«Нам патрэбны тэхнічныя эрудыты, у якіх пры размове пра воблачныя тэхналогіі вочы гараць»*

Напярэдадні прафесійнага свята сувязістаў карэспандэнт «Звязды» гутарыць з вядучым спецыялістам па рабоце з персаналам кампаніі МТС Святланай Абраменкай. Па выніках 2020 года кампанія прызнана найлепшым работадаўцам Беларусі ў намінацыі тэлекамунікацый.

— Падборам кандыдатаў на работу да нас займаецца профільны аддзел, які падыходзіць да справы сур'ёзна. Запаўняюцца анкеты, вядуцца субяседаванні, кандыдатаў знаёмяць з кіраўнікамі нашых дэпартаментаў. Падыход дыферэнцыраваны — у залежнасці ад таго, што ад спецыяліста спатрэбіцца ў далейшым. У выніку прымаецца рашэнне, ці падыходзіць чалавек на тую або іншую пазіцыю. На работу бяром галоўным чынам выпускнікоў тэхнічных ВНУ. Учарашнім студэнтам прызначаецца настаўнік, і з яго дапамогай навічок павінен «упісацца» ў графікі работы, у зменнасць, спецыфіку сваёй пасады.

Маладыя людзі часцей за ўсё ідуць да нас па перспектывы. Дасягаюць іх — застаюцца надоўга. У кампаніі вялікія магчымасці для прафесійнага росту. Заўсёды назіраецца нейкі рух паміж падраздзяленнямі — дзяўчаты, што займаюцца продажамі, пераходзяць, напрыклад, у маркетынг, а нашы «тэхнары» становяцца, скажам, дызайнерамі і гэтак далей. У такога кадравага руху ёсць свая жыццёвая логіка, і перад вачыма разгортваецца цэлы калейдаскоп чалавечых лёсаў. Каб уплываць на яго з карысцю для справы, патрэбна глыбока ўнікаць у прычынна-выніковыя сувязі і абавязкова — з клопатам пра чалавека.

У нас штогод праводзіцца ацэнка персаналу, і перад гэтым ідзе яго апытанне ў некалькі этапаў — як каму працуецца, ці ёсць праблемы, якія шляхі іх выпраўлення. Калектыўная думка аналізуецца, робяцца вывады. Вызначаеца так званы хэпі-індэкс (у нашым выпадку — думка персаналу пра сваю работу ў кампаніі), і гэты паказчык — восем з дзесяці магчымых, трымаецца каторы год. Персанал надзвычай зацікаўлены ў дасягненні мэт, якія ставяцца перад кампаніяй. І тое, што МТС пастаянна развіваецца, — гэта вынік працы ўсяго калектыву.

Таксама работнікам даецца магчымасць павучыцца на курсах павышэння кваліфікацыі — для ўдакладнення прафесійных ведаў. А калі была ўведзена дыстанцыйная работа, з'явілася неабходнасць для новай вучобы, былі арганізаваны лекцыі для больш хуткай адаптацыі ў новых рэаліях.

— І ўсё ж, як удаецца пераканаць персанал у неабходнасці высокаэфектыўнай работы ва ўмовах даволі жорсткай канкурэнцыі?

— Сёння наша кампанія — адзін з самых буйных тэлекамунікацыйных аператараў у Беларусі. Трапіць да нас на работу сапраўды няпроста. Трэба быць спецыялістам у сваёй справе, прычым — перспектыўным, шматабяцальным. Калі коратка, то нам патрэбны тэхнічныя эрудыты, пажадана з тым ці іншым досведам работы, у якіх пры размове пра воблачныя тэхналогіі вочы гараць. І яны гатовыя вучыцца далей, павышаць кваліфікацыю, бываць у камандзіроўках. Зразумела, такі спецыяліст будзе для нас цікавы.

Цяпер можна матываваць работніка працяглымі кантрактамі — на тры, чатыры, пяць гадоў. Мы афармляем адносіны так, як жадае работнік.

— Ці можна вашы патрабаванні да персаналу назваць унутранымі стандартамі?

— Наша кампанія міжнародная. Безумоўна, усё робіцца ў рамках міжнародных стандартаў і заканадаўства Беларусі. Так, на базе міжнародных стандартаў дзейнічае сістэма менеджменту якасці. Штогод мы яе пацвярждаем, і яна цалкам адпавядае патрабаванням ІSO 9001-2015. Каб гэтыя параметры пацвердзіць, неабходна прыкласці нямала намаганняў. А калі ўлічыць, што пацвярджаць іх трэба штогод, то расслабляцца няма часу.

