадзяне адчуваюць сябе ў бяспецы, не баяцца за жыцці родных і блізкіх. Гэта нятанна каштуе».
Дастойны ўклад у агульную справу, па меркаванні беларускага лідара, унеслі і парламентарыі. Аднак, як падкрэсліў Аляксандр Лукашэнка, справа, вядома, не ў колькасці прынятых парламентарыямі заканадаўчых актаў, а ў стварэнні аптымальных прававых умоў мірнага, дынамічнага развіцця ўсіх сфер жыцця дзяржавы і нашага грамадства.
«У тых рэаліях, у якіх ажыццяўлялася дзейнасць Нацыянальнага сходу сёмага склікання, ключавая мэта заканатворчасці складалася ў тым, каб замацаваць дасягнутую якасць суверэнітэту беларускай дзяржавы, — канстатаваў кіраўнік дзяржавы. — Новым этапам дзяржаўна-прававога будаўніцтва стала ўнясенне змяненняў і дапаўненняў у Асноўны Закон краіны. Контуры абноўленай Канстытуцыі выявіліся ў ходзе маштабнага грамадскага дыялогу, кульмінацыяй якога стаў VⅠ Усебеларускі народны сход. Дэпутаты Палаты прадстаўнікоў і члены Савета Рэспублікі ўваходзілі ў склад Канстытуцыйнай камісіі, прымалі актыўны ўдзел у выпрацоўцы прапаноў маштабнай тлумачальнай рабоце з насельніцтвам».
Па словах Прэзідэнта, прагаласаваўшы на рэферэндуме за прапанаваныя змяненні, грамадзяне замацавалі ў якасці мадэлі развіцця Беларусі моцную дзяржаву, заснаваную на нацыянальных традыцыях народаўладдзя, ідэалах міру, гуманізму і сацыяльнай справядлівасці. Падтрымалі і нормы, накіраваныя на захаванне традыцыйных каштоўнасцяў, памяці аб Вялікай Айчыннай вайне, узмацненне патрыятычнага складніка ў выхаванні маладога пакалення.
«Такім чынам, абноўленая Канстытуцыя ў літаральным сэнсе стваралася народам для сябе — для народа, — звярнуў увагу кіраўнік дзяржавы. — Гэта самае галоўнае. Мы бачым, што людзі вераць у Беларусь, звязваюць з ёй свой лёс, лёс сваіх дзяцей і ўнукаў. І зараз я кажу не толькі пра нашых грамадзян. Я маю на ўвазе і замежнікаў, якія абралі Беларусь у якасці другой Радзімы. І такіх становіцца ўсё больш».
Аляксандр Лукашэнка паведаміў, што прынятыя канстытуцыйныя навацыі ў частцы пераразмеркавання паўнамоцтваў паміж Прэзідэнтам, парламентам, урадам, мясцовымі органамі кіравання і самакіравання накіраваны на тое, каб усе галіны ўлады працавалі эфектыўна, у поўным аб’ёме выконвалі свае функцыі, самастойна прымалі рашэнні і, што вельмі важна, адказвалі за іх рэалізацыю. Гэта, па меркаванні беларускага лідара, залог далейшага паспяховага развіцця нашай краіны.
Ëн нагадаў, што прыняцце паправак у Канстытуцыю запатрабавала прывядзення ў адпаведнасць з ёй каля 90 законаў. «Гэтая адказная, карпатлівая работа працягвалася каля двух гадоў, — дадаў Прэзідэнт. — Законы мы прывялі ў адпаведнасць, ураўнаважылі законы і ўказы. Але не трэба забывацца, што ёсць яшчэ ведамасныя акты дзяржаўных органаў. Думаю, што ўрад арганізуе работу па прывядзенні іх у адпаведнасць з вышэйстаячымі нарматыўна-прававымі актамі. Гэтую задачу ўраду трэба вырашыць».
Кіраўнік дзяржавы дадаў, што парламентарыямі адкарэкціраваны асноўныя законы: аб Прэзідэнце, Нацыянальным сходзе, урадзе, канстытуцыйным судаводстве. Прыняты прынцыпова новы Кодэкс аб грамадзянскім судаводстве. Абноўлены Выбарчы кодэкс, Кодэкс аб судаўладкаванні і статусе суддзяў, шэраг іншых не менш важных дакументаў.
