У Генеральнай пракуратуры прайшло пасяджэнне рэспубліканскай каардынацыйнай нарады па барацьбе са злачыннасцю і карупцыяй. Падчас мерапрыемства абмяркоўваўся шэраг пытанняў, галоўным сярод якіх была прафілактыка карупцыі.
Нягледзячы на тое, што ў перыяд з 2010 па 2013 год колькасць выяўленых карупцыйных злачынстваў знізілася на 10%, агульны стан барацьбы з хабарамі пакідае жадаць лепшага. Самыя праблемныя сферы, у якіх сёлета зафіксавана найбольшая колькасць карупцыйных злачынстваў: дзяржаўнае кіраванне, ахова здароўя, прамысловасць, будаўніцтва, адукацыя.
Сярод галоўных перашкод антыкарупцыйнай дзейнасці называліся фармалізм, з якім да барацьбы з хабарніцтвам падыходзяць мясцовыя ўлады; неэфектыўная праца камісій па супрацьдзеянні карупцыі, кіраўнікі і члены якіх часта не валодаюць неабходнымі ведамі і не маюць пэўных паўнамоцтваў для такой працы, і іншыя.
—Галоўная праблема заключаецца ў тым, што антыкарупцыйныя органы звычайна працуюць па факце злачынства. Задача на сёння — прафілактыка парушэнняў у гэтай сферы. Таксама важна вызначыцца, ці патрэбны нам антыкарупцыйныя камісіі, калі іх праца не прыносіць плёну, — адзначыў генеральны пракурор Аляксандр КАНЮК.
Па словах кіраўніка ведамства, прававых інструментаў для эфектыўнай барацьбы з хабарніцтвам у краіне хапае. Выкрывальнасць злачынстваў знаходзіцца на высокім узроўні, але іх папярэджанне не задавальняе Генпракуратуру.
Вынікам нарады стаў шэраг даручэнняў. Так, органам дзяржаўнага кіравання, аблвыканкамам, Мінгарвыканкаму трэба правесці аналіз расходавання бюджэтных сродкаў, вызначыць карупцыйныя рызыкі ў кожным адгалінаванні дзейнасці і распрацаваць планы па іх мінімізацыі і выкараненні. Павінны быць створаны комплексныя праграмы па прафілактыцы злачынстваў на наступны год, у якія ўвойдуць канкрэтныя мерапрыемствы па папярэджанні карупцыйных правапарушэнняў.
Акрамя гэтага, Міністэрству адукацыі сумесна з Акадэміяй кіравання пры Прэзідэнце прапанавана распрацаваць і ўкараніць у ВНУ навучальны цыкл «Супрацьдзеянне карупцыі» для студэнтаў, якія вучацца на спецыяльнасцях, звязаных з дзяржаўным кіраваннем, эканомікай і юрыспрудэнцыяй.
Яраслаў ЛЫСКАВЕЦ.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?