Ваеннаслужачыя міратворчай роты 103-й Віцебскай асобнай гвардзейскай паветрана-дэсантнай брыгады сіл спецыяльных аперацый Узброеных Сіл, афіцэры камандавання ССА і Міністэрства абароны Рэспублікі Беларусь, прызначаныя ў склад аператыўнай групы, а таксама прадстаўнікі ўнутраных войскаў і АМАП МУС нашай краіны ўдзельнічаюць у сумесным вучэнні з міратворчымі сіламі дзяржаў — членаў Арганізацыі Дагавора аб калектыўнай бяспецы (АДКБ) «Непарушнае братэрства — 2023», якое праходзіць у Кыргызстане.
Падчас урачыстай цырымоніі адкрыцця сумеснага вучэння намеснік міністра абароны Кыргызскай Рэспублікі генерал-маёр Руслан Мукамбетаў адзначыў, што вучэнне запланавана з улікам рэалій сусветнай абстаноўкі. «Перад намі стаяць важныя задачы па ўдасканаленні ваеннага складніка арганізацыі і нарошчванні яе патэнцыялу ў мэтах усебаковага развіцця дзяржаў-членаў АДКБ, — паведаміў ён. — Сумеснае міратворчае вучэнне АДКБ нацэлена перш за ўсё на сумесную аператыўную баявую падрыхтоўку падраздзяленняў, вылучаных у склад Калектыўных міратворчых сіл дзяржаў-членаў АДКБ. Дзякуючы вучэнням міратворчай накіраванасці, асабовы склад Узброеных Сіл нашых брацкіх дзяржаў удасканальвае сваю палявую вывучку і набывае неабходны практычны вопыт вядзення міратворчых аперацый».
Як звярнуў увагу начальнік Аб’яднанага штаба АДКБ генерал-палкоўнік Анатоль Сідараў, валоданне эфектыўным інструментам прымірэння канфліктуючых бакоў, аднаўлення нармальнага жыцця з’яўляецца важным складнікам сістэмы калектыўнай бяспекі АДКБ. «На сённяшні дзень, дзяржавы — члены арганізацыі маюць больш чым 25-гадовы вопыт міратворчасці ў розных кутках свету, — нагадаў ён. — У 2022 годзе міратворчыя сілы АДКБ практычна былі прыменены ў Рэспубліцы Казахстан. Вынік міратворчай аперацыі атрымаў высокую ацэнку кіраўніцтва Рэспублікі Казахстан і дзяржаў — членаў АДКБ. Далейшае ўдасканаленне складу міратворчых сіл АДКБ і іх падрыхтоўка да выканання задач па прызначэнні — найбольш важны напрамак развіцця сістэмы калектыўнай бяспекі арганізацыі ў бліжэйшыя гады».
Пасля цырымоніі адкрыцця ўдзельнікі вучэння прайшлі ўрачыстым маршам з разгорнутымі дзяржаўнымі сцягамі і паехалі на палігон навучальнага цэнтра «Эдэльвейс» адпрацоўваць практычныя дзеянні.
Актыўная фаза вучэння пройдзе з 9 да 13 кастрычніка. Асноўныя мэты вучэння — удасканаленне практычных навыкаў службовых асоб органаў кіравання і асабовага складу Міратворчых падраздзяленняў АДКБ у ходзе правядзення аперацыі па падтрыманні міру ў Цэнтральна-Азіяцкім рэгіёне калектыўнай бяспекі. Ва ўмовах высакагор’я будуць адпрацоўвацца задачы постканфліктнага ўрэгулявання: правядзенне міратворчай аперацыі з прымяненнем сіл і сродкаў сістэмы калектыўнай бяспекі АДКБ і аказанне гуманітарнай дапамогі. Практычныя дзеянні прадугледжваюць выкананне калектыўнымі міратворчымі сіламі ва ўзаемадзеянні з падраздзяленнямі МНС, МУС, ДКНБ дзяржаў — членаў АДКБ вучэбна-баявых задач на блокпастах і пунктах прыёму пацярпелых, пры суправаджэнні калон і грузаў, вызваленні населенага пункта і заложнікаў, аказанні гуманітарнай дапамогі. Асаблівасцю вучэння бягучага года з’яўляецца правядзенне некалькіх эпізодаў у акваторыі возера Ісык-Куль.
Усяго ў манёўрах удзельнічае каля 1500 ваеннаслужачых, больш за 200 адзінак ваеннай і спецыяльнай тэхнікі, армейская, знішчальная і ваенна-транспартная авіяцыя, беспілотныя авіяцыйныя комплексы і армейскія катэры.
Алег НЯКАЛА
Фота аўтара
Фіналістка праекта «Акадэмія талентаў» на АНТ — пра творчасць і жыццё.
На гэтым тыдні Цяльцы будуць проста незаменныя ўсюды, дзе іх ведаюць.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