Асабліва увагі, на думку беларускага лідара, заслугоўвае Закон «Аб Усебеларускім народным сходзе». З фарміраваннем гэтага канстытуцыйнага органа, па словах Прэзідэнта, краіна, па сутнасці, уступіць у новы гістарычны этап свайго развіцця.
Асобна кіраўнік дзяржавы спыніўся на прынятым новым Законе — «Аб асновах грамадзянскай супольнасці». Яго палажэнні накіраваны на больш поўнае раскрыццё патэнцыялу канструктыўнай грамадзянскай актыўнасці. Адкарэктаваныя законы «Аб палітычных партыях» і «Аб грамадскіх аб’яднаннях» дапускаюць дзейнасць толькі тых палітычных арганізацый, якія няўхільна прытрымліваюцца канстытуцыйных патрабаванняў.
«Немалаважнай часткай нашай работы стала прыняцце заканадаўчых актаў і рашэнняў, накіраваных на ўмацаванне эканомікі, — адзначыў Аляксандр Лукашэнка. — Парламентарыі ў цесным узаемадзеянні з профільнымі дзяржаўнымі органамі, міністэрствамі, урадам аператыўна стваралі неабходныя прававыя ўмовы для забеспячэння ўстойлівага эканамічнага росту. Прыняты шэраг законаў, нормы якіх арыентаваны на абарону нацыянальных інтарэсаў ва ўмовах санкцыйнага ціску. Гэта дазволіла забяспечыць рытмічную работу прадпрыемстваў, захаваць працоўныя калектывы і ў цэлым садзейнічала ўмацаванню эканамічнай бяспекі краіны».
Сярод важных законаў у сферы рэгулявання эканамічных адносін — новая рэдакцыя Кодэкса аб зямлі, Кодэкс аб архітэктурнай, горадабудаўнічай і будаўнічай дзейнасці. Сур’ёзнай карэкціроўцы падвергнулася гаспадарчае заканадаўства. Прыняты законы «Аб аб’яднаннях наймальнікаў», «Аб ліцэнзаванні», «Аб страхавой дзейнасці», «Аб інвестыцыях». Па словах кіраўніка дзяржавы, гэтыя іншыя заканадаўчыя акты дазволяць значна ўмацаваць нацыянальную эканоміку.
Прэзідэнт падкрэсліў, што брэндам беларускай дзяржавы заўсёды была моцная сацыяльная палітыка. За апошнія гады прыняты шэраг актуальных рашэнняў у сферах адукацыі, аховы здароўя, сацыяльнай абароны, культуры, маладзёжнай палітыкі. «Ва ўмовах гібрыднай вайны, развязанай супраць нашай краіны, большасць прымаемых законаў так ці інакш спалучаны з забеспячэннем нацыянальнай бяспекі, — сказаў кіраўнік дзяржавы. — У адказ на нагнятанне ваеннай пагрозы вакол Беларусі вамі ў заканадаўства ўнесены змяненні, закліканыя ўмацаваць абаронны патэнцыял Беларусі. Прыняты Закон «Аб народным апалчэнні». Створаны неабходныя прававыя перадумовы для развіцця ваенна-тэхнічнага супрацоўніцтва ў рамках Саюзнай дзяржавы, Арганізацыі Дагавора аб калектыўнай бяспецы.
Прэзідэнт падкрэсліў, што асобныя законапраекты — гэта і ініцыятывы парламентарыяў. «Прыняты жорсткія папераджальныя меры па барацьбе з тэрарызмам, экстрэмізмам, нелегальнай міграцыяй, наркатрафікам, — канкрэтызаваў ён. — Шэраг сур’ёзных рашэнняў накіраваны на забеспячэнне інфармацыйнай і кібербяспекі, абарону асабістых даных. У кантэксце ўмацавання нацыянальнай бяспекі трэба разглядаць і праведзеную парламентарыямі вялікую работу па адстойванні гістарычнай праўды. Ваша дзейнасць прыйшлася на той перыяд сучаснай гісторыі, калі асабліва востра выявіўся запыт на фарміраванне самаідэнтычнасці, захаванне традыцыйных каштоўнасцяў і праўды аб гістарычным мінулым нашай Беларусі».
