Мікрафінансаванне ўвайшло ў наша жыццё імкліва і незаўважна. Мы больш не здзіўляемся паўсюднай рэкламе «пазыкі да зарплаты» і да таго падобнага. Мала таго, праз пэўны час Нацыянальны банк будзе кантраляваць гэты сегмент фінансавага рынку і сачыць за добрасумленнай працай мікрафінансавых арганізацый. У той жа час у многіх няма правільнага разумення, што сабою ўяўляюць «канторы», якія прыходзяць нам на дапамогу ў грашова цяжкія часіны. Насамрэч яны падзяляюцца на два вялікія лагеры: камерцыйныя і некамерцыйныя арганізацыі. У чым розніца паміж імі? Пра што трэба ведаць, калі ўступаеш у крэдытны кааператыў? Пра гэта распавядае Алена Каляда, старшыня праўлення Рэспубліканскай асацыяцыі спажывецкіх кааператываў фінансавай узаемадапамогі (РАФУ).
Віды МФА
Пачнём з таго, што сістэма мікрафінансавых арганізацый выглядае наступным чынам: «Адна галіна — камерцыйныя мікрафінансавыя арганізацыі, якія сёння вельмі актыўна працуюць, прапаноўваючы хуткія пазыкі. Другая — некамерцыйныя арганізацыі, або крэдытныя кааператывы, — тлумачыць Алена Каляда. — Апошнія, у сваю чаргу, можна падзяліць на некалькі катэгорый: 1) кааператывы для грамадзян (па сутнасці, аб'яднанне людзей з пэўнай мэтай — задавальненне сваіх фінансавых патрэб; удзельнікамі могуць быць толькі грамадзяне); 2) таварыствы ўзаемнага крэдытавання (кааператывы для суб'ектаў прадпрымальніцтва); 3) змешаныя кааператывы, якія аб'ядноўваюць як юрыдычных, так і фізічных асоб; 4) аб'яднанні другога ўзроўню, куды ўваходзяць толькі кааператывы, і служаць для пераразмеркавання ліквіднасці менавіта паміж імі, калі гэта патрэбна». Сёння РАФУ аб'ядноўвае ўсе віды кааператываў. «Між іншым, неўзабаве наша асацыяцыя будзе аб'ядноўваць і камерцыйныя арганізацыі. Праўда, не ўсе кааператывы былі за гэтае рашэнне. Многія лічаць, што ў кааператываў ёсць галоўнае адрозненне — іх даходы не размяркоўваюцца паміж удзельнікамі, няма генеральнага заснавальніка, які забірае сабе прыбытак. Грошы застаюцца ў агульным карыстанні і ідуць на патрэбы або ўсяго кааператыва, або яго членаў. Тут прысутнічае філасофія ўзаемадапамогі. У камерцыйных арганізацыях такога няма».
Сама спадарыня Алена бачыць перспектыву ў развіцці менавіта некамерцыйных МФА. «Сёння больш чым у сотні краін свету існуе сістэма некамерцыйных крэдытных кааператываў. Ёсць нават Сусветны савет крэдытных саюзаў. Ведаеце, 44–45% фінансавага абароту ЗША — у крэдытных кааператывах. Калі мы былі ў Амерыцы, першае месца, куды нас павялі, — гэта крэдытны саюз Дэпартамента ЗША. Там любая дзяржустанова, якая сябе паважае, мае свой крэдытны кааператыў».
Камунізм у дзеянні?
«Дзіўна, але ў камерцыйныя арганізацыі, дзе выдаюць пазыкі пад 2-5% у дзень, стаяць чэргі. У нас чэргаў няма, хоць максімальны працэнт, пад які мы выдаём, — 10% у месяц. Аднак многія пачынаюць заўважаць розніцу», — канстатуе кіраўнік асацыяцыі. Але камерцыйныя і некамерцыйныя арганізацыі адрозніваюцца не толькі працэнтамі па займах. Па-першае, гэта мэты стварэння: «Некамерцыйныя ствараюцца без мэты атрымання прыбытку, увесь прыбытак застаецца ў арганізацыі і накіроўваецца на патанненне паслуг; такія МФА, як правіла, маюць невялікі спектр паслуг (прыём і выдача пазык)». Толькі не трэба думаць, што нарэшце прыйшоў камунізм. Ёсць і іншыя аспекты. Па-другое, у некамерцыйнай арганізацыі няма ўласніка, а значыць, усе ўдзельнікі кааператыва з'яўляюцца яго ўласнікамі: «Калі чалавек уступае ў кааператыў, ён плаціць уступны ўзнос і пай (аналаг статутнага фонду) і становіцца сузаснавальнікам гэтай арганізацыі (усё, што ёсць у кааператыве, у пэўнай ступені належыць яму, але забраць гэта ён не можа). І тут трэба адзначыць важны момант — калі чалавек уступае ў кааператыў, ён адказвае па яго абавязацельствах. Калі кааператыў стратны (патраціў тое, што зарабіў, і ў яго нічога няма, акрамя абавязацельстваў па вяртанні ўкладаў), аўтаматычна гэтая адказнасць кладзецца на ўсіх удзельнікаў кааператыва. У гэтым выпадку нельга сказаць, што дырэктар кааператыва павінен вярнуць грошы. Гэта кругавая парука, другі бок слова «ўзаемадапамога». Калі мы ўступілі ў кааператыў, то мы адказныя за тое, што ў ім адбываецца. Таму ўдзельнікі павінны сачыць за кіраўніком, дзейнасцю, улікам, даходамі. Да нас часта людзі прыходзяць, не разумеючы, куды яны ўступілі. А вось у камерцыйнай арганізацыі ўсе страты — гэта страты заснавальнікаў». Трэба быць вельмі ўважлівым пры выбары крэдытнага кааператыва, каб прынесці грошы туды, дзе яны будуць надзейна схаваны і дзе можна абсалютна спакойна браць займы. Бо кааператывы бываюць розныя: «Аднойчы мы прыйшлі ў кааператыў, які працаваў ужо паўгода. Адкрываю асабовую справу пазычальніка — там ляжыць расходны ордар. «Калі пазычальнік грошы верне, я гэты ордэр выкіну», — кажа работнік кааператыва. «А грошы складваем у скрыначку», — дадае ён.
Трошкі гісторыі
Першыя крэдытныя кааператывы ўзніклі ў сярэдзіне ХІХ стагоддзя ў Германіі. Гэта былі кааператывы або касы ўзаемадапамогі, якія падтрымлівалі сялян падчас голаду і эканамічных цяжкасцяў. Піянер гэтага руху — Фрыдрых Вільгельм Райфайзэн (1818-1888), які задумаў ідэю кааператыўнай узаемадапамогі падчас знаходжання на пасадзе бургамістра аднаго з нямецкіх гарадоў, назіраючы за жыццём сялян, што знаходзіліся пад ціскам ліхвяроў. Ён заснаваў першы сельскі крэдытны спажывецкі кааператыў у 1864 годзе.
------
Чакаем вашых пытанняў пра карыстанне грашыма і ўсё, што з гэтым звязана. Вы можаце звяртацца на электронны адрас газеты іnfо@zvуаzdа.mіnsk.bу з пазнакай «для аддзела эканомікі» ці па тэлефоне 8 017 292 38 02.
Уладзіслаў КУЛЕЦКІ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?