Беларусь і Уладзімірская вобласць паказваюць яркія прыклады імпартазамяшчальных праектаў і процідзеяння санкцыям. Пра гэта заявіў журналістам пасол Беларусі ў Расіі Дзмітрый Крутой па выніках праведзеных 4 сакавіка ва Уладзіміры перагавораў з губернатарам рэгіёну Аляксандрам Аўдзеевым, перадае БелТА.
«За апошнія два гады ў Беларусі і Уладзімірскай вобласці з’явіліся яркія прыклады процідзеяння санкцыйнай палітыцы і паспяховай рэалізацыі і выканання імпартазамяшчальных праектаў. Наш Беларускі металургічны завод, які традыцыйна працуе на еўрапейскіх рынках, не чакаў, што ва ўмовах Расіі можна паспяхова канкурыраваць і на буйныя ўладзімірскія прадпрыемствы пастаўляць бясшвовыя трубы, металічны дрот ці іншыя віды металапрадукцыі. Абсалютна новая цікавая ніша — вагонабудаванне, калі чарнавыя нарыхтоўкі прыходзяць з нашага магілёўскага завода і тут, ва Уладзімірскай вобласці, збіраюцца фінальныя машыны», — сказаў пасол.
Перспектыўнай у гэтых адносінах з’яўляецца таксама сфера фармацэўтыкі. Да перагавораў з губернатарам Дзмітрый Крутой пабываў на мясцовай інавацыйнай фармацэўтычнай кампаніі «Гінерыум». «Для Беларусі гэта крытычная галіна. Ва ўмовах скарачэння ў тым ліку паставак з заходніх краін знайсці кампетэнцыі і інвестыцыйныя праекты з такімі буйнымі гульцамі, каб развіваць нашу беларускую фармацэўтыку — для нас гэта ключавая задача», — падкрэсліў ён.
«Мінскі маторны завод пачаў пастаўляць свае рухавікі, “Магілёўліфтмаш” знайшоў партнёраў ва Уладзімірскай вобласці і наладзіў пастаўкі электрарухавікоў для зборкі розных відаў тэхнікі — ад дарожных пагрузчыкаў да камунальнай тэхнікі. І такіх прыкладаў насамрэч на сённяшні дзень дзясяткі. Наша кампанія “Пажснаб” па выпуску пажарнай тэхнікі і тэхнікі для ліквідацыі надзвычайных здарэнняў цяпер таксама будзе актыўна заходзіць на рынак Уладзімірскай вобласці», — пералічыў пасол.
Ёсць таксама напрацоўкі па супрацоўніцтве ў шкляной і мэблевай прамысловасці, каб паспяхова канкурыраваць з азіяцкімі вытворцамі. «Вось гэта новыя нішы і новыя тэмы, па якіх мы істотна прырасцем у тавараабароце, я думаю, да $1 млрд», — упэўнены Дзмітрый Крутой.
«Ва Уладзімірскай вобласці ў бліжэйшы час плануецца не толькі будаваць новыя адукацыйныя аб’екты, але і правесці мадэрнізацыю і капітальны рамонт дзеючых. Губернатар заклікаў беларускія будаўнічыя кампаніі ўносіць свае прапановы і ўдзельнічаць у конкурсах», — дадаў дыпламат.
«Трэба быць разваротлівымі і актыўна ўдзельнічаць у праектах. Уладзімірская вобласць зручна лагістычна размешчана побач з намі, тут перспектывы супрацоўніцтва вельмі вялікія, улічваючы патэнцыял рэгіёна», — рэзюмаваў пасол Беларусі.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