Найперш — аб падзеях Вялікай Айчыннай вайны. «Як ніколі мы выразна ўсвядомілі, што мала перамогу атрымаць: Перамогу, а разам з ёй і права на самастойнае вызначэнне свайго лёсу трэба ўмець адстаяць, — звярнуў увагу беларускі лідар. — У тым ліку і на заканадаўчым узроўні. Таму прыняты новыя знакавыя законы, у тым ліку „Аб недапушчэнні рэабілітацыі нацызму“, які комплексна процідзейнічае гэтай злачыннай з’яве. Абсалютна новае слова ў айчынным заканадаўстве — Закон „Аб генацыдзе беларускага народа“. Гэтая ініцыятыва стала адказам на спробы прымусіць нас забыць сваю гісторыю, парушыць сувязь пакаленняў і падарваць грамадства знутры. Узмоцнена адказнасць за імкненне сцерці гістарычную памяць, навязаць беларусам чужыя каштоўнасці, здрадзіць тым, хто загінуў у імя мірнага і спакойнага жыцця цяперашніх пакаленняў».
Кажучы аб сацыяльнай рабоце парламентарыяў, Прэзідэнт адзначыў, што арыенцірам у рабоце парламента з насельніцтвам стаў падыход, пры якім дзяржава не проста бярэ на сябе вырашэнне ўсіх праблем чалавека, а стварае такія ўмовы, каб чалавек самастойна мог іх вырашаць. Кіраўнік дзяржавы лічыць гэта найбольш правільным. Ëн падкрэсліў, што дапамога сацыяльна ўразлівым катэгорыям насельніцтва ёсць і будзе адным з прыярытэтаў нашай палітыкі, а Беларусь нязменна застанецца сацыяльнай дзяржавай.
Аляксандр Лукашэнка звярнуў увагу на вялікую работу, праведзеную парламентарыямі па кропкавай падтрымцы найбольш уразлівых катэгорый нашых грамадзян, якія звярталіся па дапамогу: шматдзетных сем’яў, адзінокіх старых, інвалідаў, сірот. «Ведаю, што вы, па сутнасці, у штодзённым рэжыме ўдзельнічалі ў вырашэнні хвалюючых грамадзян пытанняў, — заўважыў ён. — Тысячы асабістых прыёмаў, прамых тэлефонных ліній, сустрэч з працоўнымі калектывамі — усё гэта ў сукупнасці давала вам магчымасць адчуваць пульс грамадства і быць з людзьмі разам». Кіраўнік дзяржавы выказаў спадзяванне, што закладзеныя парламентарыямі добрыя традыцыі ўзаемадзеяння з насельніцтвам падхопіць і новы састаў парламента, які прыступае да работы 22 сакавіка.
Па словах Аляксандра Лукашэнкі, многія звароты грамадзян, якія паступалі, з’яўляліся прадметам абмеркавання пры падрыхтоўцы праектаў законаў і іншых нарматыўных прававых актаў. Ëн адзначыў, што падыходы, якія ініцыююцца і практыкуюцца парламентам, сёння паспяхова выкарыстоўваюцца дзяржаўнымі органамі кіравання і самакіравання, спрыяюць замацаванню асноўных прынцыпаў работы з насельніцтвам і фармираванню сучасных айчынных стандартаў у дадзенай галіне.
«Добра сябе праявіў такі інстытут узаемадзеяння з людзьмі, як грамадскае абмеркаванне законапраектаў, — сказаў беларускі лідар. — Гэта дало магчымасць наладзіць зваротную сувязь з насельніцтвам, улічыць пры падрыхтоўцы рашэнняў разумныя прапановы грамадзян».
