Генадзь ГРЫЦКЕВІЧ, старшыня пастаяннай камісіі Палаты прадстаўнікоў Нацыянальнага сходу Рэспублікі Беларусь па дзяржаўным будаўніцтве, мясцовым самакіраванні і рэгламенце выказаў сваё меркаванне наконт змен у выбарчым заканадаўстве:
— Цэнтральная выбарчая камісія, прадстаўнікі дэпутацкага корпусу на працягу пэўнага часу рыхтавалі законапраект па зменах і дапаўненнях у Выбарчы кодэкс — з 8 снежня мінулага года ён ужо працуе. І сёння — вельмі хутка пасля прыняцця — праводзіцца выбарчая кампанія ў новым фармаце і па новых правілах. Якасныя змены мы прымалі яшчэ ў 2010 годзе — тады было больш за 150 змяненняў і дапаўненняў, і яны былі істотнымі. Апошнія папраўкі ў выбарчае заканадаўства, прынятыя нядаўна з улікам вопыту правядзення ранейшых прэзідэнцкіх і парламенцкіх выбараў, таксама вельмі сур'ёзныя.
Значнай назваў бы змену, якая тычыцца фінансавання перадвыбарнай кампаніі. Так, раней грошы давалі самому кандыдату, цяпер жа акруговыя камісіі атрымліваюць фінансавую падтрымку і затым размяркоўваюць сродкі па ўчастковых камісіях. Я лічу, што такім чынам сума, якая выдзяляецца з бюджэту рэспублікі на правядзенне ўсёй кампаніі, хутчэй дойдзе па сваім прызначэнні — камісіі будуць накіроўваць гэтыя грошы ў адпаведнасці з Выбарчым кодэксам. На мой погляд, гэта вельмі істотная папраўка.
Што тычыцца фондаў, думаю, на выбарах у мясцовыя Саветы іх нават утвараць не трэба. Людзі з адной мясцовасці ведаюць адно аднаго. Калі там ёсць чалавек, які праявіў сябе з добрага боку, то за яго ўсё насельніцтва прагаласуе! Навошта тады гэтыя фонды арганізоўваць? Але наогул сам падыход — калі сродкі даюцца камісіі — я падтрымліваю. Гэта зроблена вельмі своечасова. Акруговая камісія данясе да выбаршчыка ўсе біяграфічныя даныя кандыдата ў дэпутаты, маленькія тэзісы яго праграмы — у тым ліку раскажуць, ці была судзімасць у чалавека, які хоча быць дэпутатам, за кошт чаго ён жыве. Раней мы ішлі на выбары і толькі там (чаго ўтойваць?) бачылі, за каго нам трэба будзе галасаваць. Таму што не кожны кандыдат у дэпутаты даносіць сваю інфармацыю — для гэтага трэба быць вельмі актыўным, мець добрую групу падтрымкі.
Што тычыцца байкоту выбараў, то гэтая забарона — своечасовая. Удумайцеся: за кошт грошай падаткаплацельшчыкаў — усіх нас — дазвалялася байкатаваць выбары! Гэта значыць, чалавек рэгіструецца кандыдатам, а затым у праграмах па радыё і тэлебачанні, у лістоўках заклікае да байкоту. Сёння ў гэтай сітуацыі пастаўлена кропка.
Я перакананы, што мы ўсе разам павінны ў любым працэсе ўдзельнічаць больш актыўна. Тым больш у выбарах: нам будаваць гэтае жыццё. І дэпутат — гэта не прафесія, а ў нейкім сэнсе твар дзяржавы. Ён прыходзіць працаваць на грамадскіх пачатках, удзельнічае ў распрацоўцы праграм, у грамадскім самакіраванні, у добраўпарадкаванні свайго мікрараёна. Трэба ўмець «працаваць» на выбаршчыка — гэта вельмі няпростая справа і ў той жа час вельмі ганаровая. Я лічу, што трэба прыйсці на выбары ўсім, таму што мы абавязаны выканаць свой канстытуцыйны абавязак.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?