У штотыднёвым аглядзе «Звязды» расказваем пра папаўненне ў сям'і самай тытулаванай біятланісткі краіны, вынік другога паядынку БГК імя Мяшкова ў Лізе чэмпіёнаў і пераможнай серыі мінскіх хакеістаў у Кантынентальнай хакейнай лізе.
1. Трохразовая алімпійская чэмпіёнка Дар'я Домрачава стала мамай. Біятланістка нарадзіла дачку, вага дзяўчынкі — 3650 г.
— Мы сталі бацькамі маленькай дзяўчынкі. Яна нарадзілася ў 10.20 раніцы па мясцовым часе (у суботу). Усё прайшло добра. Мы абодва гордыя бацькі, — заявіў бацька дзіцяці, біятланіст Уле-Эйнар Б'ёрндален нарвежскаму выданню VG sporten.
Нараджала Дар'я Домрачава ў радзільным доме 6-й клінічнай бальніцы Мінска. Са з'яўленнем на свет дачкі яе павіншаваў Аляксандр Лукашэнка.
Нагадаем пра тое, што Дар'я Домрачава і Уле-Эйнар Б'ёрндален чакаюць дзіця, стала вядома ў красавіку. Да апошняга часу было сакрэтам, якога полу будзе дзіця. Ці вызначыліся бацькі з імем для дачкі, пакуль таксама не паведамляецца.
2. Брэсцкі гандбольны клуб імя Мяшкова ўступіў македонскаму «Вардару» ў выязным паядынку другога тура Лігі чэмпіёнаў.
Як і ў першым матчы з польскім «Віве», у стартавай палове сустрэчы брастаўчане мелі перавагу, але на перапынак каманды пайшлі ўжо з роўным лікам на табло — 13:13, а другі тайм наогул склаўся цалкам па процілеглым сцэнарыі. «Вардар» літаральна за пяць хвілін забяспечыў сабе ўпэўненую перавагу ў некалькі ачкоў і ўтрымаў яе да фінальнага свістка — 31:27.
Пасля двух тураў лідарства ў групе В у Лізе чэмпіёнаў захапілі «Вардар» і польскі «Віве». Брэсцкі гандбольны клуб імя Мяшкова пакуль ачкоў не набраў. Наступны матч у турніры БГК правядзе на дамашняй арэне з чэмпіёнам Германіі «Райн Левен».
3. Хакеісты мінскага «Дынама» атрымалі пятую перамогу запар у чэмпіянаце Кантынентальнай хакейнай лігі. «Зубры» адолелі сапернікаў з ніжнякамскага «Нафтахіміка» з лікам 4:2 і ўстанавілі клубны рэкорд па колькасці матчаў без паражэнняў на выездзе.
Нагадаем, раней падапечныя Крэйга Вудкрафта атрымалі перамогі дома над «Сібір'ю» (5:4), у гасцях над маскоўскім «Дынама» (3:0), казанскім «Ак Барсам» (5:3), тальяцінскай «Ладай» (3:2).
Сёння мінскія хакеісты згуляюць на сваёй пляцоўцы з «Лакаматывам».
4. Завяршыліся ўсе матчы 24-га тура элітнага дывізіёна чэмпіянату краіны па футболе. «Крумкачы» з буйным лікам уступілі «Слуцку» — 0:3, гродзенскі «Нёман» атрымаў перамогу над «Славіяй» з Мазыра — 3:1. «Белшына» саступіла «Тарпеда-БелАЗ» — 1:3, такі ж лік быў зафіксаваны і ў матчы «Граніта» і «Нафтана», футбалісты з Наваполацка былі мацнейшыя. «Мінск» на сваім полі атрымаў перамогу над «Гарадзеяй» — 3:1, «Віцебск» саступіў мінскаму «Дынама» — 0:2. БАТЭ дома з буйным лікам перайграў «Іслач» — 4:1. «Дынама-Брэст» мінімальна саступіў салігорскаму «Шахцёру» — 1:2.
Такім чынам, БАТЭ працягвае ўпэўнена лідзіраваць у чэмпіянаце, салігорскі «Шахцёр» утрымлівае другі радок, трэцім ідзе мінскае «Дынама». У зоне вылету застаюцца «Нафтан» і «Белшына».
Дар'я Лабажэвіч
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.