У Мар'інай Горцы адкрылі пляцоўку для адходаў электроннага і электрычнага абсталявання. Будаўніцтва аб'екта адбылося пры падтрымцы акцыянернага таварыства «Экапартнёрства» ў рамках праекта «Развіццё ў сферы кіравання адходамі для сельскага насельніцтва Пухавіцкага раёна Мінскай вобласці», які фінансуецца Еўрапейскім саюзам.
Зараз жыхарам раёна дастаткова звязацца з дыспетчарам УП «Жылцяплосэрвіс» Пухавіцкага раёна і ўзгадніць час вывазу згаданых адходаў. Акрамя гэтага, гараджане і сельскія жыхары могуць самастойна ў зручны для іх час адвезці старую бытавую тэхніку або батарэйкі на пляцоўку, дзе таксама размешчаны кантэйнеры для збору пластыка, паперы, шкла і ртуцьзмяшчальных лямпаў.
— Дзякуючы ўдзелу ў гэтым праекце сёння мы можам прыехаць у любы пункт раёна ў зручны для людзей час і забраць адходы, якія раней маглі апынуцца дзе-небудзь на вуліцы, — кажа дырэктар унітарнага прадпрыемства раёна Іосіф Кучко. — Акрамя гэтага, у рамках ініцыятывы нам удалося ўцягнуць у працу вялікую колькасць школьнікаў, якіх мы вучым правільна сартаваць адходы.
Гэты праект рэалізуецца ў Мінскай вобласці з 2016 года, яго бюджэт складае 391,7 тысячы еўра. Акрамя пляцоўкі, у рамках ініцыятывы ўжо атрымалася ўстанавіць кантэйнеры для адпрацаваных батарэек, набыць грузавы міні-аўтобус для збору электрычнага абсталявання ў раёне, бульдозер для ліквідацыі звалак, драбільны коўш і лінію для прасавання ПЭТ-бутэлек. Таксама ў сельскіх школах былі добраўпарадкаваны пляцоўкі для кампаставання арганічных адходаў, а ў раёне было ўстаноўлена дзве камеры для маніторынгу несанкцыянаваных звалак.
Сяргей КУРКАЧ
З мастацтвам па жыцці.
Баявое ўзаемадзеянне найвышэйшага ўзроўню.
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
