Вы тут

«Дрэнныя хлопцы назаўсёды»: яшчэ адзін фільм, дзе палаючы дом абвальваецца якраз за спінамі герояў


Заўсёды вельмі проста вылічыць, на якую стужку «ставіць» кінапракат, а значыць і дыстрыб'ютар: такія ідуць па ўсіх мажлівых кінатэатрах па некалькі разоў на дзень. Убачыш сетку паказаў — і ўжо ведаеш, што гэта «козыр», які за рэдкім выключэннем абавязкова кіруецца забаўляльнымі задачамі і не ўтрымлівае ў сабе нічога большага за непрыхавана камерцыйны экшэн і суцэльныя спецэфекты. Гэтым разам рукі пацірае з дзясятак галівудскіх кінакампаній, датычных да стужкі «Дрэнныя хлопцы назаўсёды»: працяг нізка ацэненых фільмаў пра крутых дэтэктываў Маркуса Бёрнэта і Майка Лоўры стаў адным з лідараў пракату. «Казачны» сцэнарый, найпрасцейшы, калі не казаць пра тэхнічны аддзел і каскадзёраў, спосаб яго ўвасаблення, так сабе гумар — некалькі разоў на дзень у кожным кінатэатры.


Самы раз, каб змарнаваць час бясследна. Гледачу ўжо вядомыя гэтыя героі ў выкананні Уіла Сміта і Марціна Лоўрэнса — славутыя непераможныя «дрэнныя хлопцы», дружбаны і напарнікі, грозы злачынцаў і наркабаронаў, якія з рашучасцю на мяжы безразважнасці, гумарам і нават уласнай песняй раскідваюць праціўнікаў.

У трэцім фільме пра дэтэктываў іх заданнем становіцца выяўленне мсціўца, які некалькі разоў стрэліў у Лоўры — той трапіў у шпіталь, тройчы перажыў клінічную смерць, але выжыў і прыйшоў на вяселле дачкі свайго напарніка. Крыху пазней мсцівец стрэліць у іх начальніка капітана і толькі адной куляй заб'е беспаваротна, каб праз параўнанне крутасць Лоўры была відавочная. Зразумела, у работу паліцэйскіх зноў умяшалася нешта асабістае, але што дакладна і хто гэтыя небяспечныя, і таксама рэзкія, мексіканцы — дэтэктывам з дапамогай асобнага і добра ўкамплектаванага паліцэйскага аддзела давядзецца высвятляць.

А каб жыццё не здавалася малінай і фільм расцягнуўся на больш чым дзве гадзіны суцэльнай весялосці, на шляху персанажаў да мэты апроч боек і спецаперацый павінны быць іншыя перашкоды, добра яны ўпісваюцца ў сцэнарый ці не. Бёрнэт, напрыклад, паабяцаў Богу, што перастане «сеяць гвалт» на зямлі, калі яго сябар выжыве, і сапраўды сыходзіць на пенсію, нягледзячы на просьбу Лоўры дапамагчы яму ў апошняй справе. Вядома ж, на час, але штамп бразільскіх серыялаў рассыпле па экране драматычныя ноты і стане нагодай для серыі жартаў.

Спецаддзел, што займаецца справай мсціўца Лоўры, у рэшце рэшт закрыюць, але гэта, вядома ж, не сыграе ніякай ролі, толькі зойме час: ён усё роўна адправіцца на дапамогу, бо паліцэйскія ў «Дрэнных хлопцах назаўсёды» абсалютна аўтаномна вырашаюць свае справы, не зважаючы ні на якія забароны і карыстаючыся прасунутай казённай тэхнікай.

Урэшце, серыя боек у пошуках вінаватых у нападзенні на Лоўры будзе амаль што толькі серыяй боек дзеля боек, бо мсцівец усё роўна сам знойдзе сваю мэту і сам дасць адказ на ўсе пытанні. Адным словам, імкненне ўмясціць як мага больш уражальных эпізодаў у сцэнарый выклікае вялікія пытанні. «Дрэнныя хлопцы назаўсёды» сапраўды не асабліва клапоцяцца аб грунтоўнасці гісторыі і дапасаванасці адной яе часткі да другой — усім кіруе патэнцыял дынамічнасці, што ў кампаніі з некалькімі жартамі мусіць не дазволіць гледачу адарвацца ад экрана.

Глядач і не адарвецца — фільм дарагі, відовішчны і насычаны, адно непераканаўчы да немагчымасці, — хопіць толькі пагоні, у якой дэтэктывы будуць ехаць на матацыкле, у іх будуць бясконца страляць ззаду, але ні разу не трапяць.

У той жа час цікава, што ўвасабленнем зла з наркагандлем і нават вядзьмарствам у галівудскіх кампаніях становяцца мексіканцы, а галоўныя героі — дэтэктывы — тусуюцца ў шыкоўных пентхаусах з басейнамі і неперадавальнымі краявідамі на Маямі і ездзяць на дарагіх аўтамабілях.

Выкарыстаўшы старыя прыёмы — палаючы дом, напрыклад, абваліцца толькі тады, калі кульгаючыя героі з яго выйдуць, — аўтары стужкі прапанавалі чарговы баявік, які, па сутнасці, з'яўляецца казкай, распухлай ад непатрэбных сюжэтных элементаў. «Дрэнныя хлопцы назаўсёды» — у пракаце да 12 лютага.

Вольга МІЦКЕВІЧ

Загаловак у газеце: Знаёмыя прыёмчыкі

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

Казярогам важна на гэтым тыдні скончыць неадкладную справу, якая ўжо даўно не дае спакою.

Здароўе

Як вясной алергікам аблегчыць сваё жыццё?

Як вясной алергікам аблегчыць сваё жыццё?

Некалькі парад ад урача-інфекцыяніста.