Патэнцыял велізарны, трэба забяспечыць значны рост экспарту

Патэнцыял супрацоўніцтва з краінамі Афрыкі велізарны, трэба забяспечыць значны рост экспарту на гэтым кірунку. Пра гэта заявіў прэм’ер-міністр Беларусі Раман Галоўчанка падчас нарады ва ўрадзе, паведамляе БелТА.

«Сёння мы праводзім нараду па развіцці нашага ўзаемадзеяння з краінамі Афрыкі. Гэты кантынент мае велізарны патэнцыял развіцця і ацэньваецца экспертамі як новы драйвер міжнароднага росту. Мы даўно выбудоўваем даверны і ўзаемапаважлівы дыялог з краінамі Афрыкі. Прамыя кантакты на вышэйшым узроўні з лідарамі шэрагу афрыканскіх краін ствараюць спрыяльныя ўмовы для развіцця нашых сувязяў і паглыблення партнёрства. Разам з тым, ацэньваючы аб’ектыўную знешнегандлёвую сітуацыю, варта сумленна прызнаць, што назапашаны палітычны капітал пакуль не канвертаваны ў належнай ступені ў паспяховыя гандлёва-эканамічныя праекты», — сказаў Раман Галоўчанка.

У 2022 годзе экспарт беларускіх тавараў у краіны Афрыкі складаў крыху больш за $200 млн і дэманструе некаторую тэндэнцыю да зніжэння. «Максімальны аб’ём экспарту — больш за $400 млн — быў дасягнуты ў дакавідным 2019 годзе, але нават гэтая лічба вельмі малая для кантынента з насельніцтвам у паўтара мільярды. Нягледзячы на тое, што экспарт паслуг у краіны Афрыкі вырас больш чым у два разы ў бягучым годзе, ён па-ранейшаму нязначны — каля $20 млн. Такім чынам, пакуль задачы, пастаўленыя прэзідэнтам па забеспячэнні росту экспарту тавараў і паслуг у краіны Афрыкі апераджальнымі тэмпамі ў параўнанні з агульным экспартам, выконваюцца недастаткова», — заявіў прэм’ер-міністр.

«Пры гэтым ужо ў гэтым годзе па выніках сустрэчы Прэзідэнта з кіраўнікамі Зімбабвэ і Экватарыяльнай Гвінеі пастаўлены задачы па развіцці не проста гандлю, але і прамысловай кааперацыі, супрацоўніцтва ў галіне медыцыны, фармакалогіі, навукова-тэхнічнага супрацоўніцтва, у сферы адукацыі і гэтак далей. Кантроль вырашэння гэтых задач будзе сур’ёзны. Неабходна прыкласці ўсе намаганні, знайсці патрэбныя інструменты і формулу для пералому негатыўнай дынамікі ў супрацоўніцтве з краінамі Афрыкі», — падкрэсліў кіраўнік урада.

«Сёння разгледзім, як спрацавалі міністэрствы, дзяржканцэрны, структуры МЗС на афрыканскім кірунку за мінулы перыяд. І прымем рашэнне, па якім шляху будзем рухацца далей. Мяне таксама цікавіць, як арганізавана канкрэтная праца па рэалізацыі дамоўленасцяў, дасягнутых на вышэйшым узроўні, і як мы далей будзем выбудоўваць супрацоўніцтва з нашымі апорнымі кропкамі на афрыканскім кантыненце», — падсумаваў Раман Галоўчанка.