Асаблівая ўвага парламентарыямі ўдзялялася ўзаемадзеянню з моладдзю. Прэзідэнт перакананы: дэпутаты, сенатары павінны сустракацца з маладымі людзьмі і расказваць аб захаванні гістарычнай памяці, рэалізацыі дзяржаўнай маладзёжнай палітыкі. Таксама добрым прыкладам работы з падрастаючым пакаленнем, па яго словах, з’яўляецца стварэнне пры Нацыянальным сходзе Маладзёжнага савета. «Хлопцы і дзяўчаты бачылі вашу работу ў парламенце, — нагадаў Аляксандр Лукашэнка. — Вы на сваім прыкладзе вучылі іх добрасумленнаму выкананню абавязкаў».
У ліку прыярытэтных задач, якія стаялі перад парламентарыямі сёмага склікання, нагадаў кіраўнік дзяржавы, — фарміраванне эфектыўнай рэгіянальнай палітыкі і ўзмацненне ролі органаў мясцовага кіравання, самакіравання ў забеспячэнні сацыяльна-эканамічнага развіцця рэгіёнаў. Прэзідэнт нагадаў, што гэта адзін з ключавых напрамкаў, вызначаных VⅠ Усебеларускім народным сходам.
«Многія разгледжаныя вамі пытанні знаходзіліся на стыку эканомікі, сацыяльнай сферы і рэгіянальнай палітыкі, — канстатаваў Аляксандр Лукашэнка. — Гэтым непасрэдна займаўся Савет па ўзаемадзеянні органаў мясцовага кіравання і самакіравання пры Савеце Рэспублікі. Прынятыя па выніках яго пасяджэнняў рэкамендацыі спрашчаюць вырашэнне надзённых праблем, надаюць імпульс развіццю ініцыятывы, даюць мясцовым органам улады дадатковыя інструменты ў рабоце з насельніцтвам».
Прэзідэнт скіраваў прысутных на тое, што сёння неабходна аператыўна і рашуча рэагаваць на рэзанансныя праблемы, якія ўзнімаюцца на месцах. «Трэба апярэджваць узрослы сацыяльны запыт да адкрытасці ўлады і ступені ўцягнутасці грамадзян у прыняцце рашэнняў, валодаць інфармацыяй аб стане спраў у рэгіёнах, своечасова выяўляць вузкія месцы і выпрацоўваць канкрэтныя механізмы вырашэння існуючых праблем», — арыентаваў беларускі лідар.
Кажучы аб міжнароднай дзейнасці парламента, Аляксандр Лукашэнка адзначыў, што ў рамках рэалізацыі знешнепалітычнага курсу дзейнасць парламентарыяў была накіравана на адстойванне нацыянальных інтарэсаў, прасоўванне мірнага, аб’яднальнага парадку, умацаванне іміджу Беларусі як надзейнай і, самае галоўнае, прадказальнай дзяржавы. «Нягледзячы на ўсе намаганні калектыўнага Захаду, Беларусь не ўдалося ізаляваць на міжнароднай арэне, — падкрэсліў Аляксандр Лукашэнка. — Больш за тое, міжнародныя пазіцыі краіны нават умацаваліся. Адно з пацверджанняў таму — выбранне беларускіх дэпутатаў у склад кіруючых органаў парламенцкага вымярэння Арганізацыі Аб’яднаных Нацый — Міжпарламенцкага саюза».
Кіраўнік дзяржавы звярнуў увагу на вядзенне актыўнага дыялогу паміж заканадаўчымі органамі Беларусі і Расіі. На думку Прэзідэнта, значным укладам у вырашэнне эканамічных задач стала арганізацыя штогадовых форумаў рэгіёнаў Беларусі і Расіі, якія праходзяць пад эгідай парламентаў нашых краін. Падчас форумаў, якія адбыліся за апошнія дзесяць гадоў, у цэлым заключана амаль 600 пагадненняў аб супрацоўніцтве і камерцыйных кантрактаў на суму амаль 6,5 мільярда долараў.
