Вы тут

Скараціўся аб’ём спажывання прыроднага газу


«Зніжэнне аб’ёму спажывання прыроднага газу за мінулы год у параўнанні з узроўнем 2022-га склала амаль 10 %, або каля 1,7 мільярда кубічных метраў», — паведаміў Віктар Каранкевіч на выніковай калегіі міністэрства. Па яго словах, у першую чаргу гэта звязана з работай Беларускай атамнай станцыі. Другі фактар — комплекс энергазберагальных мерапрыемстваў, якія рэалізуюцца ў краіне і таксама даюць свой эфект. У прыватнасці, у энергасістэме за кошт рэалізацыі такіх мерапрыемстваў сэканомлена больш за 110 тысяч тон умоўнага паліва. Трэці — гэта ўцягванне ў энергабаланс краіны мясцовых відаў паліва, якое таксама дазваляе замяшчаць выкарыстанне імпартаванага прыроднага газу.


БелАЭС выпрацавала звыш 25 млрд кілават

Кіраўнік Мінэнерга праінфармаваў, што ў мінулым годзе арганізацыі галіны выканалі даведзеныя ўрадам заданні і ключавыя паказчыкі, забяспечылі надзейнае забеспячэнне энергарэсурсамі спажыўцоў рэальнага сектара эканомікі і насельніцтва. Працягвалася сістэмная работа па абнаўленні асноўных вытворчых фондаў арганізацый энергетычнага комплексу, павышэнні надзейнасці работы энергасістэмы. Пры падтрымцы кіраўніка дзяржавы рэалізаваныя важныя для галіны інвестыцыйныя праекты.

Самай маштабнай падзеяй стаў увод у прамысловую эксплуатацыю Беларускай атамнай электрастанцыі. З моманту ўключэння ў аб’яднаную энергасістэму першага энергаблока станцыя выпрацавала 25,4 мільярда кВт.г электрычнай энергіі. Гэта дазволіла замясціць звыш 6,7 мільярда кубічных метраў прыроднага газу. Праект стаў добрым стымулам для росту электрычнага спажывання ў краіне — па выніках 2023 года гэты паказчык вырас на 2,5 мільярда кВт.г, або на 6,6 % у параўнанні з 2022 годам і склаў 41,1 мільярда кВт.г. Пры гэтым 28,5 % ад агульнага аб’ёму забяспечана за кошт выпрацоўкі электраэнергіі Беларускай атамнай станцыяй.

Рост электраспажывання забяспечаны як рэальным сектарам эканомікі, так і насельніцтвам. Гэта развіццё энергаёмістых вытворчасцяў, электратранспарту, выкарыстанне электраэнергіі для мэт ацяплення і гарачага водазабеспячэння.

Будуць пашыраны работы па мадэрнізацыі электрасетак

«Для задавальнення ўзрослых патрэбнасцяў у электраэнергіі рэальнага сектара эканомікі і насельніцтва ў краіне шырока праводзяцца работы па рэканструкцыі электрасеткавай інфраструктуры. У 2022 годзе энергазабеспячальнымі арганізацыямі пабудавана і мадэрнізавана 1,7 тысячы кіламетраў электрасетак, а летась — ужо каля 2,7 тысячы кіламетраў. Сёлета стаіць задача павялічыць гэты аб’ём да трох тысяч кіламетраў», — сказаў Віктар Каранкевіч.

Разам з мадэрнізацыяй электрасетак працягваюцца работы па рэканструкцыі падстанцый розных класаў напружання. Большасць з гэтых праектаў рэалізаваныя з ужываннем найноўшых тэхналогій аўтаматызацыі і лічбавізацыі, што істотна павышае надзейнасць энергазабеспячэння спажыўцоў.

На чатырох буйных электрастанцыях — Бярозаўскай і Лукомльскай ГРЭС, Наваполацкай ЦЭЦ і Мінскай ЦЭЦ-5 — завяршыліся асноўныя работы па будаўніцтве пікава-рэзервовых энергетычных крыніц з устаноўкай высокаманеўранага генеравальнага абсталявання сумарнай магутнасцю 800 МВт. 

Газіфікавана каля 13 тысяч кватэр і дамоў

Газазабеспячальнымі арганізацыямі ў 2023 годзе ўведзена ў эксплуатацыю каля адной тысячы кіламетраў газаправодаў розных катэгорый, газіфікавана прыродным газам каля 13 тысяч кватэр і домаўладанняў. Блакітнае паліва падведзена да 56 сельскіх населеных пунктаў, з іх 17 — аграгарадкі. Агульная працягласць газавых сетак перавышае 67 тысяч кіламетраў.

Праведзена комплекснае прыборнае абследаванне 8,5 тысячы кіламетраў падземных газаправодаў. У мэтах павышэння бяспекі абанентаў — карыстальнікаў прыроднага газу на газавых стаяках і ўводах заменена 13,8 тысячы адзінак нацяжных кранаў на шаравыя. Заменена 154 тысячы адзінак маральна састарэлага бытавога газавага абсталявання.

Торфу хопіць усім, яшчэ і на экспарт застаецца

Арганізацыямі тарфяной галіны летась здабыта 2,2 мільёна тон торфу. За справаздачны перыяд выраблена больш за 1,2 мільёна тон тарфяной прадукцыі паліўнага і каля 136 тысяч тон непаліўнага прызначэння. Патрэбы ўнутранага рынку задаволены ў поўным аб’ёме. Вялася сістэмная работа і па развіцці экспарту. Летась на знешнія рынкі адгружана 150 тысяч тон тарфяной прадукцыі на суму звыш 12 мільёнаў долараў. Пастаўкі ажыццяўляліся больш чым у 20 краін.

Пляцоўка для сховішча радыеактыўных адходаў пакуль не вызначана

Як адзначыў кіраўнік Мінэнерга, пляцоўка для размяшчэння рэспубліканскага сховішча радыеактыўных адходаў пакуль не вызначана. Ідзе аналіз раёнаў і тэрыторый, дзе яно патэнцыйна магло б размясціцца. Пры гэтым улічваюцца ўсе аспекты: экалагічныя, эканамічныя, сацыяльныя, арганізацыйныя, тэхнічныя.

У гэтую работу актыўна ўцягнутая Беларуская арганізацыя па абыходжанні з радыеактыўнымі адходамі.

Першую чаргу сховішча плануецца ўвесці ў эксплуатацыю да 2030 года. Перад пачаткам будаўнічых работ будуць арганізаваны грамадскія слуханні па праекце ў Беларусі, а таксама разам з сумежнымі дзяржавамі.

Сяргей КУРКАЧ

Выбар рэдакцыі

Рэгіёны

Наперадзе — лета! Ці гатовыя тэрыторыі дзіцячага адпачынку прыняць гасцей?

Наперадзе — лета! Ці гатовыя тэрыторыі дзіцячага адпачынку прыняць гасцей?

Вучэбны год завяршаецца для 1,1 мільёна беларускіх школьнікаў, з іх 107,8 тысячы заканчваюць 9-я класы і 57,5 тысячы — 11-я.

Грамадства

У чым пайсці на выпускны баль?

У чым пайсці на выпускны баль?

 Паглядзім, што раяць стылісты і што рэальна набыць у нашых шыротах, пажадана не ўганяючы бацькоў у даўгі.

Спорт

Які наш спорт сёння?

Які наш спорт сёння?

«З кожным днём сітуацыя ў свеце мяняецца так, што ў вялікай ступені гэта закранае і спорт».