Вішневае Глыбокае. Як святкуюць самае доўгачаканае свята горада?

Апошнія пару дзён на вуліцах Глыбокага, не сціхаючы, іграла музыка, лунаў водар вішняў, чуліся смех і розныя гаворкі. Гэта глыбачане і госці вішнёвай сталіцы святкавалі Вішнёвы фестываль.

Пачалося свята 21 ліпеня ў рэзідэнцыі Вішнёвай Каралевы. Афіцыйным адкрыццём мерапрыемства стала традыцыйнае гашэнне паштовай маркі спецыяльным штэмпелем. Этна-вечарына «У вішнёвым садзе» сабрала на Цэнтральнай плошчы зацікаўленых беларусаў, а таксама замежных гасцей фестывалю.

Сёлета на вішнёвае свята завіталі жыхары Расіі, Кітая, Дагестана, Карэі, Малдовы. І калі вакальны калектыў вішнёвых прыгажунь з горада Уварава (Расія) прыязджае далёка не першы раз, то прадстаўнікі Кітайскай Народнай Рэспублікі, студэнты Віцебскага дзяржаўнага ўніверсітэта імя П. М. Машэрава, завіталі сюды ўпершыню. Але адразу ж заўважылі гасціннасць і ветлівасць глыбачан.

— Калі я прыехаў на Вішнёвы фестываль, я ўбачыў, наколькі шчаслівыя людзі тут жывуць. Нам вельмі пашанцавала, што ў нас з'явілася магчымасць інтэгравацца ў вашу культуру, — дзеліцца ўражаннямі Сюй Жань, адзін са студэнтаў Віцебскага дзяржаўнага ўніверсітэта імя П. М. Машэрава.

Танцы розных народаў падарылі прысутным цудоўны настрой, які захаваўся на ўсе астатнія мерапрыемствы. А іх арганізатары падрыхтавалі шмат! Працягнулася імпрэза канцэртнай праграмай «Віват, Вішня!», дзе гучалі ўсімі любімыя песні ў выкананні калектываў Cherry Town (Глыбокае) і «8-й регион» (Бягомль).

Адкрыццём другога дня фестывалю стала тэатралізаванае шэсце. Павітаць жыхароў Глыбоччыны і гасцей фестывалю выйшла Каралева Вішня разам са сваімі спадарожнікамі — баронам Мюнхаўзенам і маленькімі «вішанькамі». Сёлета Каралева змяніла сваю вішнёвую карэту на шыкоўны белы лімузін, а таксама займела новую сукенку, што зрабіла шэсце яшчэ больш эфектным. Перад стартам урачыстай працэсіі каля помніка вішні павіншавалі сем'і, што адзначылі пяць і дзесяць гадоў шлюбу, якія былі створаныя на мінулых фестывалях.

Адразу пасля таго пачаўся гала-канцэрт у амфітэатры каля возера. З прывітальным словам на ім выступілі ганаровыя госці — першы намеснік старшыні Выканаўчага камітэта СНД Леанід Анфімаў, намеснік начальніка аддзела работы арганізацый сферы культуры ўпраўлення культуры Віцебскага абласнога выканаўчага камітэта Алег Агееў, старшыня нацыянальна-культурнай аўтаноміі беларусаў Смаленскай вобласці Сяргей Крыўко, а таксама старшыня Глыбоцкага раённага выканаўчага камітэта Аляксандр Шубскі. Яны адзначылі важнасць дадзенага мерапрыемства, успомнілі, якім быў самы першы Вішнёвы фестываль і як павысіўся яго ўзровень за 11 гадоў, а таксама пажадалі святу далей расці і збіраць гасцей з розных куткоў свету.

— Наш фестываль вельмі юны — праходзіць усяго толькі ў 11 раз. Але ствараецца такое ўражанне, што мы святкуем яго на працягу многіх дзесяцігоддзяў, бо ён заснаваны на найлепшых культурна-народных традыцыях глыбачан. Вядома, па маштабе Вішнёвы фестываль меншы, чым Купалле ў Александрыі або «Славянскі базар у Віцебску», але мы разглядаем яго як злучальны масток паміж народамі нашых краін у справе ўмацавання дружбы і ўзаемаразумення, — адзначыў Леанід Анфімаў.

Фестываль здзіўляў сваіх гасцей рознымі мерапрыемствамі. Адным з самых урачыстых і прыгожых можна назваць «вішнёвае» вяселле, дзе свой шлюб узялі Ульяна і Антон Жук. Заручальныя пярсцёнкі ім паднесла асабіста Яе Вялікасць, а пасля правяла жаніха з нявестай па Алеі маладых.

З размахам прайшоў і традыцыйны конкурс гарманістаў, баяністаў, акардэаністаў «Вішнёвыя найгрышы». Сёлета ў ім узялі ўдзел 11 (які сімвалічны лік, праўда?) музыкантаў з Глыбокага, Лепеля, Браслава, Паставаў, Ушач і Докшыц. Пераможцай, уладальніцай Гран-пры і галоўнага прыза, вішнёвага баяна, стала глыбаччанка Ларыса Стэфановіч.

Згуляць у «вішнёвую» мафію, прадэгуставаць розныя віды вішнёвага варэння з сакрэтнымі інгрэдыентамі, паглядзець на забег вішнёвых слімакоў альбо паўдзельнічаць у анлайн-майстар-класе па маляванцы ад народнага майстра Беларусі Святланы Скавыркі — усё гэта можна было зрабіць падчас свята. Кожны дакладна знайшоў нешта цікавае для сябе на Вішнёвым фестывалі ў Глыбокім!

Кацярына КУРДО

Фота аўтара