Традыцыйна канструктыўнае партнёрства ажыццяўлялася ў рамках Міжпарламенцкай Асамблеі дзяржаў — удзельніц СНД і Парламенцкай Асамблеі АДКБ. Па запрашэнні Нацыянальнага сходу ў маі 2023 года ў Мінску адбылося выязное пасяджэнне Савета Парламенцкай Асамблеі АДКБ. «Нарошчваліся намаганні па развіццю кантактаў з парламенцкімі структурамі краін, якія праводзяць незалежную знешнюю палітыку і паважаюць права іншых народаў на самастойны шлях развіцця, — дадаў кіраўнік дзяржавы. — Прапановы аб стварэнні парламенцкіх вымярэнняў Шанхайскай арганізацыі супрацоўнцтва і БРІКС своечасовыя і, я думаю, перспектыўныя. Паказальна і тое, што павысіўся ўзровень супрацоўніцтва з парламентам Кітая — да Міжпарламенцкага камітэта высокага ўзроўню».
Прэзідэнт падкрэсліў, што ў дзяржавах, з якімі сябруе Беларусь, жыве большасць насельніцтва планеты. «Іх эканомікі складаюць значную частку сусветнага валавага ўнутранага прадукта, — удакладніў беларускі лідар. — Тут вялізныя рынкі для збыту нашых прадукцыі і тэхналогій».
Аляксандр Лукашэнка нагадаў, што ўпершыню ў парламенце сфарміравана дэлегацыя для работы ў новай міжнароднай структуры — Парламенцкай сеткі Руху недалучэння, створанай у 2021 годзе. Пры гэтым, па яго словах, беларускія парламентарыі працягваюць актыўна адстойваць нацыянальныя інтарэсы ў Парламенцкай асамблеі АБСЕ, выкарыстоўваючы любыя фармальныя і нефармальныя нагоды, каб данесці да грамадзян краін Захаду праўду аб Беларусі. Па ініцыятыве дэпутатаў сёмага склікання ў Мінску адбыліся нефармальныя сустрэчы з прадстаўнікамі альтэрнатыўных палітычных сіл Германіі, Італіі, Польшчы, Партугаліі.
«Да наступнага складу парламента трэба толькі захаваць і прымножыць вашы напрацоўкі па развіццю міжнародных сувязяў», — арыентаваў беларускі лідар.
Важны фактар паспяховай работы парламента — пераемнасць у рашэнні задач парламентарыямі новага склікання. Аляксандр Лукашэнка нагадаў, што сярод выбраных дэпутатаў — 70 членаў чатырох палітычных партый. «Для іх гэта магчымасць на якасна новым узроўні раскрыць свой патэнцыял, пры гэтым у Парламенце павінны канструктыўна ўзаемадзейнічаць прадстаўнікі ўсіх палітычных сіл», — паставіў задачу кіраўнік дзяржавы.
Прынцыпова, па яго словах і тое, што ёсць каму забяспечыць пераемнасць і перадаць назапашаны заканадаўчы і палітычны досвед: у новае скліканне ўвайшлі 20 дэпутатаў цяперашняга склікання. «Вельмі важна, каб выбраныя парламентарыі былі актыўнымі, каб іх голас стаў аўтарытэтным, — лічыць Прэзідэнт. — Каб за парламенцкай трыбунай, у СМІ, за межамі краіны яны годна прадстаўлялі Беларусь, давалі жорсткі адпор нашым апанентам і праціўнікам».
Зноў выбраныя парламентарыі і не толькі будуць працаваць у перыяд найважнейшай грамадска-палітычнай кампаніі — выбараў Прэзідэнта ў 2025 годзе. «Ужо сёння відавочна, у гэты няпросты час нас па-ранейшаму будуць выпрабоўваць, — папярэдзіў Аляксандр Лукашэнка. — І важна разумець, што на народных выбраннікаў кладзецца асаблівая адказнасць за кансалідацыю грамадства і падтрыманне грамадзянскага міру і згоды».
Па словах кіраўніка дзяржавы, парламентарыі, паўнамоцтвы якіх завяршаюцца, таксама не застануцца ў баку ад агульнай справы. «Абсалютна ўпэўнены, што былых дэпутатаў і сенатараў не бывае, — падкрэсліў Прэзідэнт. — Гэта відавочная, няўхільная ісціна. Усе вы прайшлі добрую школу, працуючы тут, у Нацыянальным сходзе. Вашы вопыт, веды, гатоўнасць беззапаветна служыць інтарэсам Радзімы абавязкова будуць запатрабаваны дзяржавай. Акрамя таго, у сваіх добрых пачынаннях вы заўсёды знойдзеце маю падтрымку».
