28 кастрычніка, а 17-й гадзіне ў Нацыянальнай бібліятэцы Беларусі пройдзе творчы вечар народнага пісьменніка Беларусі Мікалая Чаргінца, прысвечаны яго 85-годдзю. Збяруцца прыхільнікі таленту, добрыя сябры вядомага літаратара. Павіншаваць Мікалая Іванавіча прыйдуць студэнты сталічных ВНУ.
У пярэдадзень вечарыны, 27 кастрычніка, побач з Нацыянальнай бібліятэкай у Парку пісьменнікаў ганаровы старшыя СПБ Мікалай Чаргінец пасадзіў дуб. Дарэчы, парк быў заснаваны да 500-годдзя беларускага кнігадрукавання. Пра гэта сведчыць і памятны камень-валун з мемарыяльнай дошкай. Тады, у 2017 годзе, па ініцыятыве Мікалая Іванавіча, якія з’яўляўся старшынёю СП Беларусі, і быў заснаваны Парк пісьменнікаў.
— Мы разам з калегамі падумалі і прыйшлі да высновы, што ў нашай зялёнай сталіцы краіны не лішнім быў бы яшчэ адзін парк. Я ўдзячны за падтрымку органам дзяржаўнага кіравання, удзячны Мінскаму гарвыканкаму, — гаворыць ганаровы старшыня СПБ Мікалай Чаргінец, — што нашу ідэю ў 2017 годзе ўхвалілі. Не ведаю, дзе, у якіх краінах свету яшчэ ёсць такое сакральнае месца. І прыемна, што парк жыве сваім жыццём, прыцягвае наведвальнікаў якраз паблізу Нацыянальнай бібліятэкі краіны, як мне падаецца, — самай прыгожай бібліятэкі свету.
Падзею пракаменціраваў і вядомы празаік, публіцыст Сяргей Трахімёнак:
Прыемна бачыць сёння ўсіх калег. Восеньскі дзень, высадка дрэва, высадка дуба як сімвала абароны чалавечага жыцця, сімвала моцы, трываласці, доўгажыхарства, чалавечай годнасці нас аб’яднала. Спадзяюся, што мы адзіныя і ў служэнні нашай краіне, нашаму народу. Рады, што падтрымаць юбіляра, народнага пісьменніка Беларусі прыйшлі сябры з Мінскага абласнога і Мінскага гарадскога аддзяленняў Саюза пісьменнікаў, журналісты, дзеячы культуры, бібліятэкары горада.
А ўвесну, пра гэта зазначылі ў СП Беларусі, Парк пісьменнікаў папоўніцца новай алеяй. Паэтэса і перакладчыца Іна Фралова, якая працуе ў Мінскім гарадскім аддзяленні СПБ, дамовілася з калегамі-літаратарамі з Расіі, з Масквы, што яны прывязуць у Беларусь,у Мінск, саджанцы дрэў спецыяльных гатункаў , якія падораць для высадкі ў Парку пісьменнікаў.
Між іншым, стала традыцыяй арганізоўваць паэтычныя чытанні, кніжныя фестывалі менавіта ў парку. Ужо прайшоў тут і фестываль дзіцячай кнігі, які будзе праводзіцца і ў наступным, 2023-м, годзе. СП Беларусі мяркуе, што ў парку будуць ладзіцца і іншыя мерапрыемствы.
Мікола БЕРЛЕЖ
Фота Канстанціна ДРОБАВА
«Дзесяцігоддзі школьнае харчаванне нашых дзяцей будавалася на аснове зборніка рэцэптур».
Што за таемнымі дзвярыма?