Часопісы ў кастрычніку: «Полымя»

Выйшаў дзесяты, кастрычніцкі, нумар літаратурна-мастацкага і грамадска-палітычнага часопіса «Полымя». Раздзел «Проза і паэзія» адкрываецца падборкай вершаў лаўрэата Дзяржаўнай прэміі Рэспублікі Беларусь Міхася Башлакова «У радасці быць разам і ў журбе». «Махаў крыламі сон світальны — /І я ў тым сне кудысьці плыў.../Прамень зіхоткі і крыштальны/ Траву расяную срабрыў.../ Не знаў яшчэ я горкіх ісцін,/ Яшчэ не сніў я горкіх сноў...» Паэт не проста сумуе, ён завострана ўзіраецца ў час, у якім, перакананы творца: «Быць да канца з Айчынаю сваёй — /Інакшага не дадзена паэту...»

Са сваёй новай аповесцю — «Чаромхавыя халады» — знаёміць чытача празаік Зіновій Прыгодзіч. З вершамі выступае ў кастрычніцкім нумары «Полымя» наш суайчыннік з Латвіі — Станіслаў Валодзька (яго падборка «Ластаўкі над акном» складаецца з пяці твораў). І ў гэтага паэта не абыйшлося без восеньскіх матываў. Праўда, вершы Станіслава Валодзька — таксама не зусім пейзажная лірыка. Сучасную прозу часопіс прадстаўляе і запісамі Уладзіміра Мароза «Забраннікаў бераг», у падзагалоўку да якіх наступнае вымярэнне: «З аповедаў жыцця». Пісьменнік запрашае чытача зазірнуць у добра вядомыя ў гісторыі айчыннай літаратуры мясціны: «Як бы тое ні было, але калі ўжо сам быў у кінадакументалісцкім званні, родны Нёман каля Коласавай і маёй Мікалаеўшчыны не крыўдзіў — даволі кадраў было тут знята для розных дакументальных фільмаў. І назбіралася іх восем, амаль дзесяціна з майго сцэнарнага даробку ў дакументальным кіно за сорак без малога гадоў працы...» 

Падборка вершаў Веры Вакула з Брэста адкрываецца вершам пра яе родную вёску Тонеж, што на Гомельшчыне. Эпіграфам да твора служаць наступныя словы: «6 студзеня 1943 года ў мясцовай царкве гітлераўскімі карнікамі былі спалены 262 жыхары палескай вёскі Тонеж, што пад Туравам. Сярод іх было 108 дзяцей...» Верш Веры Вакула так і называецца — «Тонеж». Знаёміць чытачам са сваімі вершамі і Іван Капыловіч (у яго падборцы «На валуновай вярсце» — пяць вершаў). 

У раздзеле «Навуковыя публікацыі» — артыкулы кандыдата філалагічных навук Міколы Труса «Аповесць Івана Цанкара „Батрак Ернэй і яго права“ (1907) у Беларусі: рэцэпцыя, пасрэдніцтва, кантэкст» і доктара філалагічных навук Ганны Кісліцынай «Гісторыка-кантэкстны падыход у сучасным літаратуразнаўстве». 

Несумненную цікавасць усіх аматараў беларускай літаратуры павінна выклікаць публікацыя дзённікаў славутага беларускага празаіка Вячаслава Адамчыка за 1987 — 1988 гг. У раздзеле «Успаміны» — «Па літфондаўскай пуцёўцы» Казіміра Камейшы. 

Знакаміты мовазнаўца Васіль Шур выступае ў кастрычніцкім нумары з артыкулам «Анамастычныя ўзаемаўплывы і ўзаемадзеянні ў сістэмах беларускай і рускай моў». Часопіс друкуе і рэцэнзію на гадавік мастацкіх перакладаў «Далягляды’23». 

Мікола БЕРЛЕЖ