Развіццё беларуска-кітайскіх літаратурных сувязяў звязана з многімі імёнамі. І тых беларускіх пісьменнікаў, чые кнігі, асобныя творы друкаваліся ў перакладах на кітайскую мову ў Паднябеснай. І тых кітайскіх паэтаў і празаікаў, чые вершы, апавяданні, аповесці і раманы друкаваліся ў Беларусі ў пераўвасабленні на мову Янкі Купалы і Якуба Коласа.
Толькі за апошнія дзесяць гадоў асобнымі кнігамі, у перыядычных выданнях нашай краіны па-беларуску прыйшлі да чытача творы Ай Ціна, Ван Вэя, Лі Бо, Ду Фу, Лі Цінчжаа, Вэнь Ідо, Сюй Чжыма і іншых пісьменнікаў. І ў гэты перыяд часопісы «Маладосць», «Нёман» (дзе друкуюцца творы сучасных кітайскіх літаратараў у перакладзе на рускую мову), іншыя выданні імкнуліся прадстаўляць творчасць маладых паэтаў, празаікаў.
А сёлета, 16 чэрвеня, на старонках газеты «Літаратура і мастацтва» выходзяць пераклады вершаў адразу 18 кітайскіх паэтаў, якія вучацца ў Беларускім дзяржаўным універсітэце: Ло Хэсіцзы, Чэнь Шуаюй, Цай Цзысінь, Ма Дучуань, Фу Сіньпін, Ян Мэнтун, У Юйцзян, У Чжэнь, Тан Шыюэ, Цянь Сіньцзэ, Лю Цзофу, Сюэ Цзіна, Лі Юйчэнь, І Хунжуй, Чжан Шаовэй, Чжао Юйчэнь, Лі Сіньчжэ, Ван Ін. Перакладчыкам усіх твораў выступіла вядомая беларуская пісьменніца, лаўрэат Нацыянальнай літаратурнай прэміі Беларусі Людміла Рублеўская.
Газета «Літаратура і мастацтва» выходзіць у Выдавецкім доме «Звязда». Адзін з заснавальнікаў штотыднёвіка — Саюз пісьменнікаў Беларусі. З просьбай пракаменціраваць публікацыю мы звярнуліся да намесніка дырэктара Выдавецкага дома «Звязда», намесніка старшыні Саюза пісьменнікаў Беларусі Аляксея Чароты:
— Раздзел нашай газеты «Літаратура і мастацтва», які называецца «Дыпламатыя перакладу» і надалей будзе ўважлівым да сучаснай літаратурнай моладзі Кітая. Спадзяюся, што ўжо ў гэтым годзе надрукуем новую падборку вершаў юных мастакоў слова з Паднябеснай. А мо з часам выйдзем і на асобнае кніжнае выданне маладой кітайскай паэзіі XXI стагоддзя ў серыі «Светлыя знакі: паэты Кітая», якая ўжо набыла сваю вядомасць.
Мікола БЕРЛЕЖ
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.