На днях Прэзідэнт падпісаў Указ № 367 «Аб добраахвотным страхаванні дадатковай назапашвальнай пенсіі». Новы від пенсійнага страхавання — добраахвотнае страхаванне дадатковай пенсіі з фінансавай падтрымкай дзяржавы — запрацуе з 1 кастрычніка 2022-га.
Удзельнічаць у пенсійнай праграме могуць працоўныя грамадзяне, за якіх іх работадаўцы выплачваюць абавязковыя страхавыя ўзносы ў фонд сацыяльнай абароны насельніцтва. Аднак існуе абмежаванне для тых, каму да агульнаўстаноўленага ў Беларусі пенсійнага ўзросту засталося менш за тры гады. Пра тое, як будзе працаваць новы механізм, расказала Наталля ПАЎЛЮЧЭНКА, першы намеснік міністра працы і сацыяльнай абароны:
— Работнік павінен пісьмова, асабіста ці анлайн звярнуцца да страхаўшчыка, якім, згодна з указам, вызначана прадпрыемства «Стравіта», і пацвердзіць сваё жаданне ўзяць удзел у праграме. Пасля гэтага работнік будзе штомесяц плаціць са свайго заробку пэўны тарыф накапляльнага ўзносу (ад 1 % да 10 %). Работадавец пры гэтым будзе абавязаны штомесяц выплачваць у «Стравіту» страхавы ўзнос на накапляльную пенсію свайго работніка суразмерна з тарыфам узносу, які той абраў для сябе, аднак не больш за 3 %. Важны момант для наймальніка: яго абавязковыя выплаты ў Фонд сацыяльнай абароны насельніцтва (ФСАН) за работніка (28-працэнтны ўзнос на пенсійнае страхаванне. — «Зв.») паменшацца роўна на тую суму, якую ён пералічвае за работніка ў страхавую кампанію, так што нагрузка на работадаўца не павялічыцца. Аб'ём сродкаў, якія ён пералічваў за работніка ў ФСАН, застанецца на існуючым узроўні — ён проста падзеліцца паміж «Стравітай» і Фондам сацабароны.
Між тым, каб існуючая ў краіне салідарная сістэма (гэта калі пенсіянеру плацяць грошы, якія збіраюцца ў выглядзе пенсійных узносаў з тых, хто працуе зараз) не пацярпела, а фонд напаўняўся і ў яго бюджэце былі рэсурсы для фінансавання ўсіх расходаў (пенсій і розных дапамог), выпадаючыя такім чынам з фонду сродкі будуць кампенсавацца з рэспубліканскага бюджэту, падкрэсліла яна.
Выгада новай сістэмы ў тым, што добраахвотна выплачаныя грошы будуць назапашвацца, капіталізавацца і нават перадавацца ў спадчыну. Акрамя таго, у сувязі з выплатай узносаў на дадатковую назапашвальную пенсію работніку даецца льгота па падаходным падатку. А раз на год работнік пры жаданні зможа змяніць свой страхавы тарыф: павялічыць ці паменшыць працэнт выплат. Удзел у сістэме страхавання можна таксама перапыніць, напісаўшы заяву ў «Стравіту».
Назапашаныя да выхаду на пенсію сродкі чалавек зможа атрымліваць штомесяц як дадатак да існуючай цяпер у краіне пенсіі па ўзросце. Патраціць зберажэнні за пяць ці дзесяць гадоў пасля выхаду на пенсію — таксама права чалавека.
— Дзяржава гарантуе, што заробленая чалавекам працоўная пенсія па ўзросце захаваецца, незалежна ад таго, удзельнічаў ён у новай сістэме ці не. Добраахвотнае страхаванне — гэта прыступка ў развіцці пенсійнай сістэмы краіны. Перш чым сфарміраваць падыходы і прапановы да ўказа, мы вывучылі міжнародны вопыт і ўзялі найбольш паспяховыя практыкі. Сёння найбольш паспяховым механізмам лічыцца той, калі адбываецца суфінансаванне дзяржавы. Чалавек зацікаўлены тады, калі дзяржава падстаўляе яму плячо і фактычна нароўні з ім удзельнічае ў яго дадатковай накапляльнай пенсіі, — запэўніла Наталля Паўлючэнка. — Уклад чалавека памнажаецца ўдвая, калі ён добраахвотна выплачвае да 3 % у будучую пенсію, а з улікам капіталізацыі назапашаная дадатковая сума пенсіі ў выніку становіцца больш важкай.
Ірына СІДАРОК
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.