Месяц таму Надзвычайны і Паўнамоцны Пасол Рэспублікі Беларусь у Федэратыўнай Рэспубліцы Бразілія Сяргей Лукашэвіч уручыў даверчыя граматы Прэзідэнту Бразіліі Жаіру Балсанару. У гэты самы дзень споўнілася 30 гадоў усталяванню дыпламатычных адносін паміж Беларуссю і Бразіліяй. «Звязда» скарысталася двайной нагодай распытаць кіраўніка беларускай місіі ў самай буйной краіне Паўднёвай Амерыцы пра двухбаковыя адносіны і задачы, якія вырашае зараз наша пасольства.
— Сяргей Уладзіміравіч, перш за ўсё дазвольце павіншаваць вас з уручэннем даверчых грамат Прэзідэнту Бразіліі! Раскажыце, як праходзіў прыём, якія былі галоўныя тэмы гутаркі з Жаірам Балсанару?
— Перад тым як распавесці аб сустрэчы, я хацеў бы адзначыць, што Бразілія стабільна ўваходзіць у ТОП-10 гандлёвых партнёраў Беларусі ў свеце. Больш за тое, Беларусь уваходзіць у ТОП-3 пастаўшчыкоў калійных угнаенняў у Бразілію, яна выконвае важную ролю ў забеспячэнні лідзіруючага становішча нашага лацінаамерыканскага партнёра на сусветным рынку харчавання.
Думаю, менавіта з прычыны выкладзеных вышэй аб'ектыўных фактаў гутарка з Прэзідэнтам Бразіліі прайшла ў вельмі цёплай, па-сапраўднаму сяброўскай абстаноўцы. Пры ўдзеле міністра замежных спраў Бразіліі Карласа Франса ўдалося абмеркаваць шэраг вострых пытанняў, якія даводзіцца вырашаць абодвум бакам ва ўмовах санкцыйнага ціску з боку недружалюбных Беларусі краін.
Знакавым паказчыкам шырокага спектра актуальных пытанняў двухбаковага ўзаемадзеяння стала і працягласць сустрэчы: наша гутарка доўжылася ў два разы даўжэй, чым размова Прэзідэнта Бразіліі з пасламі іншых краін, што, безумоўна, сведчыць аб значнай увазе найбуйнейшай краіны Лацінскай Амерыкі і адной з найбуйнейшых эканомік свету.
— Што вы паспелі ўжо зрабіць за час свайго знаходжання ў гэтай краіне ў якасці пасла?
— Не буду хаваць, некаторыя нашы заходнія партнёры «не даюць засумаваць», таму, адразу прыехаўшы ў Бразілію ў кастрычніку 2021 года, я з галавой, як кажуць у народзе «без прамаруджвання», акунуўся ў вырашэнне праблем, якія перашкаджаюць планамернаму развіццю нашых адносін з гэтай выдатнай краінай. Ужо за невялікі перыяд удалося правесці сустрэчы з ключавымі фігурамі бразільскай палітыкі, людзьмі, якія непасрэдна прымаюць рашэнні.
Маёй галоўнай мэтай на гэтым этапе было данясенне праўдзівай і неперакручанай інфармацыі аб сітуацыі ў нашай краіне, перспектывах і складанасцях у нашых партнёрскіх адносінах, раскрыць праўду аб прыродзе санкцый, накіраваных супраць Беларусі. Нашы бразільскія калегі разумеюць, што санкцыі фактычна з'яўляюцца нічым іншым, як інструментам несумленнай канкурэнцыі, прычым накіраванасць санкцый шматвектарная.
Падрабязней растлумачу на прыкладзе. Асобныя санкцыі супраць Беларусі істотна абцяжарваюць, а месцамі і робяць немагчымай аплату бразільскімі фермерамі калійных угнаенняў і дастаўку ўгнаенняў праз марскі порт горада Клайпеды ў Бразілію. Ад гэтага пакутуюць многія. На мой погляд, больш за ўсіх пакутуюць бразільскія фермеры, якія ва ўмовах гарачага клімату і беднасці глеб (асабліва ў некаторых рэгіёнах) не могуць вырошчваць не тое што вялікія ўраджаі сваёй прадукцыі (кава, соя, кукуруза, гародніна і садавіна), але і хоць нешта, што не згарыць пад пякучым сонцам у перасушанай глебе.
Хто ж будзе галоўным выгадаатрымальнікам у гэтай сітуацыі? Па-першае, галоўныя канкурэнты Бразіліі на сусветным рынку харчавання — фермеры ЗША і ЕС, а па-другое, паўночнаамерыканскія вытворцы калійных угнаенняў, якія ўжо сёння імкнуцца хутчэй заняць законнае месца Беларусі на сусветным рынку калійных угнаенняў.
Аднак хачу звярнуць вашу ўвагу, што ў апошнія тыдні тэмай, якая найбольш актыўна абмяркоўваецца у бразільскім грамадстве, стала спецаперацыя Расіі на Украіне. У гэтым кантэксце ўзрасла колькасць ілжывай інфармацыі пра нібыта негатыўную ролю і ўдзел Беларусі, якая стала актыўна распаўсюджвацца СМІ Бразіліі з падачы заходніх крыніц. Мы аператыўна ўключыліся ў прасоўванне нашага пункту гледжання ў медыяпрасторы краіны знаходжання.
Намі актыўна выкладаецца пазіцыя Беларусі як адзінай мірнай пляцоўкі для перагавораў. Мной у інтэрв'ю найбуйнейшым бразільскім выданням CNN Brasіl, Globo, Correіo Brazіlіense, Broadcast, Valor Economіco, Brasнlіa іn Foco, Jovem Pan і многім іншым да гледачоў і чытачоў даводзіцца сумленная і адкрытая інфармацыя аб ролі Беларусі ў вырашэнні гэтага канфлікту пачынаючы з 2014 года.
