На тэлеканале АНТ у вячэрнім эфіры гледачоў чакае паказ фіналу ХІІ Нацыянальнага конкурсу прыгажосці «Міс Беларусь — 2021». Вырашальнае шоу пройдзе 10 верасня ў Палацы спорту, дзе пераможніцу вызначыць журы, а пасля яна прадставіць Беларусь на конкурсе «Міс свету».
Дзяўчаты, якія будуць спаборнічаць за тытул і карону, сур'ёзна рыхтуюцца да адказнага дня. Ён, як вядома, часам можа стаць стартам кар'еры, напрыклад у мадэльным бізнесе. Прыгажуні з розных абласцей нашай краіны, у тым ліку і са сталіцы, на працягу апошняга месяца старанна адточвалі сваё майстэрства дэфіле, прымяралі новыя вобразы, рыхтаваліся да творчых конкурсаў, працавалі над фізічнай формай, удзельнічалі ў фотасесіях, розных мерапрыемствах — адным словам, настройваліся на тое, каб у адзін з важных дзён свайго жыцця быць «на вышыні» і найлепшым чынам прэзентаваць сябе. Сярод удзельніц — 29 прадстаўніц розных тыпажоў і ўзростаў, прафесій і захапленняў. Патрабаванні да іх на стадыі адбораў, як і ў мінулыя гады, былі наступныя: узрост ад 18 да 24, рост не ніжэйшы за 174 см і знешнія даныя, а таксама статус «не замужам» і грамадзянства Рэспублікі Беларусь. Каму ў выніку ўсміхнецца фартуна, прагназаваць не бяромся, але ж, думаем, кожная з дзяўчат верыць і спадзяецца на ўласную перамогу. Што ж, паглядзім, чые прагнозы спраўдзяцца сёння ўвечары. Пачатак шоу «Міс Беларусь — 2021» у 21.15 на АНТ.
Алена ДРАПКО
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
