Вы тут

Як у Гомелі настаўнікі выхоўваюць юных патрыётаў


Кіраўнікі па ваенна-патрыятычным выхаванні, якія з гэтага навучальнага года з'явіліся ў школах краіны, — значная дапамога педагагічнаму калектыву. У Год народнага адзінства заклікі да актывізацыі патрыятычнай работы сярод школьнікаў — не проста словы. Між тым, сёння застаецца актуальным пытанне стварэння ў навучальных установах сур'ёзнай вучэбна-матэрыяльнай базы па дапрызыўнай падрыхтоўцы і фарміраванні патрыятычнай самасвядомасці вучняў.


Дэпутат Палаты прадстаўнікоў Нацыянальнага сходу Беларусі Віталь Уткін трымае ў руках капсулу часу падчас акцыі каля помніка ахвярам фашызму ў Гомелі.

Варта адзначыць, што ў Гомелі яшчэ два гады таму стартаваў новы праект па развіцці адукацыйнага асяроддзя для фарміравання ваенна-патрыятычнага выхавання школьнікаў. Ініцыятарам праекта выступіў на той час кіраўнік Чыгуначнага раёна Гомеля, а цяпер дэпутат Палаты прадстаўнікоў Нацыянальнага сходу Беларусі, член Пастаяннай камісіі па заканадаўстве Віталь Уткін. Парламентарый — актыўны ўдзельнік ваенна-патрыятычных мерапрыемстваў, якія праходзяць на Гомельшчыне. У сваёй рабоце ў акрузе ён ў тым ліку далучаецца да правядзення патрыятычных акцый грамадскіх арганізацый.

— Патрыятычнаму выхаванню юнага пакалення, лічу, варта заўсёды аддаваць вялікую ўвагу, бо дзяцінства і юнацтва — тая пара, калі зараджаецца пачуццё любові да сваёй радзімы, да свайго народа. Грамадзянска-патрыятычнае выхаванне дапамагае сфарміраваць пачуццё годнасці, упэўненасці ў сабе, павагі да гісторыі сваёй Айчыны, вернасці баявым і працоўным традыцыям, гатоўнасці да абароны сваёй Радзімы. У нашай краіне выхаванню юных патрыётаў адводзіцца значная ўвага, але, вядома, яшчэ ёсць да чаго імкнуцца ў гэтым кірунку, — падзяліўся сваім меркаваннем Віталь Уткін.

Для яго ваенны доўг перад Радзімай — не пустыя словы. У свой час Віталь Юр'евіч праходзіў тэрміновую службу ва ўнутраных войсках Міністэрства ўнутраных спраў СССР, пасля працягнуў службу ў органах МУС. Дэпутат як сапраўдны сын Гомеля шануе і захоўвае памяць аб героях Вялікай Айчыннай вайны, у гонар якіх названыя вуліцы роднага горада.

Дарэчы, сярэдняя школа № 57 Гомеля размешчана на вуліцы, якая носіць імя Героя Савецкага Саюза Кірыла Восіпава. Менавіта на базе гэтай навучальнай установы сёння актыўна развіваецца праект «Магчымасці адукацыйнага асяроддзя для фарміравання ваенна-патрыятычнага выхавання школьнікаў», які ініцыіраваў Віталь Уткін. Праект падтрымаў і першы намеснік камандуючага ўнутранымі войскамі Міністэрства ўнутраных спраў Беларусі Ігар Бурмістраў.

Вучні ваенна-патрыятычнага класа СШ №57 Гомеля падчас наведвання мемарыяльнага комплексу «Ала» ў Светлагорскім раёне.

У межах праекта было таксама падпісана пагадненне аб супрацоўніцтве паміж школай і вайсковай часцю № 5525 Гомеля. Па словах намесніка дырэктара па выхаваўчай рабоце сярэдняй школы № 57 Гомеля Дзмітрыя Цыбізава, узаемадзеянне з гэтым злучэннем унутраных войскаў МУС Беларусі дапамагло атрымаць паспяховы досвед па ўкараненні новых формаў работы ў межах патрыятычнага выхавання вучняў. Сёння гомельскія педагогі гатовыя дзяліцца сваімі напрацоўкамі.

— Два гады таму мы падрыхтавалі ўсё неабходнае для адкрыцця на базе нашай школы ваенна-патрыятычных класаў. Для вучняў, уключаных у праграму, была пашыта форма, падрыхтавана матэрыяльна-тэхнічная база для навучання, — тлумачыць Дзмітрый Цыбізаў.

Праграмай прадугледжаны штотыднёвыя ўрокі з прадстаўнікамі вайсковай часці № 5525 Гомеля. Штодзённыя заняткі спортам, страявой і агульнай тэарэтычнай падрыхтоўкай з вайскоўцамі як на базе школы, так і на базе вайсковай часці дазваляюць дзецям павысіць узровень фізічнага развіцця, навыкаў самаабароны і ваенна-патрыятычнага выхавання, адзначаюць педагогі.

