Вы тут

НАК Беларусі павіншаваў шматдзетных маці са святам


Нацыянальны алімпійскі камітэт Рэспублікі Беларусь павіншаваў шматдзетных маці з іх «прафесійным» святам. 14 кастрычніка жанчыны, якія ўзнагароджаны ордэнам Маці, разам са сваімі дзецьмі пазнаёміліся з гісторыяй развіцця алімпійскага руху ў Беларусі. Наведвальнікі музея алімпійскай славы на свае вочы ўбачылі ўнікальныя ўзнагароды славутых чэмпіёнак Дар’і Домрачавай, Алены Бяловай і іншых спартсменак, многія з якіх таксама мамы. Усяго ў экскурсіі прынялі ўдзел 25 сямей з дзецьмі ад 10 да 16 гадоў. Кожная маці і дзіця атрымалі памятны падарунак ад НАК Беларусі.


Свае сакрэты спартыўнага і мацярынскага майстэрства расказала бронзавы прызёр Алімпійскіх гульняў у Афінах, васьміразовая чэмпіёнка свету па веласіпедным спорце Наталля Цылінская. Наталля — маці чатырох дзяцей, таму тэм для размовы з удзельнікамі мерапрыемства знайшлося нямала. Дзеці больш цікавіліся спартыўным жыццём чэмпіёнкі. А мамы, зразумела, актыўна пыталіся, як сумяшчаць спартыўную кар’еру і мацярынства, як расціць дзяцей у любові да спорту і пра іншыя моманты выхавання дзяцей.

«Я ганаруся тым, што ў мяне чацвёра дзяцей. Я не ведаю, добрая я маці ці не. Спадзяюся, што добрая, мае дзеці мне праўду не скажуць, для іх я заўсёды лепшая. Але жанчыны, у якіх яшчэ больш дзяцей — неверагодныя, вялікія людзі. Сённяшняя сустрэча прайшла нібы ў воблаку, яны такія мяккія, цёплыя, утульныя, ад іх ліецца мацярынская любоў. І я адчула сябе маленькай дзяўчынкай побач з імі.

У мацярынства і спорту няма нічога агульнага, акрамя мяне. Спорт — гэта гонка, а мацярынства — любоў. У спорце ты адказваеш сам за сябе, а маці нясе адказнасць за будучае жыццё чалавека. Менавіта ад яе залежыць, якім вырасце дзіця. Усе ж дзеці нараджаюцца аднолькавымі — анёламі. Быць маці цяжэй, чым спартсменкай, але больш прыемна.

Усім мамам я жадаю здароўя, цярпення і не хацець, каб дзеці сталі чэмпіёнамі. Проста любіце іх і накіроўваеце, не ставячы ніякіх мэтаў. Дзеці самі зробяць выбар і тады вы будзеце імі ганарыцца», — адзначыла Наталля Цылінская.

Валерыя СЦЯЦКО

Фота Ганны ЗАНКАВІЧ

Выбар рэдакцыі

Грамадства

Захаваць. Нельга знесці

Захаваць. Нельга знесці

Знакі прыпынку нарэшце расстаўлены.

Калейдаскоп

Усходні гараскоп на наступны тыдзень

Усходні гараскоп на наступны тыдзень

Стральцам на гэтым тыдні не трэба пераацэньваць сваіх магчымасцяў.