— Санкцыі з боку трэціх краін, напэўна, не адзіная складанасць для работы на рынку Бразіліі?
— Санкцыйная праблематыка востра стаіць у цяперашні момант, але і без яе існуе шэраг цяжкасцяў у тым, каб трапіць і трымаць пазіцыі на рынку Бразіліі. Усё ж трэба выразна разумець, што значная геаграфічная аддаленасць мае на ўвазе наяўнасць шэрагу адрозненняў не толькі ў ментальным і камунікацыйным плане, але і ў дзелавой практыцы, што цягне неабходнасць унясення карэкціровак у парадак вядзення бізнесу.
Пасольства на сістэмнай аснове вывучае дзелавую практыку Бразіліі, аналізуе і назапашвае яе, пасля чаго накіроўвае неабходную інфармацыю беларускім суб'ектам гаспадарання, іх аб'яднанням, гандлёвым палатам і іншым зацікаўленым бакам. Напрыклад, часта камерцыйныя прапановы беларускіх экспарцёраў перагружаны інфармацыяй, маюць недапушчальна вялікі аб'ём, ён можа дасягаць 50—60 старонак тэксту, а манера выкладання гэтай інфармацыі незразумелая для мясцовых жыхароў і дзелавых колаў. З гэтай прычыны пасольства дае беларускім экспарцёрам, якія жадаюць выйсці на бразільскі рынак, канкрэтныя рэкамендацыі па адаптацыі сваіх тавараў, друкаваных матэрыялаў, маркетынгавых стратэгій, каб у максімальна кароткія тэрміны і з мінімальнымі ўкладаннямі заняць сваю нішу.
Такая арыентаванасць беларускай дыпламатычнай місіі на дасягненне вынікаў у гандлёва-эканамічнай сферы дае свой плён. Так, па выніках 2021 года дасягнуты рост па многіх напрамках беларускага экспарту ў Бразіліі і выкананы ўсе даведзеныя паказчыкі.
Шэраг беларускіх тавараў займае моцныя пазіцыі на бразільскім рынку: гэта інсектыцыды і гербіцыды, група тавараў нафтахімічнага комплексу, вырабы з металу. Некаторыя з іх прадэманстравалі ў 2021 годзе значны рост, напрыклад, пастаўкі льняных тканін выраслі ў пяць разоў, соладу — у тры разы, а вымяральных прыбораў — у два разы.
У цэлым, пералік таварных пазіцый павялічыўся за год амаль на 20 працэнтаў, што з'яўляецца добрым задзелам для далейшага нарошчвання гандлёвых адносін паміж дзвюма краінамі. Пасольствам таксама вядзецца работа па арганізацыі візіту беларускіх экспарцёраў на найбуйнейшую ў рэгіёне міжнародную выставу AGRІSHOW, якая пройдзе ў Бразіліі ў красавіку 2022 года.
— 30-гадовы шлях — гэта шмат ці мала для дыпламатычных адносін?
— Па сусветных мерках нашы дыпламатычныя адносіны з Бразіліяй дастаткова маладыя. Але для такога малога перыяду супрацоўніцтва нам удалося зрабіць шмат, галоўны вынік гэтых намаганняў — Беларусь ведаюць у найбуйнейшай краіне Лацінскай Амерыкі, ведаюць са станоўчага пункту гледжання і нам давяраюць як надзейным партнёрам.
Больш за тое, я хацеў бы звярнуць увагу на той факт, што са згаданых вышэй топ-10 партнёраў Беларусі ў свеце Бразілія з'яўляецца самай аддаленай. Аднак, нягледзячы на значную геаграфічную аддаленасць Беларусі і Бразіліі, удалося выбудаваць моцны каркас двухбаковых адносін, заснаваны на гандлёва-эканамічным супрацоўніцтве, партнёрстве ў галіне культуры, спорту і адукацыі. Мяркуйце самі: бразільскія студэнты навучаюцца ў Беларусі, і больш за 10 тысяч кіламетраў паміж краінамі не з'яўляецца для іх перашкодай.
У цэлым, мне хацелася б акцэнтаваць увагу на значнасці як Беларусі для Бразіліі, так і Бразіліі для Беларусі. Няхай геаграфічная аддаленасць дзвюх краін і надалей не будзе перашкодай для развіцця партнёрскіх адносін. Пасольства ў сваю чаргу працягне заставацца апорай Беларусі ў Бразіліі доўгія гады.
Ужо зараз нам варта думаць аб хутчэйшым пашырэнні сваёй дыпламатычнай прысутнасці ў гэтай перспектыўнай краіне далёкай дугі з ухілам у эканоміку. Бразілія — пятая па велічыні краіна свету, дзе пражывае больш за 214 мільёнаў чалавек. На мой погляд, гэта патрабуе павелічэння нашай дыпламатычнай прысутнасці ў такіх цэнтрах дзелавой актыўнасці, як Сан-Паўла — фінансавым і дзелавым цэнтры Бразіліі з насельніцтвам больш за 12 мільёнаў чалавек. Відавочна, што нельга сабраць ураджай, не пасеяўшы. Наяўнасць беларускага пасольства толькі ў адміністрацыйным і палітычным цэнтры — сталіцы Бразіліа, з прычыны вялізнага памеру гэтай краіны, не можа даць той эфект, які можна дасягнуць, размясціўшы нашу «кропку ўваходу» ў вышэйзгаданай эканамічнай сталіцы Бразіліі.
Вольга МЯДЗВЕДЗЕВА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?