У завяршэнні сустрэчы кіраўнік дзяржавы ўручыў дэпутатам Палаты прадстаўнікоў і членам Савета Рэспублікі дзяржаўныя ўзнагароды. Адпаведны ўказ аб узнагароджанні быў падпісаны 18 сакавіка.
Ордэна Айчыны I ступені ўдастоены Старшыня Палаты прадстаўнікоў Уладзімір Андрэйчанка. Намеснік старшыні Пастаяннай камісіі Палаты прадстаўнікоў па нацыянальнай бяспецы Аляксандр Маркевіч узнагароджаны ордэнам Пашаны.
Сярод узнагароджаных медалём «За працоўныя заслугі» — намеснік старшыні Пастаяннай камісіі Палаты прадстаўнікоў па жыллёвай палітыцы і будаўніцтве Аксана Гайдук, член Пастаяннай камісіі Палаты прадстаўнікоў па пытаннях экалогіі, прыродакарыстання і чарнобыльскай катастрофы Тамара Далгашэй, намеснік старшыні Пастаяннай камісіі Савета Рэспублікі па рэгіянальнай палітыцы і мясцовым самакіраванні, дырэктар гімназіі № 13 Мінска Марына Ільіна, намеснік старшыні Пастаяннай камісіі па адукацыі, культуры і навуцы Палаты прадстаўнікоў Алена Каляснёва.
Медаля «За працоўныя заслугі» таксама ўдастоены старшыня Пастаяннай камісіі Палаты прадстаўнікоў па прамысловасці, паліўна-энергетычным комплексе, транспарце і сувязі Ігар Камароўскі, старшыня Пастаяннай камісіі Палаты прадстаўнікоў па працы і сацыяльных пытаннях Людміла Канановіч, намеснік старшыні Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Валянціна Ражанец, старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў і старшыня Пастаяннай камісіі Савета Рэспублікі па эканоміцы, бюджэце і фінансах Таццяна Рунец.
Намеснік старшыні Пастаяннай камісіі Палаты прадстаўнікоў па правах чалавека, нацыянальных адносінах і сродках масавай інфармацыі Лілія Ананіч, старшыня Пастаяннай камісіі Палаты прадстаўнікоў па пытаннях экалогіі, прыродакарыстання і чарнобыльскай катастрофы Мікалай Васількоў і старшыня Пастаяннай камісіі Палаты прадстаўнікоў па бюджэце і фінансах Людміла Ніжэвіч узнагароджаны медалём «За бездакорную службу» III ступені.
Указам таксама прысвоены ганаровыя званні Рэспублікі Беларусь. Старшыня Пастаяннай камісіі Палаты прадстаўнікоў па адукацыі, культуры і навуцы Ігар Марзалюк удастоены ганаровага звання «Заслужаны работнік адукацыі Рэспублікі Беларусь». Старшыні Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Людміле Макарынай-Кібак прысвоена ганаровае званне «Заслужаны ўрач Рэспублікі Беларусь», а старшыні Пастаяннай камісіі Савета Рэспублікі па рэгіянальнай палітыцы і мясцовым самакіраванні Міхаілу Русаму — ганаровае званне «Заслужаны работнік сельскай гаспадаркі Рэспублікі Беларусь».
Дэпутаты Палаты прадстаўнікоў і члены Савета Рэспублікі, узнагароджаныя дзяржаўнымі ўзнагародамі, падзяліліся сваімі думкамі з журналістамі.
Старшыня Пастаяннай камісіі Савета Рэспублікі па міжнародных справах і нацыянальнай бяспецы Сяргей Рачкоў, адзначыў, што ў сваёй рабоце парламентарыі заўсёды арыентаваліся на кіраўніка дзяржавы і выконвалі задачы, якія перад імі ставіліся Прэзідэнтам і народам. «Ганаруся тым, што мая праца адзначана Прэзідэнтам і Саветам Рэспублікі, — падзяліўся сенатар. — Гэта абавязвае не спыняцца, рабіць усё, каб апраўдаць тую высокую ацэнку, якую дала мне дзяржава».
