На наступным тыдні Беларусь упершыню прыме даволі цікавыя і арыгінальныя спаборніцтвы — чэмпіянат Еўропы па міні-футболе сярод каталіцкіх святароў. Усе матчы з удзелам 13 каманд адбудуцца ў Лідзе і пройдуць адначасова на дзвюх спартыўных пляцоўках. Пра асаблівасці турніру «Звяздзе» распавёў капітан беларускай зборнай ксёндз Павел САЛАБУДА.
— Айцец Павел, якім чынам наша краіна атрымала права праводзіць у сябе падобны чэмпіянат?
— На леташнім першынстве Еўропы ў Славеніі да нас падышлі арганізатары. Сказалі, што хочуць пабачыць Касцёл Беларусі, і прапанавалі правесці ў 2014 годзе турнір у Беларусі. Мы пагадзіліся.
— Цікава, а калі ў нашай краіне з'явілася міні-футбольная зборная ксяндзоў?
— Зборная існуе ўжо чацвёрты год. Нягледзячы на гэта, футболам святары-зборнікі захапляюцца ўжо даўно. 80 працэнтаў гульцоў каманды наведвалі секцыі, дзіцячыя спартыўныя школы. Наш варатар наогул прафесійна займаўся гандболам. Сёння ў нашым складзе 17 гульцоў і 2 трэнеры. Найбольш святароў прадстаўляе Гродзенская дыяцэзія. Акрамя таго, ёсць прадстаўнікі і іншых дыяцэзій. Зразумела, сабраць усіх на турніры вельмі цяжка. Кожны мае свае абавязкі і працу, але мы спадзяёмся, што на нашы матчы прыедуць усе мацнейшыя. За нас, між іншым, будзе гуляць Мітрапаліт Мінска-Магілёўскі, архіепіскап Тадэвуш Кандрусевіч.
— Напэўна, ствараць баяздольную каманду каталіцкіх святароў у нашай краіне нялёгка ў параўнанні з тымі дзяржавамі, дзе каталіцтва з'яўляецца дамінуючым веравызнаннем.
— Так, і гэта разумее кожны. Гэта ў Польшчы ці Харватыі можна камплектаваць склад з 2 тысяч святароў, а ў нас выбар абмежаваны. Праўда, у зборных Украіны і Казахстана, які дэбютуе на падобных спаборніцтвах, сітуацыя з выбарам ксяндзоў-футбалістаў найгоршая. Рэгламент турніру дазваляе ўдзельнічаць у першынстве тым, хто паходзіць з той ці іншай краіны альбо працуе там сёння.
— Вы неяк прызналіся, што на хатнім першынстве зборная мусіць выступіць не горш, чым на леташнім турніры. У Славеніі наша каманда заняла 8-е месца. Цікава, а хто з'яўляецца фаварытам сёлетняга чэмпіянату?
— Галоўныя прэтэндэнты на прызавыя месцы — Польшча, Партугалія, Харватыя, Боснія і Герцагавіна. Гэта тыя чатыры каманды, якія заўсёды гуляюць на высокім узроўні. Наша сённяшняя каманда мацнейшая за леташнюю. І мы цяпер найперш хочам выйсці са сваёй падгрупы, у якой нашымі сапернікамі стане Чарнагорыя і Харватыя.
Першынство па міні-футболе сярод ксяндзоў — гэта спатканне еўрапейскіх святароў з розных краін. Мы хочам сустрэцца, пагаварыць, падзяліцца вопытам. Тым больш адзін аднаго добра ведаем. Акрамя таго, сёння праз спорт мы можам выйсці на людзей, якія, магчыма, не заўсёды ходзяць у касцёл. Для нас гэта асноўная задача. Аднак чэмпіянат — гэта спаборніцтвы, і кожны хоча сябе паказаць з найлепшага боку і быць на першым месцы. Святары з Беларусі ў гэтым не выключэнне.
— Чуў, што асноўная праблема для многіх удзельнікаў звязана з атрыманнем візы.
— Яна не існуе. Удзельнікі, якія будуць дабірацца ў Ліду аўтобусамі, візы ўжо атрымалі ў сваіх краінах. А тыя каманды, што будуць ляцець самалётамі, атрымаюць іх у аэрапорце.
— Ці будзе добрая падтрымка ад гледачоў?
— Так, лічу, будзе шмат балельшчыкаў. Чуў, што падтрымаць нашу каманду прыедуць з Мінска, Гродна. Спадзяюся, на трыбунах будуць балельшчыкі і з іншых куткоў Беларусі. Ніякіх квіткоў набываць не прыйдзецца. Паглядзець матчы здолее кожны ахвотны. Запрашаем усіх прыходзіць на матчы і падтрымліваць нашу каманду.
Тарас ШЧЫРЫ.
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».