У Магілёве стартаваў міжнародны кааперацыйны форум па імпартазамяшчэнні

На тры дні, з 25 па 27 кастрычніка, абласны цэнтр пераўтварыўся ў бізнес-пляцоўку для перамоў паміж прадстаўнікамі дзелавых колаў. Свае стэнды і ўзоры прадукцыі на прасторных плошчах СК «Алімпіец» прадставілі вытворцы з Арэнбургскай, Смаленскай, Курскай, Наўгародскай і іншых абласцей. Болей чым 100 прадстаўнікоў бізнесу з 14 расійскіх рэгіёнаў далі згоду на ўдзел у магілёўскім форуме. У адкрыцці мерапрыемства прынялі ўдзел старшыня Магілёўскага аблвыканкама Анатоль Ісачанка, гандлёвы прадстаўнік Расійскай Федэрацыі ў Рэспубліцы Беларусь Юрый Залатароў, намеснік міністра эканомікі Рэспублікі Беларусь Уладзімір Наумовіч.

Магілёў сёння жыве ў дынамічным дзелавым рытме. Паміж удзельнікамі форума актыўна вядуцца перамовы ў фармаце В2В, праходзяць дзелавыя сустрэчы, тэматычныя дыскусіі, прэзентацыйныя выставы экспартна-арыентаваных прадпрыемстваў. Усё гэта накіравана на развіццё гандлю і эканамічнага партнёрства, вызначэнне новых бізнес-партнёраў на знешнім рынку, пошук альтэрнатыўных пастаўшчыкоў прадукцыі (сыравіны, абсталявання, камплектуючых) для кампаній-экспарцёраў, устанаўленне кааперацыйных сувязей паміж вытворцамі і спажыўцамі, а таксама фарміраванне новых каналаў экспарту і імпарту прадукцыі.

— Галоўная задача форума — прэзентаваць магчымасці беларускіх прадпрыемстваў, абмяняцца практычным вопытам і знайсці новыя рашэнні ў агульным з расіянамі імпартазамяшчэнні, — абазначыў падчас адкрыцця галоўныя арыенціры губернатар Магілёўскай вобласці Анатоль Ісачанка. — Расія застаецца адным з нашых важнейшых партнёраў, таму на першы план выходзяць не проста пытанні павялічэння таваразвароту, а павелічэнне ўзаемнай кааперацыі для зыходу ад імпарту і для стварэння новых канкурэнтаздольных тавараў для рэалізацыі на ўнутраным і знешнім рынках. Неабходна максімальна ўмацоўваць міжрэгіянальныя адносіны і развіваць транспартна-лагістычныя калідоры. 

На форуме будзе працаваць тры секцыі — на тэму «Прамысловая кааперацыя — шлях ад імпартазамяшчэння да тэхналагічнай незалежнасці», «Экспарт ва ўмовах санкцый. Інструменты падтрымкі экспарту» і «Продажы на маркетплэйсах. Як працаваць на маркетплэйсах». 

У якасці экспанентаў выстаўкі ў «Алімпійцы» выступае болей чым 60 беларускіх і расійскіх кампаній. 

ААТ «Зеніт» адно з прадпрыемстваў холдынгу «Магілёўліфтмаш», якое спецыялізуецца на электраабсталяванні для ліфтаў. На выставе вытворца прэзентуе таксама інавацыйную спадарожную прадукцыю — святлодыёдныя энергаэфектыўныя ліхтары для вялікагрузнай тэхнікі. 

— А гэта наша апошняя распрацоўка, — дэманструе дэзінфектар для ліфта начальнік адзела рэкламы прадпрыемства Алена Таланава. — Панель падбіраецца па колеру і канфігурацыі пад любую мадэль ліфта. 

Магілёўская прыватная кампанія СмартТрак, якая з’яўляецца рэзідэнтам «Тэхнапарка», прадставіла інавацыйную распрацоўку — ворны трактар.

— Аналагаў у Беларусі і Расіі пакуль нямы, — запэўнівае дырэктар кампаніі Сяргей Дуктаў. — Адаптар далучаецца да мотакультыватара, і пераўтварае яго ў поўнапрывадны трактар. Дзякуючы гэтаму інавацыйнаму праекту мы і сталі рэзідэнтамі магілёўскага «Тэхнапарка».

Раней фірма займалася гандлем культыватараў. 

Магілёўскі вагонабудаўнічы завод будуе вялікія планы на работу з Расіяй. Прадпрыемства робіць акцэнт на вытворчасць універсальных грузавых вагонаў і вагонаў для перавозкі збожжа. Гэта два віду прадукцыі, якія сёння карыстаюцца вялікім попытам.

