Пасля рэзкага скачка цэн на мяса, які адбыўся ў канцы мая — пачатку чэрвеня, часовае зацішша. Сёння ў магілёўскіх магазінах кілаграм свініны каштуе: шыйнай часткі ад 87500 рублёў (Магілёўскі мясакамбінат) да 108500 (ААТ «Александрыйскае»), лапатачнай — ад 85300 (агракамбінат «Усход») да 96500 (Магілёўскі мясакамбінат), тазабедранай — ад 83850 (агракамбінат «Зара») да 97100 (ААТ «Александрыйскае»). Каля мясных прылаўкаў магазіна сеткі «Квартал» па вуліцы Першамайскай свабодна. Кілаграм мяса катлетнага тут прапаноўваюць аж за 82 тысячы рублёў. Амаль на 14 тысяч даражэй каштуе свініна з лапаткі. Бядро курынае каштуе 53950 рублёў за кіло.
На Цэнтральным рынку Магілёва мяса на любы густ — былі б грошы. Але народ не вельмі спяшаецца яго набываць. Вось падышла бабулька, прыцанілася і ўзяла кілаграм больш таннай пячонкі па 35 тысяч рублёў. «А выразка не па маім кашальку, — патлумачыла яна. — Яшчэ ў канцы мая кілаграм мяса з шыйнай часткі каштаваў каля 70 тысяч рублёў, а сёння танней, чым за 95 тысяч не знайсці».
— Не, мяса — гэта не для нас, — уздыхае жанчына сярэдніх гадоў. — Не паверыце, у канцы мая свіны разруб набывала ў калгасных крамах па 35 тысяч рублёў за кілаграм, а цяпер ён удвая даражэйшы. Учора ўбачыла сасіскі вышэйшага гатунку амаль па 70 тысяч за кілаграм. Дык там таго мяса кот наплакаў.
Цэны і насамрэч уражваюць, нягледзячы на тое, што гэта будны дзень, прычым другая палова. Калі меркаваць па вітрынах, пакупнікоў было няшмат. Сімпатычная прадаўшчыца абяцае аддаць свой тавар танней, але, калі глядзіш на цэннікі — 130 тысяч за паляндвіцу, 90 тысяч за лапатачную частку — нават яе зніжкі не цікавяць. Якая карысць ад «сэканомленых» 2-3 тысяч?
Вось жанчына просіць узважыць на 100 тысяч ялавічных абрэзкаў па 30 тысяч за кілаграм. Кажа, што ёй вельмі пашанцавала купіць добры кусок з лапаткі ўсяго за 75 тысяч. Катлеты атрымаюцца добрыя. Муж пастаянна ў камандзіроўках, трэба нешта з сабой у дарогу ўзяць. Яшчэ выратоўвае салёнае сала, але яно па 130 тысяч за кілаграм і цана на яго яшчэ не зніжалася.
— А я знайшла, як выйсці са становішча, — падзялілася яшчэ адна жанчына. — Набываю курынае шашлычнае мяса ў калгасным магазіне па цане 40 тысяч за кілаграм, перакручваю яго са свінінай, і атрымліваюцца цудоўныя катлеты. Такія паўфабрыкаты сёння каштуюць да 70 тысяч рублёў. Але там спрэс адны жылкі і храсткі.
Больш пакупнікоў вакол курыных прылаўкаў. Хаця і тут цэны ўзляцелі. Тая ж бройлерная курыца яшчэ, здаецца, месяц таму каштавала 23-24 тысячы за кілаграм, а цяпер ужо 29950 — 32100 рублёў. Супавую курыцу, дзе касцей больш, чым мяса, можна набыць па цане 21700-23800 за кілаграм. А вось кіло курынага бядра каштуе ў межах 52950—56600 рублёў, грудак — 53950—57050, кумпячкоў — 42500—49000 рублёў.
Але ёсць на рынку мясныя кропкі, дзе пакупнікоў зашмат. Ледзь праціскаюся ў фірменны кіёск ад прадпрыемства «Магілёўхлебапрадукты». Выразка каштуе каля 93 тысяч рублёў — амаль на
30 тысяч танней за базарную, фарш свіны — 58100 рублёў, кіло тазабедранай часткі больш за 86 тысяч рублёў. Нехта цікавіцца свіным рагу, але яго няма. Кажуць апошні раз «косці» прадаваліся па 10 тысяч за кілаграм.
Каля кіёска сельгаспрадпрыемства «Авангард» чарга чакае машыну з таварам. Прадаўшчыца п'е чай і не супраць падзяліцца меркаваннем наконт цэн. «У нас нічога не затрымліваецца, — запэўнівае яна. — Паглядзіце, колькі каштуе мяса ў прыватнікаў. За выразку ў выхадныя там просяць да 150 тысяч за кіло, а наша каштуе каля 90 тысяч. І астатнія цэны вельмі прывабныя: лапатка —
80 тысяч, тазавая частка — 84 тысячы, свежае сала 43500, грудзінка — 45 тысяч. Гэта нармальныя цэны. А 12 гадзіне ў мяне прывоз, а пасля дзвюх ужо нічога не застаецца».
Да кіёска пад'язджае машына, і прадаўшчыца бяжыць прымаць тавар. Кіроўца адчыняе дзверцы кузава, і людскі натоўп ледзь не ўскоквае ўнутр. Кіроўца сярдзіта крычыць: «Людзі, дайце разгрузіцца!» Але яго мала хто слухае. Усе хочуць мяса. Таннага.
Нэлі ЗІГУЛЯ.
Сумесныя праекты ядзерных тэхналогій.