Вы тут

Суп: развейваем галоўныя міфы і дзелімся парадамі па гатоўцы


У нашай культуры суп — вельмі папулярная страва, і амаль кожны ў дзяцінстве чуў, што яго трэба есці абавязкова. І сёння многія з нас упэўненыя, што гэта адна з асноў правільнага харчавання. Прыхільнікі еўрапейскага харчавання з гэтым нязгодныя: яны сцвярджаюць, што здароўе не пацерпіць, калі суп не есці штодня. Хто ж мае рацыю? Ці неабходны суп усім? Ён сапраўды карысны, ці ёсць нейкія выключэнні? Які суп лепшы? Разбіраемся ў гэтым разам з урачом-гігіеністам Мінскага абласнога цэнтра гігіены, эпідэміялогіі і грамадскага здароўя Інгай Фядоткавай.


Фота: pixabay.com

Суп — шматкампанентная страва, у склад якой уваходзяць вадкая і цвёрдая часткі. Прычым правільна прыгатаваны суп — гэта збалансаваны набор бялкоў, тлушчаў і вугляводаў, а таксама вітамінаў, мінералаў і вадкасці.

Які суп лепшы?

Суп можна варыць на мясным булёне, але выбіраць трэба нятлустае мяса (курыца, індычка), з птушкі здымаць скуру, каб прыбраць лішні халестэрын і калорыі. Мясны булён трэба давесці да кіпення, зняць пенку і варыць яшчэ некалькі хвілін, пасля чаго ўвесь булён зліць, мяса заліць чыстай вадой і суп варыць на другім булёне.

— Гэта паменшыць у булёне колькасць антыбіётыкаў, халестэрыну і экстрактыўных рэчываў, якія павялічваюць выпрацоўку салянай кіслаты і павышаюць кіслотнасць страўнікавага соку, у сувязі з чым супы на наварыстых мясных булёнах не рэкамендуецца есці людзям з павышанай кіслотнасцю (язвавай хваробай, гастрытам). Між іншым, з адварнога мяса бялок засвойваецца лепш, — тлумачыць урач.

Можна варыць агароднінныя супы. Чым больш разнастайнай гародніны ў ім прысутнічае і чым больш яна рознакаляровая, тым больш карысці прынясе. Аднак гародніну не варта смажыць на алеі і сале. Яе трэба закідваць у канцы гатавання, пачынаючы з той, якая варацца даўжэй. Зяленіва ж наогул дадаюць у самым канцы, выключыўшы фаерку. Так захаваецца больш карысных рэчываў.

Рыбны суп — таксама добры варыянт, аднак варта памятаць, што марская рыба вельмі тлустая, хоць і змяшчае «карысныя» тлушчы. Акрамя таго, у рыбе можа ўтрымлівацца свінец, так што рыбны суп трэба варыць на другім булёне, як і мясны.

Суп-пюрэ смачная, аднак часта вельмі каларыйная страва, калі варыць яго на вяршках і з маслам, дадаўшы ў канцы грэнкі. Лепш гатаваць яго на вадзе або булёне з вялікай колькасцю гародніны. Такі суп будзе служыць крыніцай вітамінаў, мікра- і макраэлементаў, а таксама заменіць адну або некалькі з пяці рэкамендаваных Сусветнай арганізацыяй аховы здароўя порцый гародніны для тых, хто не жадае есці гародніну ў іншым выглядзе. А гародніна — гэта асноўная крыніца клятчаткі, якая стымулюе работу страўнікава-кішачнага тракта.

У суп можна дадаваць крупы і макарону, але важна, каб гэта былі складаныя вугляводы, гэта значыць цэльныя злакі. Дадавайце толькі адзін від круп або макароны з цвёрдых сартоў пшаніцы.

Некаторыя міфы

  • Суп не разбаўляе страўнікавы сок, не зніжае ўзровень стрававальных ферментаў.
  • У супе ўсё роўна застаюцца вітаміны і мікраэлементы, галоўнае — правільна яго варыць.
  • Гэта не дыетычная страва. Тлустая салянка, засмажаная гародніна для супу, тлусты мясны булён, грыбны суп могуць справакаваць абвастрэнне захворванняў страўнікава-кішачнага тракта або сардэчна-сасудзістай сістэмы.

Ці абавязкова яго ўжываць?

  • Суп можа быць паўнавартасным, збалансаваным прыёмам ежы пры правільным інгрэдыентным складзе і спосабе гатавання.
  • Суп не абавязкова есці кожны дзень, дастаткова 2-3 разы на тыдзень.
  • Страўнік можа працаваць і без «стымуляцыі» супам.
  • Суп дапамагае ў аднаўленні балансу вадкасці ў арганізме.

Як правільна гатаваць?

  • варыце супы на другім булёне;
  • здымайце тлушч і пену, якія ўтвараюцца падчас варэння;
  • саліце, як толькі вада пачала закіпаць;
  • выкарыстоўвайце спецыі і розныя травы;
  • варыце на слабым агні;
  • старайцеся, каб памер гародніны і іншых інгрэдыентаў быў такім, каб прадукт не даводзілася дзяліць на часткі лыжкай у талерцы;
  • падрыхтаваныя прадукты закладвайце ў кіпячы булён, пачынаючы з тых, што найбольш цяжка разварваюцца;
  • у працэсе варэння падтрымлівайце стан пастаяннага ціхага кіпення. Для гэтага наступны прадукт закладвайце толькі пасля аднаўлення кіпення.

Алена КРАВЕЦ

Выбар рэдакцыі

Грамадства

«Падчас работы думаеш пра тое, каб больш сабраць». Буякі заваёўваюць папулярнасць ў Гродзенскім раёне

«Падчас работы думаеш пра тое, каб больш сабраць». Буякі заваёўваюць папулярнасць ў Гродзенскім раёне

Яшчэ гадоў 10-15 назад салодкія садовыя буякі можна было лічыць далікатэсам.

Калейдаскоп

Схаваныя праваслаўныя жамчужыны Беларусі. Зможаце знайсці іх усе? Тэст

Схаваныя праваслаўныя жамчужыны Беларусі. Зможаце знайсці іх усе? Тэст

У 2022 годзе адзначаецца 1030-годдзе Полацкай епархіі.