Як абітурыенты БДУІР паўдзельнічалі ў рэаліці-шоу

«У апошні час з галавы не выходзіць думка пра тое, як зменіцца маё жыццё, калі я стану студэнткай БДУІР. Гэта штосьці невядомае і незразумелае для мяне. Дзякуючы гэтаму праекту ў мяне ёсць шанц нарэшце паглядзець свайму страху ў вочы, акунуцца з галавой у студэнцкае жыццё і развеяць усе сумненні наконт паступлення ва ўпадабаную ВНУ», — напісала ў сваёй заяўцы на ўдзел у праекце «#Я ў БДУІР: стань студэнтам на адзін дзень» вучаніца выпускнога класа жодзінскай сярэдняй школы №5 Алена Войтава.

Крэатыў вітаецца...

Днямі ў Беларускі дзяржаўны ўніверсітэт інфарматыкі і радыёэлектронікі завіталі 25 вучняў сталічных школ, якім прадставілася ўнікальная магчымасць прымераць на сябе ролю студэнта: пабываць на лекцыях, у вучэбна-навуковых лабараторыях і цэнтрах, зазірнуць у бібліятэку, падсілкавацца ў студэнцкай сталоўцы, ацаніць спартыўныя аб'екты ўніверсітэта, пазнаёміцца бліжэй з магчымасцямі для баўлення студэнтамі часу па-за вучобай і ўласнага развіцця...

Удзельнікамі праекта сталі адзінаццацікласнікі, якія выклалі фота з Дня адкрытых дзвярэй у Іnstаgrаm і даслалі свае заяўкі, дзе ў крэатыўнай форме (у тым ліку і ў вершаванай) патлумачылі, чаму менавіта яны павінны стаць студэнтамі на адзін дзень. Усяго адгукнулася каля 100 выпускнікоў з усёй краіны. З іх адабралі 50 чалавек і падзялілі на дзве групы. Кожнай групе адвялі свой дзень. Акрамя асноўнай праграмы, для іншагародніх удзельнікаў прадугледзелі яшчэ і экскурсію ў студэнцкі інтэрнат, бо для іх паступленне — толькі палова задачы. Не менш важна і, напэўна, страшна адарвацца ад бацькоў і наладзіць самастойнае жыццё ў інтэрнаце...

Да старту прыёмнай кампаніі ў краіне застаюцца лічаныя тыдні. Многае вырашаецца ўжо на этапе рэгістрацыі на цэнтралізаванае тэсціраванне, калі маладыя людзі вызначаюцца з пералікам экзаменацыйных дысцыплін. Таму канкурэнцыя паміж ВНУ за абітурыентаў рэзка абвастраецца...

Ад мары — да яе здзяйснення

— У лютым у Мінску прайшла традыцыйная выстава «Адукацыя і кар'ера», на якой вельмі сур'ёзна былі прадстаўлены ВНУ іншых краін: Польшчы, Чэхіі, Літвы, Латвіі... А Расія павялічыла свае выставачныя плошчы ўдвая... І ўсе вельмі цікава і нестандартна працавалі на прыцягненне нашых выпускнікоў, — мусіў канстатаваць рэктар БДУІР Міхаіл БАТУРА. — Таму мы палічылі, што нам трэба адваяваць сваю элітную моладзь. Вось і задумалі цэлы шэраг новых прафарыентацыйных мерапрыемстваў, у тым ліку і праект «Стань студэнтам на адзін дзень».

Між іншым, чацвёра ўдзельнікаў (два хлопцы і дзве дзяўчыны з Мінска і рэгіёнаў, якіх абралі ў сацыяльных сетках з дапамогай генератара выпадковых лікаў) сталі яшчэ і героямі рэаліці-шоу, якое здымала Маладзёжнае тэлебачанне БДУІР. Іх паўсюль суправаджалі камеры: задачай наваспечаных «тэлезорак» было падзяліцца сваімі эмоцыямі і ўражаннямі ад пачутага і ўбачанага. Пазней з відэаматэрыялу будзе зманціраваны відэаролік — своеасаблівая візітоўка для БДУІР.

