Супрацоўнікі кампаніі «Яндэкс» падлічылі, колькі вуліц у беларускіх гарадах. У тройку лідараў па іх колькасці, паводле звестак сэрвісу «ЯндэксКарты», увайшлі Мінск, Магілёў і Віцебск. У сталіцы налічваецца каля 1300 вуліц, праспектаў, плошчаў, тупікоў і завулкаў, у Магілёве іх каля 900, у Віцебску — 850. Самым кампактным з абласных цэнтраў стаў Гродна — у горадзе 550 вуліц.
Не абышлі ўвагай спецыялісты і назвы. Самымі распаўсюджанымі (44%) аказаліся тапонімы, звязаныя з геаграфіяй, асаблівасцямі прыроды альбо іншымі адметнасцямі самой вуліцы: Чыгуначная, Заходняя, Цяністая, Шырокая і г.д. Пятая частка (22%) распаўсюджаных назваў звязана з савецкім мінулым і дзеячамі рэвалюцыі: вуліцы Леніна, Карла Маркса, Савецкая, Піянерская, Інтэрнацыянальная і іншыя. На трэцім месцы па папулярнасці — імёны і прозвішчы герояў, славутых палкаводцаў, лётчыкаў: Чкалава, Гастэлы, Суворава, Будзённага; крыху менш распаўсюджаны вуліцы, названыя ў гонар вядомых навукоўцаў, пісьменнікаў і іншых дзеячаў мастацтва: Янкі Купалы, Максіма Багдановіча, Пушкіна, Рэпіна.
— Мы пастараліся не проста скласці рэйтынг, а распавесці пра вуліцы буйных гарадоў штосьці раней не вядомае, — адзначае прадстаўнік прэс-службы кампаніі «Яндэкс» Уладзімір Ісаеў. — Напрыклад, ці ведалі вы, што ў Віцебску, дзе ёсць шмат кварталаў прыватнай забудовы, ёсць ажно 17 Лучоскіх, 17 Гарадоцкіх і 15 Полацкіх вуліц?
Больш за дзве тысячы, альбо каля паловы ад агульнай колькасці, вуліц у буйных беларускіх гарадах маюць унікальныя назвы, якія не сустракаюцца ў іншых абласных цэнтрах. У гэтым спісе лідзіруе таксама Мінск (57% унікальных назваў), а замыкаюць яго Брэст і Гомель (41%). У Магілёве, напрыклад, можна прагуляцца па «музычных» вуліцах Шуберта, Шапена, Моцарта і Бетховена, у кварталах прыватнай забудовы Брэста ёсць вуліцы Вольная, Добрая і Звонкая, а ў Гродне прыезджых парадуюць вуліцы Ветлівая, Сяброўская, Шчодрая і нават Экзатычная.
Вікторыя ЦЕЛЯШУК.
Сумесныя праекты ядзерных тэхналогій.
У парадку дня — зацвярджэнне Канцэпцыі нацбяспекі і Ваеннай дактрыны.
