Калекцыю Віцебскага абласнога краязнаўчага музея з пачатку года папоўнілі каля 2,9 тыс.экспанатаў, трэць з іх перадалі жыхары рэгіёна, паведамляе БелТА.
Па словах галоўнага захавальніка фондаў музея Вольгі Давідоўскай, у апошні час у фонды паступае вялікая колькасць прадметаў, у сярэднім за год больш за 3 тыс. адзінак. Іх перадаюць як прыватныя асобы, так і арганізацыі, частка папаўняе калекцыі ў выніку пошукавай дзейнасці работнікаў музея. «За студзень-жнівень гэтага года ў фонды прынята амаль 2,9 тыс. прадметаў, трэцюю частку з іх перадалі жыхары Віцебска і вобласці. Працэнт паступленняў у музей ад прыватных асоб штогод мяняецца. Да прыкладу, у 2021-м было 70%», — распавяла Вольга Давідоўская.
Сёлета абласны краязнаўчы музей прыняў у дар некалькі комплексаў сямейных архіваў. Сярод іх былі рэчы мастака Уладзіміра Смерадзінскага, перададзеныя яго дачкой, — фатаграфіі, дакументы і ўзнагароды. Размова пра чалавека, які ўнёс свой уклад у аднаўленне мастацкага жыцця Віцебска пасля вайны. Раней у музеі захоўвалася ўсяго некалькі звязаных з ім прадметаў.
Папоўнілі музейны архіў таксама творы вядомага віцебскага мастака Фелікса Гумена, Аляксандра Шыёнка, Аляксандра Гвоздзікава, Наталлі Лавіцкай-Ярмолавай і іншых.
Пасля кожнай выставы па традыцыі майстры дораць адну-дзве свае працы.
У ліку новых каштоўнасцяў — два абразы канца XIX стагоддзя, створаныя ў Грэцыі і Расійскай імперыі. Гэтыя прадметы знаходзіліся на часовым захоўванні ў музеі яшчэ з 2018 года, але толькі ў 2022-м завяршыўся працэс афармлення дакументаў, які дазволіў прыняць рэчы ў фонд.
Міністэрства культуры арыентуе музеі на папаўненне фондаў і прадметамі сучаснасці. Па словах Вольгі Давідоўскай, сёлета калекцыю папоўнілі рэчы, якія адлюстроўваюць гісторыю фестывалю «Славянскі базар у Віцебску», а таксама сувенірная прадукцыя і прадметы побыту, вырабленыя на Добрушскім фарфоравым заводзе.
Фота: БелТА
Што за таемнымі дзвярыма?