— На форумах галоўнае знайсці новыя кантакты, новыя рынкі збыту, новых сяброў і супрацоўнічаць у гэтым кірунку, — кажа яго дырэктар Аляксандр Башарымаў. — Попыт на вагоны расце, аб’ёмы іх вытворчасці павялічыліся сёлета амаль ў два разы ў параўнанні з мінулым годам. Хачу адзначыць, што з расійскімі партнёрамі працаваць адно задавальненне. Няма пытанняў ні па аплаце, ні па афармленні кантрактаў. 

На форуме прысутнічаюць і прадстаўнікі вагонабудаўнічай кампаніі з Удмурціі. Прызнаюцца, што магілёўскае прадпрыемства па вырабе вагонаў для іх не канкурэнт, а партнёр. І яны зацікаўлены ў супрацоўніцтве з беларускімі вытворцамі. Для гэтага яны пераадолелі шлях у 1,5 тысячы кіламетраў. 

— Для нас адкрыццё беларускага рынка значная падзея, — адзначыў дэпутат Дзяржсавета Удмурцкай Рэспублікі і дырэктар «Вагоннай грузавой кампаніі» Раміль Гайнулін. — На працягу года вялі перамовы з вашымі вагонабудаўнікамі. Той аб’ем, які на наступны год у нас запланаваны, недастатковы для тых кампаній, якія збіраюцца набываць вагоны. І ў гэтым выпадку Магілёўскі вагонабудаўнічы завод для нас як палачка-выручалачка. Мы тут для таго, каб падпісаць пагадненне. 

Суразмоўца адзначае, што ў Магілёве яны сустрэлі цёплы прыём і ў прамым, і ў пераносным сэнсе.

— У нас ужо ляжыць снег, а ў вас прыгожыя зялёныя палі, — усміхаецца Раміль Гайнулін.

Акрамя вагонаў гасцей з Удмуртыі цікавіць яшчэ і беларускі цэмент.

— Мы ўжо набываем і збіраемся нарошчваць аб’ёмы гэтага тавару, — кажа Раміль Ільдаравіч. — Адпаведна купляем яшчэ і цэментавозы, будзем прыязджаць у Крычаў, каб забіраць цэмент. У нас вельмі шмат аб’ектаў будаўніцтва, зараз мы пастаўляем цэмент на будаўніцтва міжнароднага тэрмінала аэрапорта горада Іжэўск. Аб’ёмы будаўніцтва вялікія і цэменту не хапае. Месяц таму мы былі на магілёўскім вагонабудаўнічым заводзе і ездзілі на перамовы з Беларускай цэментнай кампаніяй. Яны, сапраўды, здзівіліся, што з Урала прыехалі за цэментам, але мы ўжо на той момант набывалі беларускі цэмент, проста вырашылі выйсці на прамыя пастаўкі. Лагістыка вельмі моцна адбіваецца. Таму мы і набываем свае цэментавозы, каб зрабіць перавозку больш таннай. Беларускі цэмент не танны, але якасць яго высокая. Еўрапейскі рынак патрабаваў ад нас пэўных параметраў па цэменту і беларускі іх цалкам вытрымлівае. 

Цэнтр падтрымцы прадпрымальніцтва і Цэнтр падтрымцы экспарту з Ніжняга Ноўгарада прадстаўлялі адразу 12 кампаній розных сфер дзейнасці — ад вытворчасці нажоў да медыцынскіх інструментаў. Сярод удзельнікаў — металургічныя арганізацыі, спружынны завод, будаўнічая кампанія.

— Непасрэдна мы займаемся металаапрацоўкай — ад праектавання да вытворчасці, — удакладніў генеральны дырэктар ніжагародскай кампаніі «Лазер-НН» Ягор Архіпаў. —Супрацоўнічаем у асноўным з расійскімі прадпрыемствамі, але быў вопыт супрацоўніцтва з Беларуссю па маркетпэйсу. Вось прыехалі шукаць новых партнёраў на месцы.

Як выказаўся намеснік міністра эканомікі Рэспублікі Беларусь Уладзімір Наумовіч, на фоне тых выклікаў, з якімі сутыкнуліся Беларусь і Расія, магілёўскі форум добры прыклад таго, як можна вырашаць сумесныя праблемы разам. «Не дзіўна, што да мерапрыемства такая цікавасць і беларускіх, і расійскіх вытворцаў, — падкрэсліў ён. — Вядома, што ў кааперацыі рухацца прасцей і лягчэй, падстаўляючы адзін аднаму плячо».

У рамках форума арганізавана выстава дасягненняў беларускага аўтапрама на пляцоўцы каля спартыўнага комплексу. 

Нэлі ЗІГУЛЯ

Фота аўтара