А мы тым часам вырашылі пацікавіцца ў гасцей БДУІР іх жыццёвымі і прафесійнымі планамі.

Адзінаццацікласнік 191-й сталічнай школы Генадзь БАРАДУН шчыра прызнаўся, што яшчэ зусім нядаўна звязваў сваю будучыню з іншай ВНУ, але цяпер усур'ёз задумаўся над паступленнем у БДУІР. Засталося толькі вызначыцца з факультэтам і спецыяльнасцю.

— Канешне, было б класна паступіць на факультэт камп'ютарных сістэм і сетак, але я цвяроза і крытычна ацэньваю свае шанцы. Для мяне гэта суперзадача! Трэба вельмі сябраваць з фізікай, каб замахнуцца на спецыяльнасці з самымі высокімі прахаднымі баламі не толькі ў гэтым універсітэце, але і ва ўсёй краіне. Сёння мы наведалі шэраг факультэтаў, у тым ліку і факультэт камп'ютарнага праектавання, дзе нам расказалі пра спецыяльнасць «сістэмы бяспекі». Зацікавіў мяне і факультэт тэлекамунікацый. Мяркую, што паміж імі і буду выбіраць...

Вучаніца Мінскага дзяржаўнага абласнога ліцэя Вікторыя КОЛЕСЕНЬ даведалася пра праект яшчэ на Дні адкрытых дзвярэй: «Мне стала цікава. Я рэдка ўдзельнічаю ў нейкіх праектах і мала дзе выйграю. А тут вырашыла паспрабаваць, хоць асабліва ні на што не спадзявалася... У мяне сумненняў няма: планую паступаць у БДУІР на інжынерна-эканамічны факультэт на спецыяльнасць «электронны маркетынг» . Першапачаткова лічыла, што я — эканаміст у чыстым выглядзе, таму думала пра Беларускі дзяржаўны эканамічны ўніверсітэт. Але ў 11- м класе мяне зацікавіў БДУІР. Праграмісты заўсёды патрэбныя, але ў маім выпадку размова ідзе не проста пра праграміста, а пра спалучэнне двух спецыяльнасцяў: праграміст і маркетолаг. Выпускнікам прысвойваецца кваліфікацыя маркетолаг-праграміст. Лічу, што гэта вельмі перспектыўная спецыяльнасць... Разумею, што і прахадныя балы тут высокія, і што вучыцца ў тэхнічнай ВНУ будзе складана. Але студэнты з гэтага факультэта мяне заспакоілі: вучоба — цікавая. А гэта, напэўна, для мяне галоўнае...

Дарэчы, ні Вікторыя, ні яшчэ адзін выпускнік Мінскага дзяржаўнага абласнога ліцэя Уладзіслаў ШУЛЬЖЫЦКІ да паслуг рэпетытараў не прыбягаюць. Кажуць, што ведаў, якія ім даюць у ліцэі, павінна хапіць для паступлення нават на самыя прэстыжныя спецыяльнасці.

— Я звязаны з камп'ютарамі з чацвёртага класа. І ў пятым ужо быў упэўнены, што займуся чымсьці тэхнічным, — кажа Уладзіслаў. — У шостым і сёмым класе вырашыў, што буду вучыцца ў БДУІР. Далей стаў вагацца: можа, паехаць у Польшчу, у тэхнічны ўніверсітэт? Але пасля гутаркі з выпускнікамі ўніверсітэта зрабіў выбар на карысць БДУІР. У 10-м класе вызначыўся і з факультэтам (гэта ФКСіС), і са спецыяльнасцю («праграмнае забеспячэнне інфармацыйных тэхналогій»). Цэнтралізаванага тэсціравання не баюся. Зараз актыўна займаюся самападрыхтоўкай, каб добра здаць экзамены. Між іншым, сёння мы прысутнічалі на лекцыі па імітацыйным мадэляванні: было вельмі складана, але цікава. Ці ёсць у мяне падстраховачныя варыянты? Хіба што спецыяльнасць «інфарматыка і тэхналогіі праграмавання» на ФКСіСе... Цікавым мне падаўся і факультэт камп'ютарнага праектавання. Таму, калі штосьці не атрымаецца з першым варыянтам, буду арыентавацца на яго.