Мы вельмі высока цэнім увагу нашых спажыўцоў і дзелавых партнёраў. Калі мы кажам, што імкнёмся да высокай якасці паслуг, то гэта сапраўды так — каб усім бакам было зручна і надзейна. І ў той жа час для нас, выбачайце мне, прыбыткова, бо рынак ёсць рынак. Спажывец жадае мець добры танны тэлефон, і гэта зразумела. А нам трэба яшчэ забяспечыць якасную сувязь, і каб спажывец заставаўся з намі надалей.

Працаваць менавіта так дазваляюць нармальныя дзелавыя адносіны ў калектыве. Захоўваеца прынцып гендарнай роўнасці: жанчыны працуюць і ў топ-менеджменце, і кіраўнікамі груп і іншых структурных падраздзяленняў. Усё залежыць ад дзелавых якасцяў.

— Як новы фармат жыцця ўплывае на работу калектыву кампаніі?

— Самым непасрэдным чынам. Таму клопат пра чалавека з боку адміністрацыі і грамадскіх арганізацый павінен быць шматпланавы. Паўтаруся, мы на рэгулярнай аснове праводзім апытанні персаналу, па іх выніках робім высновы і стараемся ўдасканальваць працэсы. Сёння шмат людзей у нас працуе «на аддаленцы», а тыя, хто працуе ў офісе, забяспечаны маскамі, пальчаткамі і антысептыкамі. Пры ўваходзе ў кампанію стаяць спецыяльныя спрэйныя прыстасаванні.

— Раскажыце, калі ласка, пра месца і ролю прафсаюзнай арганізацыі ў сённяшнім дні.

— Прафсаюзная арганізацыя, якую я ўзначальваю, створана ў нас у 2006 годзе. У асноўным займаемся сацыяльнай праблематыкай, у тым ліку і аховай здароўя, што асабліва актуальна цяпер, і арганізацыяй мерапрыемстваў у вольны ад работы час.

Сочым за выкананнем калектыўнага дагавора, якім прадугледжаны тыя ці іншыя даброты для членаў калектыву. Прафсаюз, дарэчы, сумесна з наймальнікам падпісвае штогадовы каляндарны план спартыўна-масавых і фізкультурна-аздараўленчых мерапрыемстваў. Да пандэміі мы ўдзельнічалі і ў міжнародных спаборніцтвах, нашы каманды часта вярталіся з прызамі. Матэрыяльная база дзякуючы клопату адміністрацыі па-ранейшаму дазваляе моладзі трымаць сябе ў форме.

Мала таго, што традыцыйнымі сталі спаборніцтвы ўнутры кампаніі па дзесяці відах спорту, — мы штогод удзельнічалі і ў галіновых мерапрыемствах, у тым ліку ў турыстычных злётах.

У рамках сацыяльных праектаў асаблівую ўвагу ўдзяляем сям'і. Так, напрыклад, МТС падтрымала міжнародную ініцыятыву Фонду ААН у галіне народанасельніцтва ЮНФПА «Кампаніі, дружалюбныя бацькам», якая разглядае сям'ю з дзецьмі як каштоўнасць, а не перашкоду для бізнесу. Ініцыятыва скіравана на стварэнне спрыяльных умоў работы для супрацоўнікаў з дзецьмі, а таксама на дасягненне гендарнай роўнасці ўнутры кампаній.

Трэба адзначыць, што мы даўно прыглядаліся да гэтай цікавай і карыснай, на наш погляд, ініцыятывы. Яшчэ ў 2019 годзе пры падтрымцы Еўрапейскага саюза MOST прадстаўнікі сямі беларускіх бізнес-прадпрыемстваў, ЮНФПА і Міністэрства працы і сацыяльнай абароны наведалі шведскія кампаніі, якія з'яўляюцца лідарамі ў галіне ўкаранення канцэпцыі ParentSmart. У азнаямленчай паездцы бралі ўдзел і супрацоўнікі МТС.

Публікацыю падрыхтавалі

Уладзімір Хількевіч

Вераніка Хількевіч

Фота Яўгена Пясецкага