25 ліпеня ў большасці ВНУ завяршыўся прыём дакументаў на бюджэтныя месцы, а таксама на спецыяльнасці платнай формы навучання, дзе абітурыенты здаюць уступныя іспыты.
У бліжэйшыя дні ў вышэйшых навучальных установах краіны стартуюць унутраныя іспыты. Напрыклад, у БДУ яны пройдуць на пяці факультэтах і ў Міжнародным дзяржаўным экалагічным інстытуце імя А.Д. Сахарава і будуць арганізаваны па дзевяці навучальных дысцыплінах.
Для тых, хто паступае на спецыяльнасці «Журналістыка» (факультэт журналістыкі), «Графічны дызайн і мультымедыядызайн», «Дызайн касцюма і тэкстылю», «Дызайн прадметна-прасторавага асяроддзя» (факультэт сацыякультурных камунікацый) , уступныя іспыты арганізуюцца па дысцыпліне «Творчасць». Заданне па малюнку абітурыентам прапануюць выканаць 27 і 28 ліпеня, па кампазіцыі — 29 і 30 ліпеня. Творчае сачыненне на факультэце журналістыкі абітурыенты напішуць 27 і 29 ліпеня, а творчае тэсціраванне пройдзе 29 і 31 ліпеня.
На філалагічным факультэце экзамен па рускай літаратуры для абітурыентаў спецыяльнасці «Руская філалогія» пройдзе 27 ліпеня, а для спецыяльнасці «Славянская філалогія (з рускай мовай навучання)» — 30 ліпеня. Таксама 27 ліпеня адбудзецца ўступны іспыт па беларускай літаратуры для тых, хто паступае на «Беларускую філалогію», а 30 ліпеня — для абітурыентаў спецыяльнасці «Славянская філалогія (з беларускай мовай навучання)».
Для абітурыентаў завочнай скарочанай формы навучання ўступныя іспыты пройдуць на гістарычным, юрыдычным факультэтах, а таксама ў МДЭІ імя А.Д. Сахарава.
Абітурыентаў гістарычнага факультэта, якія падалі дакументы на спецыяльнасць «Кіраванне дакументамі» чакаюць экзамены па дысцыплінах «Дакументацыйнае забеспячэнне кіравання» і «Архівазнаўства».
У МДЭІ імя А.Д. Сахарава абітурыенты спецыяльнасці «Медыка-біялагічная справа» здаюць «Анатомію і фізіялогію» і «Гігіену і экалогіяю чалавека». Уступныя іспыты на спецыяльнасць «Цеплаэнергетыка і цеплатэхніка» ўключаюць экзамен па «Асновах электратэхнікі» і «Асновах інжынернай графікі».
Абітурыентаў юрыдычнага факультэта спецыяльнасці «Правазнаўства» чакаюць экзамены па «Агульнай тэорыі права» і па «Грамадзянскім праве».
Усе іспыты арганізуюцца ў пісьмовай форме, акрамя ўступных іспытаў па беларускай і рускай літаратурах на філалагічным факультэце, а таксама творчага тэсціравання на факультэце журналістыкі. Напярэдадні для абітурыентаў ладзяцца кансультацыі.
У Беларускім дзяржаўным педагагічным універсітэце на філалагічным факультэце праводзіцца вусны экзамен па беларускай і рускай літаратуры, на факультэце эстэтычнага выхавання прадугледжаны экзамен па творчасці, а на факультэце фізічнага выхавання абітурыенты здаюць дысцыплну «Фізічная культура і спорт».
У БНТУ па спецыяльнасцях «Архітэктура», «Архітэктурны дызайн», «Прамысловы дызайн (транспартных сродкаў)» і «Прамысловы дызайн (вытворчага абсталявання)» адбудзецца ўнутраны экзамен па творчасці. Ён будзе ўключаць наступныя этапы: малюнак, кампазіцыю, чарчэнне і жывапіс.
Праграма ўнутраных уступных іспытаў для скарочанай формы навучання ўключае наступныя дысцыпліны: «Геадэзія», «Інфармацыйныя тэхналогіі», «Матэрыялазнаўства і тэхналогія матэрыялаў», «Асновы алгарытмізацыі і праграмавання», «Асновы інжынернай графікі», «Асновы інфармацыйных тэхналогій»; «Асновы менеджменту» , «Асновы электратэхнікі» і інш.
Прыёмная кампанія бягучага года яшчэ не завяршылася, а Міністэрства адукацыі ўжо анансавала планы на будучыню. Так, у Беларусі гатовы разгледзець магчымасць увядзення вуснага экзамену ў дадатак да цэнтралізаванага экзамену для абітурыентаў, якія паступаюць ва ўстановы вышэйшай адукацыі на сацыяльна-гуманітарныя спецыяльнасці.
Нагадаем, што ў гэтым годзе вусныя экзамены пры паступленні ў беларускія ВНУ здавалі абітурыенты, якія паступалі на бюджэтныя месцы ў рамках мэтавай падрыхтоўкі спецыялістаў. Яны не здавалі ні цэнтралізаванае тэсціраванне, ні цэнтралізаваны экзамен, а толькі вусны экзамен па профільных дысцыплінах. Гэты досвед у Мінадукацыі збіраюцца дасканала вывучыць.
«Вельмі важна правесці аналіз рэзультатыўнасці здачы вуснага экзамену для хлопцаў і дзяўчат, якія паступалі на мэтавую форму падрыхтоўкі. На думку настаўнікаў, якія ўваходзілі ва ўсе прыёмныя камісіі вуснага экзамену, і прадстаўнікоў прафесарска-выкладчыцкага саставу ВНУ, гэта вельмі добрая форма кантролю ведаў абітурыентаў. Мы мяркуем, сёння сістэма адукацыі гатовая разгледзець магчымасць, у першую чаргу, для сацыяльна-гуманітарных дысцыплін, увядзенне вуснага экзамену ў дапаўненне да цэнтралізаванага экзамену, які здаецца ўсімі выпускнікамі ўстаноў агульнай сярэдняй адукацыі», — сказаў Андрэй Іванец падчас сустрэчы з кіраўнікамі ўніверсітэтаў Гомельскай вобласці.
Міністр адзначыў, што ў бягучую прыёмную кампанію прыкладна кожны трэці студэнт паступіць у ВНУ без здачы цэнтралізаванага тэсціравання. Магчымасці для паступлення без экзаменаў адкрыліся для пераможцаў не толькі рэспубліканскіх, але і абласных і ўніверсітэцкіх алімпіяд, для навучэнцаў, якія атрымалі рэкамендацыю як выпускнікі Нацыянальнага дзіцячага тэхнапарку. «Хлопцы і дзяўчаты, якія паступаюць на творчыя спецыяльнасці, спартыўныя, архітэктурнага профілю, здаюць унутраны творчы экзамен. Мы мяркуем, што магчымае ўвядзенне вуснага экзамену для абітурыентаў сацыяльна-гуманітарнага блока таксама дасць магчымасць істотным чынам раскрыць іх патэнцыял», — падкрэсліў Андрэй Іванец.
Надзея НІКАЛАЕВА
Фота Лізаветы ГОЛАД
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.