Беларусь выходзіць на траекторыю ўстойлівага доўгатэрміновага эканамічнага росту

Беларусь выходзіць на траекторыю ўстойлівага доўгатэрміновага эканамічнага росту. Пра гэта заявіў старшыня праўлення Банка развіцця Аляксандр Ягораў у інтэрв’ю тэлеканалу «Беларусь 1», паведамляе БелТА.

Як паведамлялася, Прэзідэнт Беларусі Аляксандр Лукашэнка 2 кастрычніка падпісаў указ № 307, якім зацверджаны найважнейшыя прагнозныя параметры развіцця краіны на 2024 год. Прырост валавога ўнутранага прадукту прагназуецца на 3,8% за кошт маштабных інвестыцыйна-вытворчых праграм, рэалізацыі беларускай прадукцыі на знешнія рынкі і пашырэння ўнутранага попыту. Чакаецца, што інвестыцыі ў асноўны капітал дададуць 3,9% у супастаўных умовах, экспарт тавараў і паслуг павялічыцца на 7,6% (пераважна за кошт нарошчвання фізічных аб’ёмаў продажаў).

«Прагназуемыя тэмпы росту як інвестыцый, так і экспарту апярэджваюць тэмпы росту ВУП. Гэта азначае, што мы робім упор на знешні гандаль і на рост капітальных выдаткаў для таго, каб сфармаваць зачын пад будучы доўгатэрміновы эканамічны рост. Такі рост — прыкладна 4% — мы будзем фарміраваць ужо другі год запар, гэта значыць мы выходзім на траекторыю ўстойлівага доўгатэрміновага эканамічнага росту, што нашмат больш цікава з пункту гледжання дзяржавы, чым „арэлі“: трошкі ўпалі — трошкі выраслі. Тут перманентны рост», — сказаў Аляксандр Ягораў.

Ён адзначыў, што шмат увагі надаецца дзяржаўнай інвестыцыйнай праграме. Другі важны аспект — ініцыятыва «Адзін раён — адзін праект». «Фінансаванне мы пачалі ў гэтым годзе. Шэраг праектаў рэалізаваны ў 2023 годзе, яны выйдуць на праектную магутнасць у наступным. Некаторыя праекты будуць рэалізаваны ў 2024 годзе, і мы атрымаем гатовую прадукцыю. Так што па інвестыцыях ўсе лічбы пралічаныя, рост будзе забяспечаны», — падкрэсліў старшыня праўлення Банка развіцця.

Паводле яго слоў, ініцыятыва «Адзін раён — адзін праект» і імпартазамяшчальныя праекты шмат у чым нацэлены на экспарт. І паколькі такія праекты былі ўведзеныя ў гэтым годзе ці будуць уводзіцца ў першым квартале наступнага, яны забяспечаць рост экспарту ў 2024-м.

«Галоўная ідэя ў тым, што мы павінны павялічваць пастаўкі не толькі ў Расію і іншыя краіны ЕАЭС, але і ў краіны далёкай дугі — Азію, Афрыку, Лацінскую Амерыку. Для гэтага робіцца ўсё. З боку Прэзідэнта нашай краіны ў нас ёсць палітычныя дамоўленасці аб істотным нарошчванні тавараабароту, напрыклад, з краінамі Афрыкі. Цяпер справа за міністэрствамі, прадпрыемствамі, каб канвертаваць гэтыя палітычныя дамоўленасці ў канкрэтныя лічбы росту экспарту», — звярнуў увагу Аляксандр Ягораў