Паліцы кітайскіх кніг: новы праект

 У Міністэрстве інфармацыі Рэспублікі Беларусь адбылося пасяджэнне Каардынацыйнай групы па рэалізацыі Праекта перакладу і публікацыі класічных літаратурных твораў Кітая і Беларусі — пад старшынствам намесніка міністра інфармацыі Ігара Бузоўскага.

Удзел у пасяджэнні ўзялі кіраўнікі Выдавецкага дома «Звязда», выдавецтва «Мастацкая літаратура», прадстаўнікі ААТ «Белкніга», выдавецтва «Беларуская Энцыклапедыя імя Петруся Броўкі», рэдакцыі часопіса «Вясёлка». Размова ішла пра дасягнутыя дамоўленасці па супрацоўніцтве з кітайскім бокам па выніках удзелу беларускай дэлегацыі ў мерапрыемствах XXV Пекінскай міжнароднай кніжнай выстаўкі. Асобна была вылучана тэма адкрыцця ў мінскіх кнігарнях паліц кітайскіх кніг.

Таксама ішла гаворка пра новыя выдавецкія праекты, якія будуць прысвечаны перакладам кітайскай паэзіі і прозы на беларускую мову. Пашырыцца вядомая чытачу серыя «Светлыя знакі. Паэты Кітая», якой цяпер апякуецца выдавецтва «Мастацкая літаратура». Будзе выдадзены шэраг новых культуралагічных кніг, прысвечаных Паднябеснай.

Мікола РАЎНАПОЛЬСКІ