Беларускія барцы заваявалі пяць медалёў маладзёжнага чэмпіянату свету

Героі тыдня. У сталіцы Албаніі Тыране завяршыўся чэмпіянат свету па барацьбе сярод атлетаў да 23 гадоў, удзел у якім пад нейтральным сцягам прынялі беларускія спартсмены. Барэц грэка-рымскага стылю Павел Глінчук стаў чэмпіёнам свету ў вагавой катэгорыі да 97 кг. Глеб Макаранка стаў сярэбраным прызёрам у катэгорыі да 63 кг. Не засталіся без медалёў і дзяўчаты. Аліна Шаўчук заваявала «серабро» ў катэгорыі да 68 кг, а Арына Мартынава і Вікторыя Радзькова выйгралі па «бронзе» ў катэгорыях да 55 кг і да 72 кг адпаведна.

Перамога тыдня. Хакеісты мінскага «Дынама» завяршылі чарговую выязную серыю ў рэгулярным чэмпіянаце Кантынентальнай хакейнай лігі. У заключным матчы серыі «зубры» сустрэліся з омскім «Авангардам». Вынік сустрэчы — 4:3 на карысць мінчан. Такім чынам, у гэтай выязной серыі падапечныя Дзмітрыя Квартальнага набралі чатыры ачкі з чатырох. Наступны паядынак мінчане правядуць 31 кастрычніка на дамашнім лёдзе супраць чарапавецкай «Поўначсталі».

Лічба тыдня. 6 залатых медалёў заваявалі беларускія спартсмены на маладзёжным чэмпіянаце свету па шашках-64, які адбыўся ў Турцыі. Двухразовай чэмпіёнкай свету сярод моладзі стала Аляксандра Спірына. Па залатым медалі таксама выйгралі Арцём Ціханаў (юніёры) і Паліна Петрусева (моладзь), Дар’я Нікіфарава (дзяўчаты да 17 гадоў) і Юлія Швед (дзяўчаты да 11 гадоў). Яшчэ сем беларусаў сталі прызёрамі чэмпіянату. У маладзёжным чэмпіянаце свету па шашках-64 прынялі ўдзел 160 спартсменаў з 13 краін. Спаборніцтвы праходзілі ў шасці ўзроставых групах па трох праграмах — класічнай, хуткай і вокамгненнай. Беларускія спартсмены заваявалі 6 залатых, 5 сярэбраных і 7 бронзавых медалёў.

Поспех тыдня. Нашы спартсмены выступілі на Усерасійскіх спаборніцтвах па веласпорце на трэку, якія завяршыліся ў Санкт-Пецярбургу. Усяго наша каманда заваявала шэсць медалёў. У індывідуальнай гонцы праследавання на тры кіламетры сярод жанчын з новым рэкордам Беларусі — 3:29,394 — перамагла Караліна Бірук, другое месца заняла Анастасія Колесава. У юніёрак поўны камплект узнагарод сабрала Паліна Конрад: «золата» ў гонцы з выбываннем, «серабро» ў гонцы праследавання і «бронзу» ў мэдысане ў дуэце з Адэлінай Сакун. Акрамя таго, Сакун заваявала бронзавы медаль па выніках скрэтча.

Каманда тыдня. Беларускія футбалісты прабіліся ў элітны раўнд адборачнага турніру юнацкага чэмпіянату Еўропы (U-17). 

У заключным матчы кваліфікацыйнай групы беларуская зборная сустрэлася з камандай Казахстана. Паядынак скончыўся нічыёй — 0:0. У першым туры беларусы перамаглі каманду Шатландыі — 3:1, а потым саступілі зборнай Турцыі — 0:1. 

Выніковае становішча ў групе: Турцыя — 7 ачкоў, Беларусь — 4, Шатландыя — 3, Казахстан — 2. У элітны этап кваліфікацыі юнацкага кантынентальнага першынства выходзяць па дзве найлепшыя каманды з 13 груп, а таксама пяць найлепшых зборных, якія фінішуюць трэцімі. Пуцёўкі туды, акрамя беларусаў і туркаў, ужо атрымалі футбалісты Грузіі, Германіі, Польшчы, Аўстрыі, Нідэрландаў, Швецыі, Фінляндыі, Ірландыі і Швейцарыі. Матчы элітнага раўнда адбору пройдуць у сакавіку, а фінальны турнір адбудзецца з 20 мая да 5 чэрвеня 2024 года на футбольных арэнах Кіпра.

Дэбют года. Беларускі абаронца Ілья Салаўёў правёў першы ў кар’еры матч у Нацыянальнай хакейнай лізе. Беларускі хакеіст выступае ў складзе каманды «Калгары Флэймз». Ураджэнец Магілёва стаў 15-м беларускім хакеістам і трэцім у бягучым сезоне, які выступае ў наймацнейшай лізе планеты. Разам з Салаўёвым за «Калгары Флэймз» выступае яшчэ адзін беларус Ягор Шаранговіч. Упершыню за 11 гадоў за адну каманду НХЛ згулялі два беларусы. Але ў гэтым матчы «Калгары» прайграў «Сэнт-Луісу» з лікам 0:3.

Валерыя СЦЯЦКО

Фота з адкрытых крыніц