«За абслугоўванне легкавога аўтамабіля — дадатковая аплата ў памеры тарыфнай стаўкі»

У рэдакцыю газеты па нашай «гарачай лініі» патэлефанавала Ніна Аляксееўна Бярозка, якая пражывае ў вёсцы Любушаны Бярэзінскага раёна. Пытанне датычылася яе мужа Мікалая Мікалаевіча Цэдрыка, з якім, паводле слоў заяўніцы, не да канца разлічыліся (маецца на ўвазе заработная плата).

— Ён працаваў у філіяле «Купава-Агра». Па кантракце — кіроўцам службовага легкавога аўтамабіля. Аднак фактычна на лета мужа пераводзілі на іншую працу: на трактары ён касіў траву, на спецыяльнай машыне «Раса» ўносіў угнаенні. Нягледзячы на гэта, адначасова муж павінен быў даглядаць і замацаваную за ім службовую легкавую машыну, на якой у гэты час не ездзіў: мыць, запраўляць яе, рамантаваць. І вось менавіта за гэтую працу з ім цалкам не разлічыліся. За чэрвень заплацілі 400 тысяч рублёў, а за ліпень увогуле нічога не далі. Муж звольніўся 13 жніўня гэтага года па ўзгадненні бакоў, — даводзіла нам Ніна Аляксееўна.

З просьбай праверыць выкладзеныя факты і пры неабходнасці прыняць адпаведныя меры па выпраўленні сітуацыі мы звярнуліся да начальніка ўпраўлення сельскай гаспадаркі і харчавання Бярэзінскага райвыканкама Яўгена Круковіча.

Праз пэўны час атрымалі афіцыйны адказ наступнага зместу.

«Спецыялісты ўпраўлення сельскай гаспадаркі і харчавання Бярэзінскага раённага выканаўчага камітэта запрасілі ў работнікаў філіяла «Купава-Агра» інфармацыю адносна налічэння заработнай платы Мікалаю Мікалаевічу Цэдрыку за чэрвень-ліпень 2013 года. Згодна з прадастаўленымі данымі, Цэдрык М. М. адпрацаваў у філіяле ў якасці трактарыста-машыніста ў чэрвені 27 дзён (254 гадзіны) і ў ліпені — 23 дні (194 гадзіны).

Сапраўды, у гэты час па меры неабходнасці ён прыцягваўся да працы па мыйцы і абслугоўванні легкавога аўтамабіля, за што і праведзена дадатковая аплата ў памеры тарыфнай стаўкі. Фактычнае налічэнне зарплаты Цэдрыку М. М. за чэрвень склала 7 725 682 рублі, у тым ліку за мыйку і абслугоўванне легкавога аўтамабіля — 493 665 рублёў, у ліпені налічэнне склала 3 710 560 рублёў, у тым ліку за абслугоўванне легкавога аўтамабіля даплачана 488 235 рублёў».

Сяргей РАСОЛЬКА.