Вы тут

Эксперты пра рэферэндум і жыццё пасля яго


Кампетэнтна аб актуальным — чарговае пасяджэнне «Дэпутацкага клуба» прайшло ў агенцтве «Мінск-Навіны». Эксперты абмеркавалі найважнейшую падзею ў жыцці краіны — канстытуцыйны рэферэндум і далейшую трансфармацыю канстытуцыйных нормаў і заканадаўства. У цэнтры ўвагі таксама — патрыятычнае выхаванне маладога пакалення і адлюстраванне маладзёжнай палітыкі ў Канстытуцыі. У Дзень абаронцаў Айчыны і Узброеных Сіл гэта асабліва сімвалічная тэма.


«Ужо вядома, што за першы дзень датэрміновага галасавання больш за 6 % беларусаў, якія маюць выбарчыя правы, аддалі свой голас. Гэта важна. На мой погляд, гэта ўдвая важна з улікам абвастрэння сітуацыі ва Украіне, з улікам агульнай ваеннай напружанасці каля нашых межаў. Рэалізацыя свайго грамадзянскага права прагаласаваць за новы Асноўны Закон краіны — гэта і ёсць частка вялікага функцыяналу па абароне сваёй Айчыны», — заявіў генеральны дырэктар агенцтва «Мінск-Навіны» старшыня Беларускага саюза журналістаў Андрэй Крывашэеў. Ён падкрэсліў, што сёння важна думаць пра сур'ёзныя змены ў жыцці краіны, якія плануюцца, калі змяненні ў Асноўны Закон будуць прынятыя. Запланаваны змяненні ў сферы адукацыі, аховы здароўя, сацыяльных гарантый грамадзян.

На гэта звярнуў увагу і старшыня Пастаяннай камісіі па міжнародных справах Палаты прадстаўнікоў Андрэй Савіных. Паводле яго слоў, без рэферэндума як пункта адліку далейшы рух наперад у развіцці краіны будзе немагчымы. «У Палаце прадстаўнікоў мы ўжо абмяркоўвалі, што трэба будзе вельмі сур'ёзна дапрацаваць і перагледзець 28 асноўных законаў. Гэта і Закон аб парламенце, аб Савеце Міністраў, аб палітычных партыях, аб грамадскіх аб'яднаннях. Трэба будзе распрацаваць два новыя законы, магчыма, больш. Гэта Закон аб Усебеларускім народным сходзе і Закон аб грамадзянскай супольнасці», — расказаў парламентарый.

Старшыня Пастаяннай камісіі па заканадаўстве Палаты прадстаўнікоў Святлана Любецкая акцэнтавала ўвагу на тым, што Канстытуцыя — гэта аснова ўсяго заканадаўства. Па яе словах, адной з галоўных задач было прадугледзець у праекце Асноўнага Закона тыя механізмы, якія дазволілі б хутка ўплываць і эфектыўна рэагаваць на шматлікія праблемы: «Жыццё сёння вельмі мабільнае і хуткае, і неабходна мець прававы інструментарый і заўсёды дзейнічаць у рамках закона. Гэты пастулат непарушны. Дзяржава гэтага прытрымліваецца. Калі на рэферэндуме народ пагодзіцца са змяненнямі ў Канстытуцыю, людзі прымуць на сябе абавязкі дзейнічаць у рамках закона. Асноўны закон — гэта агульныя правілы і падыходы, гэта ўніверсальны закон, які ўспрымаецца як асновы жыццядзейнасці грамадства і краіны». Таксама Святлана Любецкая падкрэсліла, што ў самым пачатку тэксту Канстытуцыі напісана «Мы, народ Беларусі». А значыць, кожны павінен прытрымлівацца прапісаных у гэтым дакуменце нормаў.

У тым ліку, безумоўна, і моладзь. Маладзёжная палітыка сёння — важная частка агульнай дзяржаўнай палітыкі. Удзел у дэпутацкім клубе прынялі і прадстаўнікі маладзёжнага савета пры Мінгарсавеце. «Патрыятычнае выхаванне моладзі — пытанне, якое ўвесь час удасканальваецца. Мы шукаем спецыялістаў новай формы і метадаў працы, таксама шмат ужо зроблена за апошні час у нашай краіне. У нас прынята праграма патрыятычнага выхавання, у рамках нашай стратэгіі гэты напрамак з'яўляецца першым», — расказаў другі сакратар Цэнтральнага раённага камітэта БРСМ Аляксандр Прохараў. Гаворачы пра патрыятычнае выхаванне моладзі, ён звярнуў увагу на артыкулы аб захаванні гісторыка-культурнай і духоўнай спадчыны, прапісаныя ў праекце Канстытуцыі.

«Мы часта задаёмся пытаннем, хто такі патрыёт. Гэта чалавек, які накіроўвае свае сілы на захаванне суверэнітэту і незалежнасці, хто жадае сваёй Радзіме толькі дабра і робіць кожны дзень асабісты ўклад. У кагосьці ён большы, у кагосьці меншы, але менавіта так фарміруецца наша будучыня. Мы хочам захаваць памяць аб кожным, хто ўнёс свой уклад у Перамогу, і павысіць гістарычную адукаванасць моладзі. Для гэтага ў нас ёсць цудоўны праект «Беларусь памятае. Родныя асобы Перамогі», ініцыятыву аб стварэнні нацыянальнага альбома памяці ў 2019 г. падтрымаў Прэзідэнт. Цяпер у ім звыш 6 тысяч фатаграфій», — расказаў Аляксандр Прохараў.

Як адзначыў старшыня Мінскага гарадскога Савета дэпутатаў Андрэй Бугроў, наяўнасць у краіне неабыякавых маладых людзей, якія разумеюць, чым жыве грамадства, дарагога варта. Пагадзілася з ім і Святлана Любецкая. «Неабходна падтрымліваць такія ініцыятывы, як Маладзёжны парламент і Маладзёжны савет. Калі мы зможам сфарміраваць такі пласт маладых кіраўнікоў, якія будуць удзельнічаць у прыняцці рашэнняў, нацэленых на жыццё грамадства, у будучыні мы атрымаем выдатных спецыялістаў. На гэта ёсць унутраны запыт. Далучэнне да працы мясцовых саветаў дэпутатаў, да ўдзелу ў выбарчых кампаніях, узаемадзеянне з насельніцтвам, далучэнне да заканатворчага працэсу — моладзь можа закрануць усе сферы жыццядзейнасці дзяржавы. Сёння ў моладзі ёсць запыт, яны жадаюць сябе ў гэтым паспрабаваць. Гэта такі самастойны падыход. Гонар і хвала бацькам, якія заклалі такія задаткі, і гэтым дзецям», — адзначыла парламентарый.

Валерыя СЦЯЦКО

Прэв’ю: БелТА

Загаловак у газеце: Свой уклад у абарону Айчыны

Выбар рэдакцыі

Калейдаскоп

Усходні гараскоп на наступны тыдзень

Усходні гараскоп на наступны тыдзень

РАК. У першай палове тыдня будзеце актыўна вучыцца новаму і размаўляць з людзьмі. У сярэдзіне тыдня можа змяніцца настрой, з'явіцца дакладнае разуменне сваіх мэт.

Калейдаскоп

«I гэты чалавек застаўся жыць...» Медыкі ў беларускай літаратуры. Тэст

«I гэты чалавек застаўся жыць...» Медыкі ў беларускай літаратуры. Тэст

Кожную трэцюю нядзелю червеня адзначаецца Дзень медыцынскага работніка.