Канцэнтрацыя таленту і прыгажосці, феерыя маладосці і творчасці, чэсная і прынцыповая барацьба — у Палацы спорту прайшоў фінал ХІІІ Нацыянальнага конкурса «Міс Беларусь — 2023». Гэты вечар стаў прыгожай кропкай і ў рабочым графіку Прэзідэнта Беларусі Аляксандра Лукашэнкі. Кіраўнік дзяржавы таксама наведаў шоў у Палацы спорту.
Сёлета за тытул спаборнічалі 24 дзяўчыны, якія прадстаўляюць кожны рэгіён краіны. Асноўная ідэя фінальнага шоў звязана з прыгажосцю як натхняльнай сілай для подзвігаў і творчых перамог, што вельмі сімвалічна ў Год міра і стваральнай працы.
У фінале ўдзельніцы конкурсу прадставілі публіцы пяць традыцыйных выхадаў, сярод іх – дэфіле ў народных касцюмах, купальніках, дзелавых касцюмах і заключны — у вечаровых сукенках. Хоць «Міс Беларусь» — гэта конкурс прыгажосці, журы ацэньвала не толькі знешнасць удзельніц, але і іх інтэлект, уменне падаць сябе і, як не дзіўна, унутраную прыгажосць.
Арганізатары падрыхтавалі для гледачоў яркае шоу, напоўненае выступленнямі як знакамітых, так і пачынаючых артыстаў эстрады. Дадавала ўражанняў і візуальнае афармленне, якое суправаджалася спецэфектамі.
Кожная ўдзельніца вартая кароны, але па правілах пераможца толькі адна. «Міс Беларусь — 2023» стала Элеанора Качалоўская. Першыя эмоцыі пераможцы — шок і шчасце, якога яна, не хавала. Як расказала Элеанора, яе бліжэйшыя планы — наведаць тэатр імя Янкі Купалы і паглядзець спектакль «Паўлінка». Падчас інтэлектуальнага конкурса дзяўчына адказвала на пытанне, звязанае з творчасцю класіка. Але ад хвалявання не змагла правільна адказаць. Сваю памылку дзяўчына прызнала і абяцала выправіць. Ды і гэта было зусім не галоўным.
«Я не магу да канца паверыць, што гэта праўда. Здаецца, што ўсё яшчэ ідзе рэпетыцыя, мы столькі разоў рэпетыравалі. Але я гляджу на журналістаў, адчуваю карону на галаве і разумею, што гэта праўда. Я шакавана, шчасліва і вельмі ўдзячна ўсім, хто мяне падтрымліваў і мне дапамагаў», — падзялілася Элеанора. Міс Беларусь падкрэсліла, што прысутнасць Прэзідэнта ў зале яе натхняла і падбадзёрвала. «Я адчувала, што ён падтрымліваў кожную ўдзельніцу і за кожную хвалюецца. Таму падчас дэфіле мне было спакайней, калі я глядзела на Прэзідэнта і на сваю маму», — адзначыла яна. Першая прыгажуня Беларусі таксама падзялілася, якім бачыць ідэал мужчыны — ён павінен быць чэсным, мужным і добрым. Расказала Элеанора і пра сваю мару — дастойна прадставіць Беларусь на міжнародным конкурсе прыгажосці, паказаць усяму свету прыгажосць нашай краіны. Такая магчымасць прадставіцца зусім хутка. Элеанора будзе прадстаўляць Беларусь на конкурсе «Міс свет», які пройдзе 8 снежня ў індыйскім горадзе Срынгар.
Элеанора з Мінска. Дзяўчына скончыла БДУКМ, зараз атрымлівае другую вышэйшую адукацыю псіхолага ў педагагічным універсітэце і паралельна працуе мэнэджэрам мадэльнага агенцтва ў Нацыянальнай школе прыгажосці.
Званне «Першая віцэ-міс» дасталася Ксеніі Уласюк, Другой віцэ-міс стала Мілана Якімовіч. У намінацыі «Міс фота» перамогу атрымала Аліна Герасіменка.
Валерыя СЦЯЦКО
Фота БелТА
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.