Два браты ў Мінску скралі з пад'ездаў больш за 200 пажарных рукавоў

Два браты ў Мінску скралі з пад'ездаў жылых дамоў больш за 200 пажарных рукавоў, паведамілі ў ГУУС Мінгарвыканкама.

Злачынствы адбываліся ў некалькіх раёнах. Супрацоўнікі аддзела крымінальнага вышуку Першамайскага РУУС ўстанавілі асобы падазраваных у крадзяжах. Імі аказаліся два браты - 43-гадовы і 34-гадовы мінчане. Абодва раней былі судзімыя: адзін за крадзяжы, другі за хуліганства.

Аператыўнікі вылічылі, што крадзеныя рэчы мужчыны хавалі ў арэндаваным гаражы. "Пры ператрусе там былі выяўлены больш за 200 пажарных рукавоў і камплектуючых да іх. Затрыманыя расказалі, што крадзеныя рукавы прадавалі на рынках пераважна фермерам, якія далей выкарыстоўвалі іх для самаробнай сістэмы арашэння. Першапачатковая цана за адну адзінку складала Br20, далей разам з попытам кошт узрастаў . Арыентыровачная шкода складае больш за Br5 тыс.", - праінфармавалі ў ГУУС.

Цяпер зламыснікі знаходзяцца ў ізалятары часовага ўтрымання. Заведзена крымінальная справа па ч.2 арт.205 КК (крадзеж).

БЕЛТА