Айчынная прамысловасць ідзе ў нагу з часам і імкнецца вырабляць новае і ўнікальнае. Так, створаны ў Беларусі велікагрузны самазвал БелАЗ грузападымальнасцю 450 тон занесены ў Кнігу рэкордаў Гінеса як самы вялікі двухвосевы аўтамабіль на планеце. Ён ужо выкарыстоўваецца на адным з вугальных разрэзаў Кузбаса. ААТ «Белкамунмаш» наладзіла вытворчасць электробусаў, ужо выраблена і рэалізавана больш за 80 адзінак. ААТ «Планар» распрацавала абсталяванне для фарміравання тапалагічных структур на фоташаблонах, якое не мае аналагаў у свеце і ўжо пастаўляецца на рынкі Германіі, Ізраіля, Рэспублікі Карэя і Кітая.
«Дасягненні беларускай навукі ўражваюць і з'яўляюцца падставай для гонару, — адзначыла падчас сустрэчы з журналістамі намеснік старшыні Дзяржаўнага камітэта па навуцы і тэхналогіях Таццяна Сталярова. — У бягучым годзе плануецца завяршыць некалькі значных распрацовак. У іх ліку комплекс на базе беспілотнага лятальнага апарата для прымянення сродкаў аховы раслін у сельскай гаспадарцы, электробус для перавозкі пасажыраў у аэрапортах з кампанентамі сілавой устаноўкі айчыннай вытворчасці. Будзе створана і тэхналогія перапрацоўкі адходаў, якія ўтвараюцца пры захоўванні нафтапрадуктаў, для атрымання бітумных гідраізаляцыйных матэрыялаў і паліўных сумесяў. Акрамя таго, плануюць атрымаць пенагасільнік на аснове сіліконавага алею з паменшанай здольнасцю да гелеўтварэння, а таксама кампазіцыйны матэрыял на аснове палімернай матрыцы, мадыфікаванай нанаструктураванымі вугляроднымі дабаўкамі, для антыстатычных пакрыццяў.
Разам з гэтым будзе прадоўжана работа ў такіх высокатэхналагічных галінах эканомікі, як мікра- і нанаэлектроніка, вытворчасць электратранспарту, прыборабудавання, фармацэўтычная вытворчасць, прамысловыя біятэхналогіі і інфармацыйныя паслугі».
Дзяржаўная праграма інавацыйнага развіцця на 2021—2025 гады ўжо чацвёртая па ліку. У яе ўключана 75 інавацыйных праектаў па стварэнні ў розных рэгіёнах Беларусі новых высокатэхналагічных вытворчасцяў. За 2021—2022 гады завершана выкананне 18 праектаў, сярод якіх — фарміраванне банка ствалавых клетак, клапанных і сасудзістых алаграфтаў у Мінскім навукова-практычным цэнтры хірургіі, транспланталогіі і гематалогіі, арганізацыя вытворчасці медыцынскага шкла і вырабаў з яго на ААТ «Белмедшкло».
Адна з найважнейшых задач, якія стаяць перад ДКНТ у 2023 годзе, — распрацоўка Комплекснага прагнозу навукова-тэхнічнага прагрэсу, які стане асноватворным стратэгічным дакументам аб магчымых варыянтах навукова-тэхналагічнага развіцця краіны ў сярэднетэрміновым і доўгатэрміновым перыядзе. Прагноз павінен садзейнічаць з'яўленню новых галін і вытворчасцяў на аснове існуючых навукова-тэхнічных задзелаў. Ён павінен дакладна ўказваць, куды рушаць тэхналогіі ў свеце, па якіх з іх мы маем кампетэнцы і здольныя выпускаць гатовую прадукцыю і на якіх рынках яна будзе карыстацца попытам. «Наша мэта — скласці практыкапрымяняльны дакумент для галіновых міністэрстваў, каб яны маглі выбудаваць «тэхналагічныя калідоры» на аснове сучасных тэндэнцый, якія будуць абазначаны», — падкрэсліла Таццяна Сталярова.
Як паведаміў начальнік аддзела інавацыйнай дзейнасці Міністэрства прамысловасці Сяргей Кабішоў, удзельная вага навукаёмістай і высокатэхналагічнай прадукцыі ў агульным аб'ёме экспартных арганізацый Міністэрства прамысловасці па выніках 11 месяцаў 2022 года склала 75 %.
Сярод напрамкаў перспектыўных даследаванняў і распрацовак — такія высокатэхналагічныя вытворчасці, як мікраэлектроніка, оптыка-механічная вытворчасць, станкабудаванне, электратранспарт і іншыя. Для вырашэння пастаўленых задач у сістэме Мінпрама 19 найбуйнейшых холдынгаў і арганізацый акрэдытаваны ў якасці навуковых. Па ўсіх ключавых напрамках развіцця ў холдынгавых структурах функцыянуе 16 цэнтраў кампетэнцый — галіновых лабараторый, напрыклад кар'ернай і шахтавай тэхнікі ў ААТ «БЕЛАЗ», навукова-даследчы цэнтр металургічнай вытворчасці ў ААТ «БМЗ», грузавых аўтамабіляў і пасажырскіх аўтобусаў — у ААТ «МАЗ» і г. д.
Напрамкі дзейнасці карпаратыўных навукова-тэхнічных цэнтраў вызначаюцца зыходзячы з патрэб канкрэтнага бізнесу. Іх работа дае магчымасць павысіць аддачу ад навукі і паскорыць працэс укаранення інавацый. У выніку зніжаюцца тэрміны распрацоўкі новай прадукцыі, падрыхтоўкі вытворчасці, павялічваецца канкурэнтаздольнасць беларускай тэхнікі.
Дзякуючы сумеснай рабоце галіновай і акадэмічнай навукі створаны беспілотныя кар'ерныя самазвалы, кар'ерны самазвал на электрацязе і гібрыдны самазвал, камбайн на газавым паліве, новыя электробусы і электрагрузавікі, новыя мадэлі пагрузчыкаў, седлавых цягачоў, аўтобусаў, сучасныя рухавікі ўнутранага згарання, якія адпавядаюць экалагічным нормам, унікальнае оптыка-механічнае абсталяванне для мікраэлектронікі.
Надзея НІКАЛАЕВА
Фота Лізаветы ГОЛАД
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