У сваёй заяўцы на ўдзел у праекце Уладзіслаў напісаў: «Мне так хочацца на адзін дзень уявіць сябе УЖО студэнтам гэтай ВНУ, пражыць гэты дзень клопатамі студэнта, акунуцца ў студэнцкае асяроддзе і зарадзіцца станоўчай энергіяй для рэальнага і ўдачнага паступлення у БДУІР! Я заўсёды веру ў сябе і сваю ўдачу».

Ніхто не застанецца па-за бортам

Апошнім пунктам для ўдзельнікаў праекта стала сустрэча з рэктарам БДУІР, прафесарам Міхаілам Батурам, які заклікаў іх не ленавацца і пры падачы заяў указваць у якасці прыярытэтных як мага большую колькасць спецыяльнасцяў.

— Аўтаматызаваная сістэма, якая дзейнічае ў БДУІР ужо некалькі гадоў, дазваляе карэктаваць залічэнне ў студэнты ў залежнасці ад расстаноўкі абітурыентамі прыярытэтаў і наяўнасці незапоўненых месцаў на тых ці іншых спецыяльнасцях, — патлумачыў ён. — У парадку ўбывання прыярытэтаў абітурыент можа пазначыць усе спецыяльнасці тэхніка-тэхналагічнага профілю. Такім чынам, шанцы застацца за бортам у абітурыентаў БДУІР мінімальныя, калі, вядома, яны не ўказалі ў сваім рэйтынгу толькі адну ці дзве спецыяльнасці.

Дарэчы, летась у БДУІР з'явілася новая спецыяльнасць «інфармацыйныя сістэмы і тэхналогіі ў гульнявой індустрыі», на якой былі прадугледжаны толькі платныя месцы. А сёлета тут будзе ажыццяўляцца набор і на 10 бюджэтных месцаў. Плюс яшчэ 50 абітурыентаў змогуць вучыцца на праграміста-геймдызайнера на платнай аснове.

— А ці ведаеце вы, што мы ўжо навучаем 46 грамадзян ЗША па дыстанцыйнай форме на дзвюх спецыяльнасцях? — пацікавіўся рэктар у юных гасцей.

— Не, не ведаем, — шчыра адказалі тыя.

— Значыць, вы яшчэ нічога не ведаеце пра наш універсітэт, — пажартаваў Міхаіл Батура і расказаў адзінаццацікласнікам пра студэнтаў універсітэта, якія гэтым летам у рамках праграмы Міжнароднай асацыяцыі па абмене студэнтамі для праходжання вытворчай практыкі ІАЕSTЕ будуць адточваць свае прафесійныя навыкі ў іншых краінах, а на іх месца ў Беларусь на практыку прыедуць студэнты-іншаземцы. Пра ўдзел студэнтаў-праграмістаў з БДУІРа ў фінале сёлетняга чэмпіянату свету па праграмаванні, які пройдзе ў маі ў Тайландзе...

Падчас выдачы ўсім удзельнікам праекта сертыфікатаў Міхаіл Батура цікавіўся ў кожнага з іх, куды той збіраецца паступаць.

— Яшчэ не ведаеце? Думайце... Любы факультэт вас чакае. І прыводзьце з сабой сваіх найлепшых сяброў.

— Не лепшых за нас! — жартавалі ў адказ школьнікі.

— А вы не бойцеся канкурэнцыі. Месцаў хопіць усім, — паабяцаў, развітваючыся з адзінаццацікласнікамі Міхаіл Батура.

nіkalaeva@zvіazda.by

Фо­та Сяр­гея Ні­ка­но­ві­ча