Сёння праектам ваенна-патрыятычнага выхавання ў гомельскай сярэдняй школе № 57 ахоплена звыш шасцідзесяці вучняў. Гэта навучэнцы восьмага класа і зборная група сямікласнікаў, якія жадаюць наведваць заняткі па праграме ваенна-патрыятычнага выхавання. Ёсць запыт ад вучняў шостага класа і іх бацькоў далучыць да заняткаў у ваенна-патрыятычным класе і іх звяно. Безумоўна, адзначаюць у школе, з'яўленне новай пасады — кіраўніка ваенна-патрыятычнага выхавання — дапаможа далучыць да патрыятычнага руху школьнікаў усіх ахвотных вучняў.

— Асноўная мэта праекта — выхаванне дастойных грамадзян і патрыётаў сваёй краіны, гатовых не толькі любіць і абараняць сваю Радзіму, але і спрыяць яе культурнаму, палітычнаму і сацыяльнаму развіццю, — падкрэсліў намеснік дырэктара. — Вучні ваенна-патрыятычных класаў удзельнічаюць у розных мерапрыемствах, конкурсах і алімпіядах, прымеркаваных да святкавання найважнейшых падзей нашай краіны, бяруць актыўны ўдзел у навукова-даследчай дзейнасці.

Гомельскія педагогі адзначаюць, што вывучэнне юрыдычных дысцыплін на факультатывах, удзел у ваенна-патрыятычных конкурсах, форумах, наведванне гістарычных мясцін Беларусі — відавочна вельмі станоўча ўплываюць на паводзіны вучняў. З гэтым пагаджаюцца і бацькі навучэнцаў. Вучні ваенна-патрыятычных класаў больш дысцыплінаваныя, палепшыліся іх поспехі ў вучобе, многія лічаць, што цяпер знайшлі арыенцір для будучай прафесіі. Асабліва такая работа ў калектыве карысная для падлеткаў, што трапілі ў поле зроку праваахоўнікаў. Сёлета ў гомельскай школе № 57 запісацца ў ваенна-патрыятычны клас выказалі жаданне вучні, якія знаходзіліся на прафілактычным уліку.

— Мы пераканаліся, напрыклад, як станоўча на дысцыпліну і праводзіны вучняў уплывае нашэнне ваеннай формы, — дзеліцца Дзмітрый Цыбізаў. — Паказальна і тое, што класныя кіраўнікі актыўна падтрымалі вучняў патрыятычных класаў і таксама носяць форму для прыкладу дзецям.

Дзмітрый Ігаравіч падкрэслівае: значную выхаваўчую ролю адыгрывае ўдзел дзяцей у грамадзянска-патрыятычных мерапрыемствах і акцыях Гомеля.

— Моцныя ўражанні аказала на дзяцей унікальная экспазіцыя «Цягнік Перамогі», што экспанавалася гэтым летам у абласным цэнтры. У Дзень ведаў для вучняў нашай школы новы навучальны год адкрыла выступленне ваеннага аркестра васковай часці № 5525. Дарэчы, нядаўна нашы навучэнцы ўзялі актыўны ўдзел у Дне адчыненых дзвярэй гэтага вайсковага злучэння. Дагэтуль згадваюць дзеці і свае экскурсіі ў Гомельскі абласны музей ваеннай славы і мемарыяльны комплекс «Ала». У верасні навучэнцы ваенна-патрыятычных класаў падчас урачыстых мерапрыемстваў з нагоды Дня горада прадэманстравалі макеты-дыярамы ваенных бітваў па вызваленні Гомеля. Дзеці рыхтавалі іх самастойна на працягу навучальнага года, — пералічвае актыўнасці вучняў Дзмітрый Цыбізаў.

Ён дадае: вельмі важна, што ў жыцці ваенна-патрыятычных класаў актыўны ўдзел бяруць і бацькі вучняў. Разам наведваюць мемарыялы і памятныя мясціны, удзельнічаюць у акцыях і спартыўных мерапрыемствах.

— Афіцэрская служба, жаданне здзейсніць подзвіг — мара многіх хлопчыкаў і дзяўчынак. Гэта толькі некаторыя з многіх прычын, з якіх навучэнцы нашай школы выбіраюць шлях абаронцы Айчыны. Першы крок гэтага няпростага шляху — ваенна-патрыятычныя класы. У іх дзеці вучацца ўзаемадапамозе, дысцыпліне і пераадоленню перашкод, — матывуе гомельскі педагог.

Наталля КАПРЫЛЕНКА, фота дадзена СШ № 57 Гомеля

Загаловак у газеце: Выхаванне пашаны

Выбар рэдакцыі

Грамадства

Што трэба ведаць тым, хто адпачывае каля вадаёмаў

Што трэба ведаць тым, хто адпачывае каля вадаёмаў

Нават пры наяўнасці на пляжы ратавальнай станцыі не варта грэбаваць элементарнымі правіламі бяспекі. 

Экалогія

У Беларусі пабудуюць 30 рэгіянальных смеццеперапрацоўчых заводаў

У Беларусі пабудуюць 30 рэгіянальных смеццеперапрацоўчых заводаў

Агульная плошча звалак у Беларусі займае каля 4 тысяч гектараў.