Кажучы аб сёмым скліканні, парламентарый заўважыў, што яно асаблівая. «Гэта не значыць, што пятае ці шостае і ўсе да іх працавалі горш: у іх быў свой палітычны момант у развіцці Рэспублікі Беларусь, — патлумачыў ён. — Нам выпала працаваць у пандэмію COVID-19, у няпросты час прэзідэнцкіх выбараў. Вынікі работы ёсць, і яны адлюстраваны перш за ўсё ў заканатворчасці. У больш за 360 законах, сярод якіх абсалютна ёсць новыя. Гэта сур’ёзная праца. Упэўнены, што яны дапамогуць зрабіць нашае жыццё больш дасканалым. Але і задачы стаяць амбіцыйныя. Час геапалітычнай турбулентнасці не завяршаецца. Таму нас чакае перыяд, калі трэба будзе працягваць барацьбу за сваю незалежную дзяржаву, адстойваць яе і ісці сваім шляхам. Упэўнены, што новы склад Палаты прадстаўнікоў гатовы да гэтай сур’ёзнай работы».
Як нагадала старшыня Пастаяннай камісіі Палаты прадстаўнікоў па працы і сацыяльных пытаннях Людміла Качановіч, асноўная задача ў сферы сацыяльнай палітыкі, вызначаная кіраўніком дзяржавы, — стварыць умовы для тых, хто можа працаваць, і дапамагчы слабым. «Гэтага прынцыпу ў сваёй рабоце прытрымліваліся парламентарыі, выконваючы пастаўленыя Прэзідэнтам задачы, выслухоўваючы праблемы і прапановы грамадзян, — канкрэтызавала дэпутат. — Работа парламентарыя, безумоўна, вельмі цікавая, сур’ёзная і адказная. З’яўляючыся дэпутатам Палаты прадстаўнікоў Нацыянальнага сходу шостага і сёмага скліканняў, заўсёды старалася надаваць увагу сацыяльным пытанням, таму што нацыянальнае заканадаўства, якім мы займаліся ў рамках работы камісіі па працы і сацыяльных пытаннях, накіравана на людзей і ў першую чаргу на ўразлівыя катэгорыі насельніцтва: інвалідаў, ветэранаў, людзей сталага веку. За гэтыя гады ўдалося назапасіць сур’ёзны вопыт, які планую прымяніць у далейшым».
Людміла Канановіч падзялілася: атрымаць дзяржаўную ўзнагароду з рук кіраўніка дзяржавы — дарагога варта. Гэтую падзею яна запомніць на ўсё жыццё. «Такая высокая ўзнагарода — гэта і ацэнка працы за ўсе за гады, і задачы на будучыню, — заўважыла дэпутат. — Узнагарода такога ўзроўню сведчыць аб тым, што трэба і далей працаваць на "выдатна", рухацца наперад, служыць Беларусі і дапамагаць людзям».
Старшыня Пастаяннай камісіі Палаты прадстаўнікоў па адукацыі, культуры і навуцы Ігар МАРЗАЛЮК удзячны кіраўніку дзяржавы за такую высокую ацэнку яго сціплай працы. Дэпутат расцэньвае гэтую ўзнагароду як адзнаку дзейнасці людзей, з кім ён працаваў: настаўнікаў, вучняў, калег.
Кажучы аб сваёй працы ў складзе сёмага склікання парламента, Ігар Марзалюк падкрэсліў, што за чатыры гады зроблена вельмі шмат. «Я ніколі не абмяжоўваўся толькі адным полем дзейнасці, — удакладніў ён. — З аднаго боку, Кодэкс аб адукацыі, Кодэкс аб культуры, з іншага — перафарматаванне сацыяльна-гуманітарных дысцыплін. Дзякуючы прынцыповай пазіцыі Ігара Карпенкі, які на той час быў міністрам адукацыі, мы зрабілі ўсё магчымае і немагчымае, каб у вышэйшых навучальных установах выкладалі гісторыю беларускай дзяржаўнасці. Вельмі важна, што па гэтым па гэтым падручніку будуць вучыцца і ў сярэдне-спецыяльных установах. У той колькасці хлусні, падману і велізарнай колькасці паўпраўды і фальсіфікацый, неабходна было пэўныя рэчы рабіць і на ніве асветніцтва: як у студэнцкай, так і любой іншай аўдыторыі. Яшчэ адзін кірунак дзейнасці — папулярызацыя нашых традыцый».
