Віктар РУСАК, намеснік старшыні Пастаяннай камісіі Палаты прадстаўнікоў па нацыянальнай бяспецы, пракаментаваў пытанні, якія дагэтуль абмяркоўваліся на прэс-канферэнцыі Прэзідэнта і былі звязаны з рэфармаваннем судовай сістэмы, правядзеннем амністыі і тэмай палітычных зняволеных.
Віктар Русак падкрэсліў, што стан прававой сістэмы, шляхі яе рэфармавання заўсёды прыцягвалі ўвагу з боку амаль усіх пластоў насельніцтва. «Прававая сістэма пастаянна развіваецца — гэта аб'ектыўная неабходнасць, — заявіў парламентарый. — Але пры рэфармаванні яе важна прытрымлівацца медыцынскага прынцыпу «Не нашкодзь». І менавіта па такім шляху пайшлі ў свой час у Беларусі, калі ствараўся Следчы камітэт. У выніку яшчэ больш умацавалася працэсуальная незалежнасць следчага. А гэта, у сваю чаргу, уплывае на захаванне законнасці, гарантыі правоў грамадзян».
Гаворачы пра аб'яднанне агульных і гаспадарчых судоў у краіне, дэпутат выказаў упэўненасць, што дзякуючы гэтаму кроку павысіцца ўзровень абслугоўвання грамадзян, эфектыўнасць разгляду спраў. Такога кшталту рэарганізацыя стане ў нейкім сэнсе ажыццяўленнем прынцыпу «аднаго акна», што будзе зручна ў першую чаргу для грамадзян.
Тое ж самае можна сказаць і ў дачыненні да рэформы ў органах унутраных спраў: у выніку яе была рэарганізавана транспартная міліцыя. Па словах Віктара Русака, гэта накіравана на забеспячэнне сістэмнасці ў працы органаў унутраных спраў. «Разам з тым, — лічыць парламентарый, — нельга губляць унікальны вопыт транспартнікаў, усё лепшае павінна захавацца».
Што да чарговай амністыі, пра якую казаў Прэзідэнт у сваім выступленні, то дэпутат упэўнены, што гэта не прывядзе да пагаршэння крымінагеннай сітуацыі. Віктар Русак упэўнены, што амністыя мае вялікае выхаваўчае значэнне. «Навошта трымаць у месцах зняволення працаздольнага чалавека, калі ён нармальна сябе паводзіць і раскаяўся? — пытае парламентарый. — Сапраўды, былі выпадкі, калі тыя, хто трапіў пад амністыю, зноў станавіліся на злачынны шлях, але гэта не такая вялікая праслойка».
Віктар Русак адзначыў, што пад амністыю звычайна трапляюць у першую чаргу людзі, асуджаныя за злачынствы, якія не ўяўляюць сур'ёзнай пагрозы грамадству і дзяржаве. «Падыход максімальна індывідуальны, — дадаў дэпутат. — Не выпусцяць тых, хто асуджаны за асабліва цяжкія злачынствы, дрэнна паводзіць сябе ў месцах зняволення, захаваецца жорсткі падыход да карупцыянераў».
Дэпутат не выключае, што амністыю могуць прымеркаваць да пэўнага свята — напрыклад, да 70-годдзя вызвалення Беларусі ад нямецка-фашысцкіх захопнікаў.
У дадатак Русак закрануў тэму палітычных вязняў. Парламентарый упэўнены, што яна штучна навязваецца нашай краіне. Па яго словах, асобы, якія здзейснілі супрацьпраўныя дзеянні, павінны адбываць пакаранне ў адпаведнасці з заканадаўствам Рэспублікі Беларусь.
Надзея ЮШКЕВІЧ.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.