Старшыня Пастаяннай камісіі Савета Рэспублікі па эканоміцы, бюджэце і фінансах Таццяна Рунец упэўнена: дзе б ні знаходзіліся грамадзяне нашай краіны, у якой арганізацыі б ні працавалі, яны ўсе павінны працаваць на карысць краіны. «У сваім выступленні Аляксандр Лукашэнка ахапіў усе сферы работы Парламента: гэта ўзаемадзеянне з насельніцтвам, заканатворчасць, міжнародная дзейнасць, — канстатавала сенатар. — Ён ацаніў нашу работу, сказаў, што мы зрабілі шмат для краіны ў гэты няпросты перыяд. Безумоўна, калі слухаеш гэта, ганарышся, што жывеш у такой вялікай краіне, калі Прэзідэнт дзякуе парламентарыям за зробленае».
Па меркаванні Таццяны Рунец, галоўным вынікам дзейнасці Пастаяннай камісіі па эканоміцы, бюджэце і фінансах стаў Кодэкс аб архітэктурнай і горадабудаўнічай дзейнасці, аб якім казаў і кіраўнік дзяржавы. «Над гэтым дакументам мы працавалі вельмі доўга, і гэта сапраўды важны дакумент для рэгіёнаў, — падкрэсліла яна. — Дзесьці спрашчаюцца моманты ў сферы будаўніцтва, дзесьці нормы прыводзяцца ў адпаведнасць. Прэзідэнт заўсёды вялікую ўвагу ўдзяляе развіццю рэгіёнаў. І гэта вельмі важна, бо гэта і заработная плата, і працоўныя месцы. Калі мы будзем ствараць добрыя ўмовы, моладзь будзе заставацца ў рэгіёнах. І найперш, будаваць жыллё. Тады і дзеці будуць нараджацца, і сем’і будуць стварацца».
Парламентарый звярнула ўвагу на тое, што Пастаяннай камісіяй было зроблена шмат для таго, каб абараніць эканоміку ад наступстваў санкцый. «Гэта былі няпростыя законы і няпростыя рашэнні, але ў цэлым у нас усё атрымалася, — адзначыла сенатар. — Заканадаўчая аснова для супрацьдзеяння санкцыям закладзена».
Як звярнула ўвагу старшыня Пастаяннай камісіі Палаты прадстаўнікоў па ахове здароўя, фізічнай культуры, сямейнай і маладзёжнай палітыцы Людміла Макарына-Кібак, за час работы ў парламенце дэпутатамі сёмага склікання была праведзена вялікая законапраектная дзейнасць. «Вялікая ўвага надавалася рабоце са зваротамі грамадзян, — канкрэтызавала яна. — За апошні год колькасць зваротаў грамадзян стала значна меншай. Гэта, безумоўна, радуе і сведчыць аб тым, што работа выканаўчай улады стала больш якаснай і прадуктыўнай. Самым запамінальным за гэты час быў перыяд абмеркавання навэл і змен у Асноўны Закон нашай краіны. Сустракаючыся з людзьмі ў межах дыялогавых пляцовак, мы мелі магчымасць выслухаць іх прапановы па ўнясенні змяненняў у Канстытуцыю, а таксама іншыя пытанні, якія хвалявалі насельніцтва. Вялікі аб’ём працы быў ажыццёўлены дэпутатамі і пасля прыняцця абноўленай Канстытуцыі, калі парламентарыі прынялі шэраг важных законапраектаў. Упэўнена, новае скліканне дэпутатаў працягне гэтую работу, якая будзе накіравана на карысць інтарэсаў дзяржавы і народа».
Вераніка КАНЮТА
Фота БелТА
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
